1 Ai: thao gyang: yao: ru" ru je: jid: gae dakhyaung: ngo re byid: mung: ta" ru wa to" wa, pa" jhaung: yham we' phain re ye: ka" wa, amung: pa" jhaung: yham mae pa"2 caung" na mo, re ye: nghe' wa, . – Ngaid qere: ai: pa" jhaung: yham vang" qae: to" ru daka" tang" to: wa, pe" mung: ga" re ai: vang" qae kam" wa labug: byumyu" qe: tau: jaung: to" ru ngaid: ra". yao: bam wa shao gyang" ra" vomo" re lho" mo" byid xe: shid' khye' lam: lam: zab: nhae" pye' li" genae". –3 Jid: mo" mai bau: ve; ra" nga" sagso: shid' yaug re ngo nhao: ke' nae".Yao: shid' zo: wa ba na dataung: shid' yo: khyaug' xe4 ba: gu: mae lapa pa genae". – Ai tao wa mug: myid: AsAng: qhid' kheim: mae jo; ra" Zhainlun shid' gae we' myi: dam shid'5 lam: ngaid: ra". – Kho khoru: byu dayaug wa yao: tao re dae te' nae" seim" mo, re yao: tao: nhaid' mae" myi: shae thug' li" mung: yao: tao: gyevo re myug: pye' li" genae". Yao: tao re yhin" nug mo, wa shid:6 ru qhug' li" genae". – Ce shid' tao lapa pa: qin" ko" ra" ayo, gu: mae mug: maqu nae" tau: mug: gaung re pyid' to: nae" akhang" , qid gyaung: qid baug: jham mae" qid re sa: boe" nhao nae" akhang" qo" ako".Yao: tao nug: au: myid: gaung: dao mae qam" aja: ja: gyo" nhao nae" kheim: so' re: qo" ako". –7 Yao: tao sagso: bin: kham: gelao" myid sao: dung: mae" thug' li" ra" gug' nyhug' zoqhid wa yao: tao re li" khaid' aung yang: se' pye'8 mung: – yao: tao: mao gaung wa yao: tao: AsAng re pyao: mae be; jin" se' mung: ave, aso: khyo" mhang" to" ra" Sodom: mangaid: lao" Egutu vomo" mae" hau" mo" khyodang9 mae lhang" to" li" genae". – Mang: din" khao: ngo" mae" byumyu" cao jab akaung aboe: alhab' we' myain" cao jab jhau: ra" mo, ajham ataung qe wa yao: tao: mao gaung re mashaung lo: tam" to: mung: sam10 ba: dakhyug' the' myao: na genae". – Myid kin byu qe wa ai tao shid: ru: yang ngaui bau: mung: yao: cao: jhaung qhu" jho" byid' li" nae". Pe" mung: ga" re ai: lapa shid' yaug wa lai: lo" va" ayo, mae Sosu byu qe re qug: khai: myo: sho' boe" nhao geyang:11 ngaid: ra". – Ai:thao sam ba: dakhyug' lai: lo" lao" Mo"so mae" kao so' Solo wa yao: shid' yaug: akhug khyo joe" vao li" mung: to" ye; li" ra". Ailao" myao: ra" mo, wa gyai12 gyaug: nin" din: pye' ako". – Ai: lapa shid' yaug re cekhyo do, lo geri: ga: mug: gaung mae" thoe mo" we' khai: ru re ai bam the' gyo" ako". Yao: shid' tao: gyevo qe zhaug' qu" na: bam shi" ko" au: yao: tao wa jham thaui: khyo" mug: gaung khyo do, lo" ko"13 ru re cao" myao: ke' ako". – Ai:au: mae yao: myid lab: mo" lab' li" mung: vokham" daxe bam mae" dabam byo; gyo" pye' ra". Ai: myid lab: mae byu nhaid' taung shid' qhug' veko". Na: dang: ra" mo, wa gyaug: din: pye' gemung: mug: gaung mae" Mo"so re caung: khin" ako".14 Shid' ein: ra" qug: khai: mo" lai: lo" lao" sam ein: ra" qug: khai: kyi" khyag' wa phyaid za: dam:joe" li" nae".15 Nhaid' yaug ein: yaug mug: logyo: wa labo" re maid: ke' ra" ce: myid kin dao mae" mang: din" jham wa nyhao: nhaung" AsAng ngaid: ra" Khristu mang: din" boe" lo va". Yao: wa pyaid da du ug: na naeva" ga::16 mug: gaung mae" thoe thug' li" ra". – Ai mung: Mo"so: qhid' kheim: yao: bam yao" la kin mae zaung: na ko" ra" lau: de, shid' xe: byid yaug wa goe; gam" yang: Mo"so re goe; pa" zo" re".17 Lai: lo" va" ta , Ana" ta , joe" lo nae" ta mae phung bao qam: o: we' na: na nae" AsAng ngaid: ra" Mo"so we" nao wa kheim: so' mo" yang zug' na yaug ngaid mung: ngonhaung" wa Mo"so re jeju so" na: bam:18 ra". – Byumyu" qe wa nhag' yo: gemung: Mo"so re: nhag' gyid' nae" ayo, joe" li" va". Shid va" mo, re dao: phyid' mung: AsAng: jeim qe ngaid: ra" lapa qe we' shao gyang" ra" mo, Ni" mang re gyaug phug' ko" ra" mo, , aqi: angai qe re jhaung qhu" byid: nae" ayo, we' myid kin re phyo' qheim" pye' nae" ayo, wa joe" li" va" wo" ga: ceim"19 caung: khin" ako". – Mug: gaung mae" Mo"so: jhaung: yham re phung" to: mung: ai: jhaung: yham khug mae" dao: thang" bain" re the' myao: . Ai: thao lhe' caid' caid' mung: mug: dam: thoe we' daga" myid lab: lab' li" yang: lagqu myo: sho' gyo" li" ru re the' myao: .