Tarha" Agyi-11

(SHAO GYANG" JHAM: PAUG' )

切换到福音影视网-新版圣经

  • 1 Gilaid' byu Yephata wa qam: bo: ra" sulhe: ngaid:. Yao: pho" wa Gilaid' , yao: myhi" wa yaug zhang: myhi" ngaid:. –
  • 2 Gilaid' yham sang myhi" khau: ra" zo: qe qi" lo: ra" au: nao wa getau: myiqe: mae" khau myhung: li" ru mung: ngonhaung" nyaug mae" Ma jao khyae magai: khae: yu ga: ta"
  • 3 yang: Yephata re khe' thug' pye' ra". – Ai mae" Yephata wa yao: nhaung: qe mae" phao: thug' yang: Toba mang: mae ye na: ra". Byu vhang: qe yao: mae yeqham mung: yao" thao bocao" ako".
  • 4 Thao re Amon: byu qe wa Israel qe re
  • 5 gye khe' lo: ra". – Ai re" khyo: Amon: byu qe Israel qe re gye khe' lo ko" au: Gilaid' mang: kao qi: va" mo, wa Yephata re Toba mang: mae" khai: jhui: nae" tau: ye: mung: –
  • 6 Ngonhaung" Amon: byu qe re gye khe' nae" tau: , ngonhaung" zug: ajhaung lo: kaid' re:
  • 7 ga: mho: ako". – Yephata wa naonhaung" ngo re gyid' yang: nga" pho" yham mae" khe' thug' ko" mangaid: i"?. Ana" qug: khai: phau" lo gelao" pe" mung: ngo jhao" li" lo ko" ga: Gilaid' mang: byu kao qi: va" ade, qe
  • 8 re ta" ra". – Gilaid' mang: kao qi: va" ade, qe re: ai mung: ngonhaung" nao jhao" ana" li" lo: ru ngaid:. Ngonahung" we' daga" bolo mung: Amon: byu qe re gye bin: khe' lao" Gilaid' mang: byu qe: zug: jhaung kaid' wa,
  • 9 ga: Yephata re dam: ta" ako". – Yephata wa Amon: byu qe re gye khe' nae" tau: naon- haung" ngo re jhui" lo" va" we' dakhyo: AsAng Mo"so: yang yao: bam re nga" lo, mae qhaug' byid' ngaid: re ngo naonhaung" au: she a jhaung kaid' nae" akhang" byid: genae" i"? ga: Gilaid' mang: byu kao qi:
  • 10 va" mo, re tug' myid' ra". – Gilaid' mang: byu kao qi: va" ade, qe wa nao ta" ru we' dakhyo: ngonhaung" makaid' ru dang: re AsAng Mo"so wa nao we' ngonhaung" gyo: tau: sagso: boe" veshao: ga: Yephata re dam:
  • 11 ta" ako". – Ai mae" lao" Yephata wa Gilaid' mang: byu kao qi: va" mo, we' ye: mung: yao: re byu qe au: she zug: jhaung aya: mae nha: ako". Yephata re yao" akhyo alhab' re Mizapa vomo" tau AsAng Mo"so: qhid' kheim: mae tang: to" ra".
