1 Mug: logyo: wa Mo"so we' Yao nau" la kin tao" mae" yug: thug' li" ra" kao so' qid shao gyaung: dagyaung: ngo re qhu" ra".2 Vomo" gaung: mae" khyo cao" yang: we' qid gyaung: thoete' ce:te' cao" yang: re: kao so' gae jham yaug: bam: ako". Ai kao so' gae mae ashi: daxe: shid' ja: zaui" ra". Lho" dakhye' mae dayam" yam" zaui" ra". Ai: afo' jham wa byumyu" khao: ngo" re no3 pho: gai nae" mocid' jham ngaid: . – Thao da lhang nhang: kheim: majo, lo: nae". Mo"so we' yao nau" la kin za: ajo, lo: nae". Mo"so: jeim qe wa Mo"so re caung da"4 na: li" genae". – Yao: bam wa yao" myo, khung: re myao: na genae". Yao: bam:nga: lao: mae re: yao" mang tung" te' to: byid'5 li" nae". – Ai: vomo" mae myi" re: majo, lo: , myi: bao maca" lo: , ba mae" abao re: maca" lonae". Pe" mung: ga" re Mo"so wa yao: bam: bo" bao ngaid nae" yao: bam wa mug: myid: aqae: qae: mae ana: na: jo; li" genae".6 Mug: logyo: wa ce: dao: jham wa dang main" ru ngaid mung: lam ga" ra" dao: jham ngaid: ra". Lapa qe re yao" solo jaung" byid' ra" Mo"so wa mataung" myao" re boe" li" nae" akhyo jham re qhu" byid: nae" tau: yao" mug: logyo: re nhao: ke' ava" ga:7 ta" ra". – Qu" ge, ngo wa mamyao" re joe" li" nae" ngaid: .Ce:tung" paug' mae bo: ra" Lapa qe: dao: re gyo: yang: cao" ra" yaug wa nga: lho" ko" ra" ga: ta" ra".8 Ngo Yohan wa ce: gu: alhab' re the' myao yaug we' the' gyo: yaug ngaid: . Ngo wa ai jham re bin: myao bin: gyo: thao mae ngo re ai jham qhu" byid' ra" mug: logyo: re goe; pa" nae" tau: gam" goe; lo"9 re – Mug: logyo: re: ai: ru: dakaid' ngo wa ni" mau" vin byin cao: za: angaid: . Ni" mao: nhaung: Lapa qe: tau: we' tung" paug' mae" dao: kheim: jham re lhaug' zaung" ra" mo; mau" vin cao: re: ngaid: . Mo"so re goe; pa" wa, ga: ta" ra".10 Ai mung: tung" paug' mae bo: ra" pa dao: jham re so: xam: date'. Khoru: mung: ga" re ayo, akhin: wa joe" li" na va". –11 Madang main: yaug re: madang main" ru mae na: na shi: shao: . Shaogyang" yaug re: shao gyang" na shao: . Pang lhag' yaug re: pang lhag' na shi: shao: . Dang main: yaug re: dang main: khyo" na shi: shao: . –12 Ngo wa hin hin zo: joe" li" lo nae". Ngo wa byu yaug khao: ngo" re yao: yaug yao" mau" zo" we' dakhyo: aphug' jham re byid:13 nae". – Ngo wa Alpha re: ngaid: Omega re: ngaid: . Aqhid re: athao re: , gin qhid' she yaug we' gin thao zang" yaug re: ngaid: . –14 Yao" khang" dao: re cao" pyang" ra" yaug wa nga: lho" ra". Ai: yaug wa kao so' gae re myao nae" akhang" qo" mung: vomo" khug khyo kham: mo" dung: khyo" vao15 lo" akhang" qo" nae". – Ngaid qere: vomo" taung gaung shaid' mae wa Lakha: byu qe, boe, phyid' mo, , phavae mau" mae mhin shab' mo, , byu se' mo, , alho re goe; pa" mhug' vhain" mo, ngaui hhang re cao" mhug' zo" qin" mo, na: bam ko" ra".16 Ngo Yesu wa phung: qe: tau: mae naonhaung" re ce: gu: ta" hau" kyo: nae" nga" mug: logyo: re nhao: ke' va". Ngo wa Davi kaung mae" myhung: li" yaug ngaid: .Ngo wa bao: ra" bo" myhung kyi qi: ngaid: .17 Solo we' myhi" sag' wa li" wa, ga: ta" ako". Ce:ru re the' gyo: yaug khag' re: lo wa, ga: ta" veshao: .Qid shab' yaug wa li" veshao: . Aimung: o: ra" yaug re: aphug' mabyid: lo: kao so' qid re khae: yu veshao: .18 Ce: tung" paug' mae" pa dao: re gyo" ra" mo, alhab' re ngo ta" peim: nug: ru wa dayaug yaug ce: dao: jham mae laung" ke' yang: ngaid: re ce: tung" paug' mae bo: ra" nho" mo" jham re yao" dao mae qobo dae19 phau: nae". – Dayaug yaug ce: lapa dao: jham mae" daja: ja: re phoe' phyid' pye' yang: ngaid: re ce: tung" paug' mae tung" to" ra" kao so' shi: gae rere: shao gyang" ra" vomo" re re: ai we' tin" ra" ja: jham rere:20 Mo"so wa qab: yu: li" nae". – Ce: gu: re ta" shid' kyo" ra:" yaug wa ngaid va". Gai gai: yao: ngo wa phyaid za: joe" li nae" dang dang ngaid: ga: ta" ra". Airu: boe" veshao: AsAng Yesu we" gyo" lo wa, ga: tug: yu: ako". Amen.21 AsAng Yesu Khristu; agyid aso wa naonhaung" alhab' mo; adao mae ajo; jo, veshao: wo". Amen