1 Davi wa Rama vomang: Na yug' vo mae" phao mung: Yonatain: jhao" lo" yang: ngo pe" kaid' shaid' lo" va". Pe" qobo qo". Ni" pho" nga" kao qho: na: ru wa yao: re pe" zai" shaid' yang: ngaid: lo" va" ga: myid'2 ra". – Yonatain: kam" wa ai ru: maboe" nae". Nao mashid nae". Nga" pho" wa ngo re byin maqham lo: mau" angai aqi: daja: ja: re: malhaung" kaid'. Ce: mau" dang: ngaid: re ngo maba sho' pe" ga: ba: nyham" to: nae". Ce ra" mau" madang ga: dam: ta"3 ra". – Davi re: ngo wa ni" ba nam ngaid: ra" khyo re ni" pho" dang dang ba: ci: ru mung: Yonatain: nhag' jo, mayo nae" ga: gaung yug yang: yao: wa ce: mau" daba nhao ge, ga: ta" to: va". Dang dang Mo"so kao daui: na: ru: nao re: kao daui: na: we' dakhyo: ngo we' shid no gyo: mae khyid dabye su: za: angaid lo" ra" ga: jham tang:4 zo" mae" ta" ra". – Yonatain: khyo" re: nao myid; ngaui: khyo: ngo pe" re: kaid' nae"5 ga: Davi re ta" ra". – Davi wa ne, mo" ba lho" xin" ba na ngaid: ru mung: jhaung zug: we' zo zo: nae" tau: zo zo: gai" mae mabo: zaung lo: magai: kaid'. Ngaid qere: sam ba: myi joe" sho' seyo mae vho' na shi: nae". –6 Ni" pho" ngo mana: ru re the' myid: beim: lao" Davi yham khaung bao: qe tau: zin qug: re" xeim: ngaui" ayo, joe" va" mathao yao" vogaung: Belehem khyo lo" nae" ga:7 maqaid maqui" mho' ra" ein: ta" wa, . – Ni" pho" gai va" ga: ta" lao" ni" jeim loe, beim: khyo qo" va". Ai ru: mangaid: gyai nhag' yo" lo lao" kam" wa khug lhang lhang va"8 ein: beim: wa, . – Ai ru: lao" ni" jeim ngo re nhag' myain" yu la, . Mo"so: khang" dao: kheim: mae ni" jeim pho" nao we' dao: so: to" na: ru ngaid: . Ngaid qere: ngo mae qobo bo: ngaid: re kam" wa nao yao: ngo re se' pye' la, . Pe" mung: ni" pho" jhao" ngo re jhui" lo" nae" ngaid: i"? ga: Yonatain: re ta"9 ra". – Yonatain: re: ai ru: wa maboe" shao: . Nga" pho" nao re se' nae" ru ngo dang dang ba lao" nao re mata" kyo: lo: ngo na: na10 nae" i"? ga: ta" ra". – Davi re: ni" pho" nao re gyai ga: kyid' zhaug' lo: re ngo re khoy-11 aug li"? ta" kyo: nae" ga: myid' re , – Yona- tain: wa ngo nhae seyo khyo ye: gelang: ga: Davi re ta" yang: yao: nhae seyo khyo thug' ye" lo" ko" ra".12 Yonatain: re: Israel Mo"so apyaid ato: Mo"so kao daui: na: we' dakhyo: ne, mo" , sao pho" ce yo, nga" pho" nhag' myid ca: qu" mung: yao: Davi adao nhag' lam: agai ato" ru ba: yu yang: nao re lau dao:13 makyo" na: re re:, – mangaid: lao" nga" pho" gye kaid' pyi qho nug: ru ba yang: nao yaug yo za: qo" su" lo" nae" khyo: ngo mata" manhao lo: na: ngaid: re re: , Mo"so: yang ai: tho' mae" Yonatain: re phau: nhao shao: , Mo"so wa nga" pho" we' daga" lhaung" na: we' dakhyo: nao we'14 re: daga" na: na veshao: wo". – Nao ngo daui: na shi" au: za: Mo"so o ngaui: we' dakhyo: ngo re kao daui: na nae" jeju khyo15 qhu" byid: nae" za: mago". – Davi gyevo alhab' re myid gaung mae" sham" pye' va" thao re ngaid qere: nga" amyu" akaung mae pyaid da du jeju kaid' na ca" nae" ga: mho:16 ra". – Ai ru: ga: Yonatain: wa Davi kaung: gu: we' dao: thang: to" ra". Dao: thang: ce re phyo' pye' mae" lao" kam" wa Davi re gye kaid' mo; lo; yang Mo"so loge, phaug'17 veshao: wo" ga: , – Davi re yao" gaung re" khyo: jhid' de; ru: jhid' ra" mathao: yang jhid' myid aqi: we' ai ru: ga: paug' yang: yang: dao: thang: to" ra".18 Dam: Yonatain: wa ne, mo" ba lho" xin: ngaid: . Nao zaung: ra" jo, qo gung:19 zai mung: nao mana: ru ba zai va". – Nao sam ba vho' na thao mye, za: gyo" lo mung: genhae" mau" thug' re vho' khug: lo: jo, qo joe" lao" Ezela laug byo, yae mae lao" na20 wa, . – Ngo re: la: bag; mhug' mung: laug byo, yae khyo myo: khe' sam lhang bag;21 tao" ke' nae". – Myo: khe' ai