1 Zipha byu qe wa Sholu na: ra" Giba vomo" khyo li" lo mung: Davi wa Yeshimun tau" te' mae" Hakhila bug gaung mae vho' na: ra" mangaid: i"? ga: yeta" kyo: ko" ra". –2 Alao" Sholu to" lo mung: khyin: to" ra" Israel byu sam taung we' Zipha seyo khyo3 Davi re qho nae" ga: gyo" lo ko"ra". – Sholu wa Yeshimun tau" te' Hakhila bug gaung khyo dang yae mae gyetab to" ra". Davi wa seyo mae na mung: Sholu yao: re cao" khe'4 ru qo" ba: yu: ra". – Amung: yao: jin" byu nhao: ke' qu" re Sholu dang dang joe" na:5 ru jhaug' za: qo" ba: yu: ra". – Alao" Davi to" ye" lo" mung: Sholu gyetab to" ra" jo, qo mae joe" ra". Ana" Sholu we' zug: jhaung Nera yao: zo: Abana: yab; ra" jo, qo qo" the' myao: ba: yu: ra". Sholu wa lhin" tab agaung: mae yab mung: yao" avai: ayae tau sin: zo: qe lhang" kham" jo, qo yu ko" ra".6 Davi wa Sholu na: khyo re ngo we' daga" Sholu jhao" khoyaug bocao" genae" ga: Hiti byu Ahimaled' we' Zerua yao: zo: Yaba yao: nhaung: Abishai tao re myid' qu" re Abishai yaug ngo bocao" nae" ga:7 ta" ra". – Davi we' Abishai tao wa myi" re gyezo: qe na: ra" khyo ye: mung: Sholu wa lhin" to" agaung: tau yab; jo, yang: yao" lhae wa am: thaung" myid gaung mae zhaug' to" ra". Abana: we' yao" gyezo: qe wa avai: ayae lhang" kham" yab; jo, ko"8 ra". – Ai: au: Abishai wa Mo"so: yang ni" gyevo re asang ni" lo, mae ana" ba qhaug' byid' ava". Ai mung: lhae: yang myid gaung zaug: vao: lo" sho' dalhang: yang za: ngo yao: re geim: kyao" pye' nae". Shid' lhang wa madam: paug' geim lo: ga: Davi re mho'9 ra". – Mo"so: xau gyain: qhug' ra" yaug re pe" o: mado khag' gai: zao" thaung: nae" ga:10 Abishai re dam: ta" ra". – Dam: Davi wa Mo"so daui: na: we' dakhyo: Mo"so: yang yao: re se' pye' li" nae". Ai ru: mangaid: lao" yao" shid yo, joe" nae". Mangaid: lao" gye11 poe mae ye seim" shid: pye' nae". – Mo"so yang xau gyain" to: qhug' yaug re nga" lo, mazao" sho' Mo"so tam" kyo" veshao: wo". Ai qere: am: thaung" shaid' jo; ra" lhae we' qid am re wa yu: lo" lang: ga: mho zo" , –12 Davi wa Sholu; am: thaung" tau mae" lhae we' qid am yu mung: yao: tao lo" byaug; ra". Khag' re: maba mamyao: ke'. Khag' re: maso: ko". Pe" mung: ga" re Mo"so: yang yao: bam re yab nug aqi: we' yab mo" myid' nhao: to: va" mathao yao: bam yab pyo" na: ako".13 Davi wa lao: khaung: mo" thoete' de, yang: gyai va" ra" bam myhao gaung: mae14 ye, mung: , – Byu qe we' Nera yao: zo: Abana: we" Abana: nao dang dang matau: i"? we" ga: zag: yao: ke' ra". Abana: wa jhaung zug: re zag: hug' ra" nao wa khag'15 ngaid: ga: tug' myid' ke' ra". – Alao" Davi Abana: re nao sulhe: yaug gai mangaid: i". Israel qe mae nao we' dau: ru khag' na: . Ni" asang jhaung zug: pho" re pe" mung: macaung magam:. Ni" asang jhaung zug: re se' nae" ga: byu dayaug vao: ava". –16 Nao kaid' mau" wa shab mamung. Mo"so: xau gyain: qhug' ra" ni" asang re magug: gam: ra" mathao Mo"so kao daui: na: we' dakhyo: nao shid main: qi" yaug ngaid: ava". Jhaung zug' au: tho' mae to" ra" lhae we' qid am jo; ru majo; ru qu" ke' qu" shi: ga: Abana: re ta" ra".17 Sholu Davi dao: thoe re se" mung: nga" zo: Davi , ngo the' gyo" ra" thoe wa ni" thoe ngaid: i"? ga: myid' ke' re , nga" dao: thoe ngaid: wo". Nga" asang jhaung18 zug: we" ga: tau" ra". – Dam: Davi wa nga" asang ni" jeim ngo re pe" mung: cao" qho: khe' qin" ra". Ngo pe" zaui" shaid' va". Ngo19 mae pe" qobo bo: i"?. – Nga" asang jhaung zug: we" ana" ni" jeim nga" dao: kheim: tae" gyo: byid: la, . Mo"so: yang ngo re gye kaid' nae" tau: nao re zhain" na: ru ngaid: re wa yao: ngaui" xeim: khae: yu shao: . Ai ru: mangaid: byu xaosu: yang zhain" ru angaid: re wa Mo"so: qhid' kheim: nhang: dao: phau: zo: shao: . Pe" mung: ga" re yao: bam ngo re phao se, . Getau: mo"so cao" qho: pa" lo" wa, ga: Mo"so: jao khae mug: myid mae maqo" na sho' ana" ba lao" cao"20 khe' qin" genhaung mhao". – Ai ru: mung: nga" sa: Mo"so: qhid' kheim: myid gaung tau magyo" veshao: . Pe" mung: ga" re byu wa bam nyug lao phyo: mae ngho' yhau" cao" khe' qho: qin" nhaung wo" ga: mho: ra".21 Sholu kam" wa ngo shaid' nghung: va". Nga" zo: Davi dam: lo ri: . Nao ana" ba nga" kao re o: byid: mathao: yang thao phyao: mapyam" yhin" lo: nae". Ngo lam: ako" na nhaung. Ngo gyai shaid' va" ga: ta" ra". –22 Davi wa jhaung zug' lhae ce mae ngaid: .23 Zoshao dayaug re li" yu nhao wa, . – Ana" ba Mo"so nao re nga" lo, tau qhaug' pye' ava" ngaid qere: yao" xau gyain: qhug' yaug re mazao". Mo"so wa khag' re ngaid qere: yham sang: din: main" ru we' vin tang" ru mae cao" yang: akyu" dam: phaug' byid:24 nae" ngaid: . – Ana" ba ngo ni" kao re o: byid: ru: Mo"so nga" kao re o: byid yang: ngo re qug: khai: aja: ja: tau mae" she: yu25 shao: wo" ga: ta" ra". – Alao" Sholu wa nga" zo: Davi we" , nao ngaui lho" veshao: wo". Zaui: mau" cao jab aung myaug shao: wo" ga: Davi re min dao: ta" ra". Ai mae" Davi su" thug' lo" mung: Sholu re: yao" jo, qo dam: phao: lo" ra".