1 So:deim: ce' nhaid' lam: ein: lam: phung" ke' lao" mug: gaung mae yo, qug dakhyae: kho cae: jhug tag tae" lo" byaug:2 ra". – Ai: thao mae Mo"so: qhid' kheim: mae ye; na ko" ra" mug: logyo: nhaid' yaug re ngo myao: yao: bam re labo" nhaid' lam: byid' to" ra".3 Sheim nae pyo" ra" sag' xau phaid' ngaui" ra" hhang keim ci: ra" mug: logyo: getau dayaug phain nhae mae li" ye; na: ra". La kin qhid' au: mae jo; ra" hhang phain adao mae shao gyang" mo; jhaung: mho' kheim: we' daga" ngha" hab' ngaui" nae"4 sag' xau myo: sho' yao: re byid' to" ra". – Ai mung: shao gyang" ra" mo; jhaung: mho' thoe we' daga" thug' li" ra" sag' xau myi: khug' wa mug: logyo" lo, mae" Mo"so jhao"5 do, lo" ra". – Mug: logyo: ai: yaug wa sag' xau ngha" hab' ra" keim re yu yang: phain mae" myi: re ke' pyang" mung: myid gaung: dao khyo pye' khyo" ke' lao" mug: dam: thoe lhe' caid' caid' mung: myid lab: lab' li" ra".6 Ai: thoe re mug: logyo: nhaid' yaug wa labo" nhaid' lam: re ci yang: maid nae" seim" na: ako".7 Sao qhid' re" yaug wa labo" re maid: myhang" ke' ra". Aiyao: jao" sa: we' lhau: lhag' to" lag qu we' myi: wa myid gaung khyo qu: gyo" lo" ra". Myid gaung sam bam mae" dabam sag' gae sam bam mae" dabam we' mhin: nyug alhab' nga" lo" byaug: ra".8 Shid' ein: ra" mug: logyo: wa yao" labo" re dam: maid: myhang" ke' lao" myi: shae vin vin ga: de; na: ra" bam mo" dabam re qid mang: dae khyo pye' zaui: ke' ru qhug' ra". Qid mang: dae sam bam mae" dabam9 sa: boe" byaug: ra". – Ai lao" qid mang: dae mae daui: na: ra" ja: cao jab sam bam mae" dabam shid: lo" ru we' qid lha jham sam bam mae" dabam byo; qeim: lo" byaug:10 ako". – Sam ein: ra" mug: logyo: wa yao" labo" re maid: ke' ra" au: myi: dam we' dakhyo: myi: shae de; ra" kyi qi: dace' wa mug: gaung mae" byid: gyo" li" mung: qid gyaung: sam bam mae" dabam mae we' qid thug' jham mae gyo" lo" ra".11 Ai: kyi: mang wa khin cid' vho' ngaid: . Qid sam bam mae" dabam wa qid kho: khin cid' boe" byaug mung: ai: qid shaug' ra" byu myo: sho' mo, shid: lo" ako".12 Byid yaug ein: yaug labo" dam: maid: ke' lao" Ba khye' re: sam bam mae" dabam Lho" mo" re: sam bam mae" dabam kyi sam bam mae" dabam wa byo; qeim: lo" mung: yao: bam: bo" bao sam bam mae" dabam sham: lo" yang: , na" sam bam mae" dabam we' myi" sam bam mae" dabam mae bo" bao majo, lo: caid' byaug: ra".13 Ai: thao ngo qu" ke' re zeim baung: dadau: wa gyai myhao: ra" mug: le; phyo: mae dao" lhang: qin" mung: thoe mo" ke' mung: ai: mug: logyo: sam yaug maid nae" ga: seim" na ko" ra" labo" jham: thoe thug' li" lao" myid gaung dao mae na: ra" Sosu byu qe wa byuxa: vo:qoe, byuxa: vo:qoe, , byuxa: vo:qoe, lo" genae" lhe" ga: thoe mo" ke' yang: zag: hug' ke' ra" dao: kheim: re ngo the' gyo".