yeqho: lo ri: ein: zoshao nhao: ke' nae". Alao" myo: khe' ai ni" nhae mae ngaid: gaug; yu se, ein: zhao: zhao: za: ta" ngaid: re wa lo ri: . Mo"so daui: na: we' dakhyo: nao mae pe" qug: qe"22 majo, lo: loe, va". – Ai ru: mangaid: myo: khe' nao mae" lai: lo" ava" ein: zoshao re ta" ngaid: re wa lo" se, . Mo"so nao re nhao23 va" ra". – Ana" ngonhae jho" ta" ru mae nao we' nga" agyo: Mo"so khyao za: na: na veshao: ga: ta" ra".24 Davi wa seyo mae ye vho' na: ra". Lho" xin: ba joe" lao" jhaung zug: wa zo: shaug'25 nae" zo jaung: mae zaung: ra". – Geau: we' dakhyo: khin qae shaid' jhaung zug: zaung lao" Yonatain: to" mung: Abana: lam: Sholu nhae mae zaung: ra". Davi26 zaung jao: gung" jo; ra". – Ai qere: Sholu wa daja: ja: ca" va". Yao: mashao lo: . Dang za: mashao lho" lo: ga: myid: yu yang: ai:27 ba sae za: na: na: ra". – Thao: ba lho" xin: shid' ba ein: ba re Davi zaung jao: gung" jo, mung: Sholu wa Yese" yao: zo: zo: shaug' jao: khyo aye" nhe' re: mali" , ana" ba re: mali" pe" mung: ai ru: kaid' ra" ga: yao: zo: Yonatain: re myid' ra".28 Yonatain: wa Davi wa Belehem lo" nae" ga: maqaid maqui" akhang" mho'29 ra". – Ngo re lo" nae" akhang" byid: la, . Nga" akaung qe ai: vomo" mae xeim: to' poe kaid' ako". Nga" mao: re pyang: ke' ra". Nao ngo re zam" cao: toe' re ngo lo" mung: nga" mao: bam we' lo" jho" qhug' myao nae" tau: akhang" byid: la, ga: mho' ra". Ai mung: ce: zo: shaug' jao: mae maqo" li" ru ngaid: ga: Sholu re ta" ra".30 Alao" Sholu Yonatain: re nhag' yo: mung: nhag' lam: malho" ra" yaug zhang: myhi" yao: zo: we" ni" gaung we' ni" myhi" qho' phau: sho' Yese" yao: zo: re nao baung" na: ru re ngo maba nae" myid:31 jho: na: i"?. – Yese" yao: zo: myid gaung: dao mae kao adaui: na na wa nao we' ni" mang: din" gang" tang nae" mangaid: . Ana"32 yao: ye khai nhao: ke' wa, . – Yao: shid ca" nae" ga: mho: ra". Alao" Yonatain: wa pe" mung: shid qhug' nae" ngaid: i". Pe" kaid' shaid' byid' ra" ga: yao: pho" Sholu re tug' myid' ra".33 Sholu wa Yonatain: re lhae: yang zao" shao: ga: geim: ke' ra". Ai ru: mung: yao: pho" wa Davi re se' nae" myid: yaung va"34 khyo Yonatain: qo" the' ba: yu: ra". – Ai mung: nhag' yo: nug yang: ai lho" xin" ba re zo: vae mabo: zo: lo: to" lo" ra". Yao: pho" Sholu wa Davi re qho' phyo' ra" mathao Davi tau: nhag' gyai kaug' na: ra".35 Thao: ne, kao Davi we' jho" dang: to" ayo, mae Yonatain: wa zoshao re jhui:36 mung: seyo khyo ye" ra". – Zoshao re re: tao: wa, . Ngo bag: ke' ra" myo: khe' qho wa, ga: mho yang: ai: zoshao tao" ye" lo" lao" yao: re lhoe" sho' myo: dakhe' bag:37 ke' ra". – Yonatain: bag: ke' ra" myo: khe' gyo" lo" jo, qo khyo zoshao joe" ye: lao" Yonatain: wa myo: dakhe' nao re lheim"38 lai: lo" va" mangaid: i"?. – Tao: wa, mye, tao: wa, . Dathang: na ga: ai: zoshao re cao" hug' ra". Zoshao zo: re myo: khe' gaug: ci mung: yao" asang jhao" dam: tug' lo: ra". –39 Ai qere: zoshao wa ai: akhyo re maba: phaid' yu. Yonatain: we' Davi za: aba: jho"40 gyo" ra". – Yonatain: wa yao" sin: jham re zoshao jhao" byid' ke' mung: vo khug khyo41 yu: lo" se, ga: ta" ra". – Zoshao lo" byaug thao Davi wa mug: am: shaid' khyo" thug' lo mung: myid mae gam" goe, zo" sam lhang bin: gam" goe, mung: yao: tao bo: baug jho" baug , jho" ngug yang: Davi lam:42 je: ngug: ze: ra". – Alao" Yonatain: Davi re Mo"so nao we' nga" gyo: mae re: , nga" akaung qe we' ni" akaung qe: gyo: mae re: khyao za: pyaid da du ana: na shao: ein: Mo"so: mang kheim: mae ngo nhae dao: thang: jho" to: va" mathao ai: mae khug yang: ngaui bau: za: ye" lo" se, ga: nhao: ke' ra". Ai re" khyo: Davi to" lo" mung: Yona- tain: re: vo khug khyo vao lo" ra".