1 Ceru wa Khristu yang qhu" shid' ra" akhyo ngaid: . Airu: mung: ce: gu: wa ana" khomyhao" mamyao" re boe" li" nae" akhyo jham re Khristu wa yao" jeim qere ta" kyo" to" ru ngaid: .Cere Mo"so wa yao: re qhaug' byid' to" ru ngaid: ra". Yao: wa yao" mug: logyo: re nhao: ke' yang: yao" jeim Yohan re li" ba nhao: ru ngaid: ra". –2 Aimung: Yohan wa myao: ra" gu: alhab' geim" re tung" to" ra". Ce jham wa Mo"so: mung dao: ngaid: rure Khristu: yang yao: re qhu" byid' ra" sagso: dao: jham ngaid: .3 Ayo, aban: wa jhao" li" na va". Lapa dao: cegu: re qhug' nghe' ra" yaug kam" wa nga: lho" shao: . Ai: mho: to" va" gu: re yao: bam wa phug' te' mung: yao: re tae" gyo: ko" ngaid: re yao: bam ngaui bau: genae".4 Asia mang: mae" phung: nhaid' phung: khyo Yohan pyang dao: tung" ke" ra". Lai: lo" va" ta , ana" ta , joe" lo: nae" ta mae thain" madaui na: na: ra" Mo"so mae" re: yao" lakin tao" qhid' au: mae na: na5 ko" ra" solo nhaid' yaug mae" re: – Dang jhaug' ra" sagso: re ngaid: ra". Shid: ra" mo, mae" zoqhid' ngaid: ra" myid kin dao mae" zug: qe: gu: mae" jhaung zug: re: ngaid: ra" Khristu: jhaung: xe: we' agyid aso wa naonhaung" we' daga" ngaid veshao: wo". Yao: wa nyhao: nhaung" re jhid' de, yang: yao: yao" sa: sheim qhug' ra" khyo" yang nyhao:nhaung" qobo jham re cid' shao6 byid' mung: – Yao: pho" Mo"so re caung da" byid: nae" mang: din" jhaung zug: kaid' nae" re: khin jaung re: nyhao:nhaung" re poe" yu: ra" Khristu Yesu mae phung bao we' qam: so' apyaid ato jo; jo, veshao: wo". Amen.7 Qu" ge, yao: wa jham phyu thaui: we' joe" li" nae". AsAng re thug' se' mo, bobo mung: yaug khao: ngo" wa yao: re the' myao: li" genae". Mug: myid dao mae" byumyu" alhab' wa yao" mathao mae nhag' kaug' myo, yug: li" genae". Airu: boe" li" veshao: . Amen.8 Ngo wa Alpha: re: ngaid: O:Mega' re: ngaid: , aqhid we' athao" re: ngaid: . Lai: lo" va" ta , ana" ta , joe" lo nae" ta mae re: ban: aqae: qae: mae na: na nae" ra" qam: mo" bo: apyaid ato: Mo"so mho: ra".9 Ngo wa yao" mang: din" byu qe phau: ko" ra" qug: khai: kyi" khyag' rure zang: qhao" ru mae Yesu thao cao" yaug khyo" naonhaung" we' daga" bo: phau: yaug naonhaung" mao: nhaung: pho" Yohan ngaid: .Ngo wa Mo"so: mung dao: we' Yesu Khristu: sagso: kham: ra" mathao: yang Paid' Mu: gogyo: kao" mae dai" nha: to:10 qhug' ra" au: . – AsAng: ba na mae solo wa ngo mae vao: jaung" mung: labo" thoe we' dau: ra" thoe qi: re nga" nhaung thao" mae11 ngo the' gyo" ke'. – Ai: thoe wa nao myao: ra" gu: re tung" mung: Asia mang: mae" Ephesu , Samura , Pergamu , Thuatiya' , Sadi , Philadephiya' , Lodoki' Ce:phung: nhaid' lam: khyo vhin: ke' wa, ga: ta" ra". –12 Ngo re jhau: na: yaug khag' ngaid: ru qu" nae" tau: ngo lhang: qu" ke' re hhang myi:13 baung: nhaid' lam: we' – Ai: myi: baung: agaung: mae Byu: Yao: Zo: we' dau: ra" byu dayaug re ngo the' myao: . Ai: yaug wa khupain joe" sho' bau: qhang ve; ci mung: qao gao mae hhang pye: we' hhang phyid'14 cui: cui" ci: ra". – Yao" au: mae" xae wa sug' ru" ru gyu: ru: phyu: ra". Myo, jid' wa15 myi: shae we' dau: ra". – Yao" khyid wa kyang" pye' va" gyid: bo" we' dau: ra". yao" thoe re: coe: gyo" thoe we' dakhyo: ngaid:16 ra". – Yao" lo, mae kyi nhaid' ce' zaui" ci mung: yao" nhaid' mae" shid' shaid' geim" tho' ra" shae dakhyae: thug' li" ra".Yao" myo, khung: wa bao qam: qi" yang bao: ra"17 ba we' dau: ra". – Ngo wa ai: yaug re myao lao" jao" ashid ru" ru yao" khyid qao: mae lang" goe; lo" re yao: wa nga" adao mae lo, yo lo, li" kai: mung: dagyaug ngo wa aqhid18 we' athao" ngaid: ga: mho: ra". – Ngo wa daui: na yaug ngaid: ngo wa aqhid shid va" yaug ngaid: . Qu" wa, ngo wa apyaid ato gyag maqui: lo: za: na: na yaug ngaid: ra". Gai gai: yao: dang dang daui: na yaug ngaid: . Aimung: ngo wa shid: ru re we'19 movo: mug: re ug yaug ngaid: ra". – Airu: mung: nao myao: ra" ja: jham rere: ana" jo; ra" ja: jham we' boe" li" nae" ja: jham20 alhab' akhyo re tung" to: wa, – Nga" lo, yo lo, mae nao myao: ra" kyi nhaid' ce' hhang myi: tao" nhaid' lam" lase" re tung" to: wa, myi: tao" nhaid' lam: wa phung: nhaid' phung: ngaid: , kyi nhaid' ce' wa ai: phung: nhaid' phung: re gug: gam nae" mug: logyo: jham ngaid: ako".