1 Ephared' vobyu Zupha , Tohu , Elihu , Yeroham: mae" gyo" lo: ra" Ephrim: bam mug: Ramatim: Zuphid mae na su Elaka-2 na mang: byu dayaug na: ra". – Ai: yaug wa yao: myi: shid' yaug qo" ra". Dayaug wa Hana , dayaug wa Penina mang: ra". Penina wa zoshao khau mung: Hana kam"3 zoshao maqo" ngaid: ra". – Elakana wa thain" madaui pyaid da du Mo"so re pa" kug' mung: xeim: ngaui" nae" tau: yao: na: ra" jo, qo mae" Shilo: vomo" khyo zin qug: lhaung" ye" ra". Mo"so: khin jaung mo" Eli yao: zo: Hophani we' Phinahad' wa Shilo:4 mae na ko" ra". – Elakana wa xeim: ngaui" nae" ayo, joe" lo mung: yao: myi: Penina we' yao: zo: qe re gae bam thaung: gae:5 ra". – Hana re re: jhid' de, yang: shid' nho" gae bam bothaung: ra". Ai qere: Mo"so wa Hana re zo: khau nae" akhang" mabyid:6 ngaid: ra". – Mo"so: yang Hana re bug daung: boe" nhao yang: yao" nhag' lam: gyai no sho' vhao cao myhi" yang jung"7 khyoe' na: ra". – Zin qug: Mo"so: yham khyo do, lo" lao" vhao cao myhi" ta" khyoe' na: ru mung: zo mazo: lo: lhaung" ngug;8 na: ra". – Yao: lao Elakana wa Hana pe" mung: hug' ngug; na: . Pe" mung: mazo" ru. Pe" mung: nao nhag' kaug' na: . Zoshao daxe yaug tho' mae nao re ngo je: nyang" sho' kaid' va" mangaid: i" ga: ta" ra".9 Shilo: vomo" mae bin: zo: shaug' thao Hana to" ye" lo" ra". Ai: ayo, re khin jaung Eli wa Mo"so: pa" jhaung: yham zang yae yao" zaung tao" mae zaung: na:10 ra". – Hana wa nhag' kaug' ru we' gyai ngug yang: Mo"so jhao" jhaung: mho'11 na: ra". – Thain" madaui gang" tang: ra" Mo"so we" ni" jeim myhi" re mato" myhid' lo: za: ni" jeim myhi" sho: jhin phyag' ru re tae" gyo: byid: yang: ni" jeim myhi" re yaug gai zo: byid' ngaid: re yao" xae kho- nhae" re: maphyid' pye' lo: za: yao" suna dabang" geim" Mo"so nao re qhaug' byid:12 nae" ga: dao: so: to: jhaung: mho' ra". – Ai re" khyo: Hana Mo"so: qhid' kheim: myao" sho' na: au: Eli wa yao" nhaid' qu" xam"13 ci: ra". – Yao" nhag' lam: mae za: mho' na: ru mung: nhaid' qhaug' qere: thoe mathug' yang: yao: sabyi' yid: ra" ga: Eli myid: yu:14 ra". – Eli wa nao khoyo, joe" sho' yid: na shi: nae"? Ni" yhid phai: shaug' ru jao" pye'15 wa, ga: yao: re ta" ra". – Hana kam" wa ai ru: mangaid: asang we" ngo wa nhag' ngai: na: ra" myiqe: zo: ngaid: . Sabyi' re: , yhid re: ngo mashaug' Mo"so jhao" nga" nhag'16 lam: ngaui" byid' na: . – Ni" jeim myhi" re mashab: ra" myiqe: ein yang: damyid: yu. Nhag' myid: ngau" ru , nhag' lam: mayaug yo: ru saung" laug yang: ana" joe" mho' yao: na: ru angaid: ga: phaug' jhau: ra".17 Alao" Eli wa yaug yo gai" lo" se, . – Ana" nao mho' ru we' dakhyo: Israel Mo"so nao18 re byid: shao: wo" ga: mho: ke' ra". – Ni" jeim myhi" ni" qhid' kheim: mae myo, nho nga: lho" lo veshao: wo" ga: bin: ta" lao" myo, nho lai" lo" ru we' lo" yang: zo zo" ra".19 Yao: bam ne, seim no' no' to" mung: Mo"so re bin: pa" kug' thao Rama mae jo; ra" yao: bam: yham khyo dam: lo" ko" ra". Elakana re: yao: myi: Hana we' zam" khug yang: Mo"so yao: re myid: beim" yu: ra". –20 Hana gaung la" li" mung: ba na nge, lao" yaug gai zo: khau myhung: li" ra". Ai: yaug re Mo"so jhao" mho' yu: ru mung: Samuela ga: mhang" ra".21 Elakana wa yham byu alhab' we' daga" zin qug: zaui: so" ra" xeim: ngaui" khyo re re: , dao: so: we' tin" ra" ngaui" xeim: re re: Mo"so jhao" qhaug' byid: nae" ga: do, lo"22 ra". – Hana kam" wa zoshao nug' makao: shi" re ngo mado, lo". Nug' kao: thao za: Mo"so: qhid' kheim: mae dapyaid na nae" tau: lo" dai" to: au" do, lo" nae" ga: ta"23 mung: yham mae na: na: ra". – Lao Elaka- na wa nao myid: ngaui: khyo: kaid' wa, . Nug' kao: sho' na: na: shi: wa, . Mo"so: dao: so: dang veshao: ga: ta" mung: yao: myi: wa zoshao re nug' jhaug' zo" nug' kao" ra"24 ba joe" sho' malo" lo: na: na: ra". – Nug' kao: thao sam zin: nung: dadau: , cinmain" dabye: , sabyi' qang: dathaug' we' zoshao re jhui" do, lo" mung: Shilo: jo, qo Mo"so: yham joe" ye: ko" ra". Ai: zoshao wa gyai25 ngai shi". – Nung: re se' yang: zoshao re Eli jhao" vhao" ke' ako". Alao" Hana wa nga"26 asang we" , – nao daui: na: ru we' dakhyo: ngo wa dalhang: re" ce tau ni" anhae mae ye, yang: Mo"so jhao" jhaung: mho' ra"27 myiqe: ngaid: . – Ai: au: zoshao ceyaug qo" nae" tau: mho' ru ngaid: . Mho' ru we'28 dakhyo: Mo"so byid' ava". – Ai mung: ngo zoshao re Mo"so jhao" byid' to: va". Yao: re shid: ra" ba joe" sho' Mo"so jhao" byid' to" ru va" ga: bin: ta" lao" ai: tau Mo"so re pa" kug' ko" ra".