1 Ana" Israel byu qe wa AsAng Mo"so: qhid' kheim: mae magai: qobo mau" dam: kaid' veko". Ai ru: mung: AsAng Mo"so yao: bam re Philisti byu qe: lo, mae zin na byid xe zin qhaug' byid' pye' ra".2 Dain: nhae Zora vobyu Mano: mang: ra" byu dayaug na: ra". Yao: myi: wa bug3 daung: mung: zo: makhau. – AsAng Mo"so: mug: logyo: wa ai: myiqe: jhao" gaung li" myhao" qhu" mung: nao bug daung: mung: zo: makhau qere: ana" gaung la" li" yang:4 yaug gai zo: re khau myhung: li" nae". – Ai ru: mung: lha" wa,. Sabyi' qang: dashaug'. Yhid' dashaug'. Mashao: ra" zo: nam5 dazo:. – Pe" mung: ga" re gaung laui khyao xao" yu mung: khau: lo nae" ra" yaug gai zo: wa AsAng Mo"so: Nazari byu ngaid: ru mung: xae magai: phyid' nae", yao: wa Israel qe re Philisti byu qe: lo, mae" aqhid khyaid'6 yu nae" yaug ngaid nae". – Ai: myiqe: re: yao" yaug gai jhao" lo" mung: AsAng Mo"so: mug: logyo: myo, khung: ru" ru qu" gyaug pho" myo, khung: de; ra" AsAng Mo"so: byu dayaug ngo jhao" li" ra". Khai: mae" li" ru ein: ngo re: mamyid' qu". Yao" mang re7 re: mata" kyo: co'. – Yao: ta" ra"- nao wa gaung laui: li" mung: yaug gai zo: khau: li" nae". Sabyi' qang: dashaug'. Yhid da shaug' wa,. Mashao: ra" zo: nam dazo:. Pe" mung: ga" re ai: zoshao wa myhi" aung mae" shid: ra" ba joe" sho' AsAng Mo"so" Nazari byu ngaid nae" ga: ngo re li" ta" ra".8 Ai ru: mung: Mano: wa AsAng Mo"so we" ngo wa khau myhung: lo nae" ra" zoshao: adao khoru: kaid' byid: ca" khyo re AsAng Mo"so: logyo: wa dalhang dam: li" mung: ta" shid' yu la, ga: AsAng Mo"so jhao"9 mho' yao: ra". – AsAng Mo"so wa Mano: dao: thoe gyo" yu mung: AsAng Mo"so: mug: logyo: wa yo thaung: kaid' jao: mae zaung: na: ra" ai: myiqe: jhao" dam: li" ra".10 Ai: au: yao" yaug gai Mano: mana. – Myiqe: wa yao: yaug gai jhao" mye, mye, tao" ye: mung: ana" gyo: li" ra" yaug ana" dam: joe"11 li" va" ga: yeta" kyo" ra". – Alao" Mano: wa to" mung: yao: myi: we' daga" ai: yaug jhao" ye" lo" mung: nao ce: myiqe: jhao" li" jhau su ngaid: i"? ga: myid: lao" ngaid: ga: mho:12 ra". – Mano: wa AsAng: dao: byang" dang: lo veshao:. Zoshao wa pe" ru" yaug ngaid nae". Yao: mae khoru" ru bao" kaid' ca" nae"13 ga: myid' ra". – AsAng Mo"so: mug: logyo: wa ngo ta" khyo: myiqe: jao" ca" nae". –14 Sabyi' mae" kaid' yu: ja: daja: re: magai: zo: . Sabyi' qang: we' yhid magai: shaug'. Mashao: ra" zo: nam magai: zo: . Ngo pin: to" we' dakhyo: jao" ca" nae" ga: Mano: re ta" co' ra".15 Mano: wa AsAng Mo"so: logyo: re ni" tau: caid' be, nau" dadau: qo" se' da" nae" yo, joe" sho' tam" to: nug: ra" ga: ta" re –16 AsAng Mo"so: mug' logyo: wa Ngo re tam" to: qere: ni" zo: nam Ngo mazo:. Phaid' ngaui" xeim: qhaug' nug: re AsAng Mo"so jhao" qhaug' byid: ca" nae" ga: Mano: re ta" ra". Ai: yaug AsAng Mo"so: mug' logyo:17 ngaid: ru re Mano: maba. – Mano: re: AsAng ni" dao: byang" dang: lo: au: ngotao qo" caung: khin" shao: ni" mang khoru: ga: mang: ra" ga: AsAng Mo"so: mug' logyo:18 re myid' ra". – AsAng Mo"so: mug' logyo: wa mug' pho: ngaid: ra" Nga" mang re pe"19 mung: myid' ra" ga: ta" ra". – Mano: wa caid' be, nau" we' cinmain" xeim: ci mung: laug baui dao mae AsAng Mo"so jhao" qhaug' byid' ra". Ai: au: Mano: tao qo" the' myao: ra" myhao" qu" mug' pho: ein: nae"20 ru wa , – Ngaui" phain dao mae" myi: shae mug: khyo do, lo" au: AsAng Mo"so: mug: logyo: re: ai: myi: shae khyo" bodo, lo" ra". Mano: tao wa ai re the' myao gelao" myid gaung mae gam" goe, ko" ra".21 AsAng Mo"so: mug' logyo: wa Mano: tao jhao" thao re getau mana: thug' qhu" lo: . Ai lao" za: Mano: wa AsAng Mo"so22 mug: logyo: ngaid: ru re ba: ra". – Mano: kam" wa ngo tao wa AsAng Mo"so re the' myao: ra" mathao dang dang shid zai: va"23 ga: yham sang myhi" re ta" ra". – Yao: myi: wa AsAng Mo"so ngo tao re se' nae" myid: ru angaid: re wa phaid' ngaui" xeim: we' cinmain" xeim: ngo tao: lo, mae" pe" ga: ba: khae: yu nae". Ce: boe" qao: ada" zo, re re: qhu" nae" mangaid:. Ana" mho: ra" dao: kheim: re re: li" ta" kyo: zai mangaid: ga: dam: ta" ra".24 Ai: myiqe: wa yaug gai zo: re khau myhung mung: Samsun: ga: mang mhang" ra". Ai: zoshao qi" lo mung: AsAng Mo"so:25 min jhaung: qo" the' yu: ra". – AsAng Mo"so: Solo wa Zora vo we' Eshatola mug: kyo: , Dain: boe: mae myhao" qhid: lo: ava".