  • 12 Thao re Yephata wa Amon: jhaung zug: jhao" logyo: nhao: ke' mung: nao nga" mang: din" li" khe' nae" akhyo ngo we' nao khoru: tin: te' jo; ra" ga: myid: nhao: ke'
  • 13 ra". – Amon: jhaung zug: wa Israel amyu" qe Egutu mae" thug' lo ko" au: nga" mug: myid Anon gyaung: mae" ru Yabug' lao Yodain: qid joe" sho' lhaid' yu: pye' ko" ru mung: ngaid:. Ai: mug: myid re ana" dam: byid: la, ga: Yephata: logyo: re dam: mho:
  • 14 ke' ra". – Xo' yang: Yephata wa Amon: jhaung zug: jhao" logyo: dam: nhao: ke'
  • 15 ra". – Yephata pyang: ke' dao: kheim: wa- Israel qe wa Mo"ba' mug: myid , Amon: mug: myid re lhaid' yu: ru mangaid:. –
  • 16 Israel amyu" qe Egutu mae" lo mung: Edom qid mang: anhae , seyo khyo" su" lhang" lo
  • 17 yang: Kadesha vo joe" vao lo: au: – Edom jhaung zug: jhao" logyo: nhao: ke' mung: jhaung zug: we" ni" mang: khyo" kho' lai: lo" nae" ga: mho' qere: Edom mang: zug: matae" gyo:. Ai we' dakhyo: Mo"ba' jhaung zug: jhao" logyo: nhao: mung: mho' re yao: re: akhang" mabyid' ru mung: Israel qe wa
  • 18 Kadesha vo mae lo" thang: na va". – Ai: thao seyo su" byid: lo yang: Edom: mang: we' Mo"ba' mang: lhang" co' mung: Mo"ba' mang: ba thug' shaid' khyo su" lo" yang: Anon qid lao thoe: te' mae lo" thang: na: bam va". Ai: au: Mo"ba' mang: khug khyo getau mavao. Anon lao wa Mo"ba' mang:
  • 19 kyo dam: ngaid: ra". – Ai mae" Israel amyu" qe wa Amori' amyu" Heshabung jhaung zug: Shihung: jhao" logyo: nhao yang: ngon- haung" na: ra" jao: qo" joe" nae" tau: jhaung zug: ni" mang: khyo" kho' lai: lo" nae" ga:
  • 20 akhang" mho' ra". – Ai qere: Shihung: wa Israel qe re malam" , yao" mang: khyo" kho' lai: lo" nae" akhang" mabyid' ru za: mangaid: , yao" byu qe jhui" zang" qham mung: Yahaid' vo mae gyetab li" zhaug'
  • 21 yang: Israel qe re gye kaid' ko". – Israel amyu" AsAng Mo"so wa Shihung: zug: we' daga" yao" byu alhab' bam re Israel qe: lo, mae qhaug' byid: mung: yao: bam re se' tam" pye' yang: ai: mang: mae na: ra" Amori' byu qe: mug: myid dadae: geim" re sang: yu:
  • 22 pye' veko". – Amori' mug: dadae: geim" re Anon qid lao mae" Yabug' gyaung: joe" sho', seyo mae" ru Yodain: lao joe" sho' sang:
  • 23 yu: pye' veko". – Ai re" khyo: Israel AsAng Mo"so apyaid ato: AsAng Mo"so wa yao" byumyu" Israel qe: qhid' kheim: mae Amori' byu qe re yao: bam: mug: myid: mae" khe' pye' ru angaid: ru zang ana" nao yao: bam
  • 24 re sang nug: i"?. – Ni" mo"so Khemo- sha byid' ra" mug: myid re za: agai: sang: mangaid: i"?. Ai we' dakhyo: ngonhaung" AsAng Mo"so apyaid ato: AsAng Mo"so khe' thug' pye' va" mo, mug: myid re za: ngon-
  • 25 haung" sang: ru angaid:. – Nao wa Mo"ba' jhaung zug: Zipo: zug: yao: zo: Balag' tho' je: kheim: so' qi: yaug ngaid: i"? Yao: wa Israel qe we' gye boe" qu" ra" i"?. Gye se' qu" ra"
  • 26 i"?. – Israel amyu" qe wa Heshabung: vozo: vozang mae re: , Aro vo zo: vozang mae re: , Anon qid lao yae mae jo; ra" vozo: vozang mae re: zin na sam yo zin lam: lam: na va" thao pe" mung: madam: qo" lhaid' sang: yu
  • 27 ko"?. – Nao re ngo matam". Nao gye khe' mung: ngo re pyam" yhin" ra". AsAng Mo"so wa tarha" agyi kaid' mung: Israel amyu" , Amon: amyu" qe: gyo: mae ana" ba tarha"
  • 28 pyam" veshao: ga: pyang: ke' ra". – Ai qere: Yephata pyang: ke' ra" dao: re Amon: jhaung zug: matae" gyo: ngaid: ra".
  • 29 Alao" AsAng Mo"so: Solo wa Yephata adao mae joe" gyo" mung: yao: wa Gilaid' mang: , Manashe: mug: khyo kho' ye: yang: Gilaid' mang: Mizapa vo re lai mung: Amon: byu qe na: ra" khyo jhin" ye" lo" ra". –
  • 30 Yephata wa AsAng Mo"so jhao" AsAng we" Nao dang dang Amon: amyu" qe re nga" lo,
  • 31 mae qhaug' byid' ngaid: re – ngo Amon: byu qe na: ra" jao: mae" yaug yo za: dam: tug' lo: au: ngo re lham: tug: yu nae" tau: nga" yham kham: dung: mae" thug' lo: ra" pe" re ngaid qere: AsAng Mo"so jhao" dang dang qhaug' byid: mung: phaid' ngaui" xeim: qhaug'
  • 32 byid: nae" ga: dao: so: to" ra". – Ai: thao Amon: byu qe re gye khe' nae" tau: to" lo" mung: AsAng Mo"so wa yao: bam re Yephata
  • 33 lo, mae byid: pye' ra". – Ai ru: mung: Aro: vo mae" ru Minaid' vomo" joe" sho' we' , Abelakheyamin vo joe" sho' , vomo" shid' xe re qam: phin: cao" khe' se' tam" pye' ako". Ai re" khyo: Amon: byu qe wa Israel qe: qhid' kheim: mae seim" byaug veko".
  • 34 Yephata wa Mizapa vo yao: na: ra" yham dam: joe" lo: au: yao: zo: myiqe: nau" wa jhe' cang" be, go" nhain" mung: tug nae" tau: thug' lo: ra". Yao: wa bai: te: ngaid: mung: yao: mae" getau zoshao mana lo: . –
  • 35 Yephata wa yao: re myao lao" yao" bau: lao" caid' mung: nga" myiqe: zo: we" nao wa ngo re gyai nyham: khyo" pye' venhaung. Ngo re myid myo: nhao yaug angaid nhaung i"? AsAng Mo"so jhao" ngo baung: to: va". Gai: she: yu nae" akhang" majo; lo: ga: ta" ra". –
  • 36 Myiqe: zo: wa nga" pho" wa AsAng Mo"so jhao" dao: so: to" to: va" re wa baung: to: va" we' dakhyo: ngo mae zaui: so: la, . Pe" mung: ga" re AsAng Mo"so wa nga" pho" gyevo Amon: byu qe mae pho" nhag' lam: gai: yo: byaug nae" tau: qobo byid' ava". –
  • 37 Ai qere: ngo nga" zam" cao: qe we' daga" bam mug: khyo lo" lae" keim" mung: nga" zomyi: abang: re kaug' nhag' yao" ngaid nae" khyo: lho" shid' khye' ngo re nhao la,
  • 38 ga: yao: pho" jhao" mho' ra". – Yao: pho" wa su" lo" se, ga: lho" shid' khye' akhang" byid: mung: nhao: ke' ra". Alao" yao: wa byin cao: qe we' bam mug: yao" zomyi: abang: re nhag' kaug' nhag' yao lo" na: pin" co' ra". –
  • 39 Lho" shid' khye' byang" lao" yao: pho" jhao" dam: tug' lo mung: yao: pho" wa dao: so: to" ru we' dakhyo: zaui: so" ra". Ai: myiqe: wa yaug gai we' mazam" khug shi" su ngaid:. –
  • 40 Ai: thao mae Israel myiqe: qe wa Gilaid' byu Yephata myiqe: zo" mathao zin qug: byid ba kho kaug' myain" kaug' thoe kaid' ca" ra" thung" li boe" byaug: ra".
回到本卷目录 回到本版本目录 回到首页