1 Jhaung: yham mae" thoe mo" wa ye" lo" ge, Mo"so nhag' gyid' ru bo: ra" keim nhaid' lam: re myid gaung khyo vhe' khyo" ke' ge, ga: mug: logyo: nhaid' yaug ta" thoe ngo the' gyo".2 Sao qhid' re" mug: logyo: wa thug' ye: yang: yao" keim re vhe' khyo" ke' ra". Zoqhid: so: deim: de; ra" mo, we' aire goe; pa" ra" mo; adao mae qu" gyaug qu" lhaung sho' no: ra" byang jham to" li" ako".3 Shid' ein: ra" mug: logyo: wa yao" keim re qid dae khyo vhe' khyo" ke' ra".Ailao" qid mang: dae wa byu shid sa: ru: doe; li" ra". Qid mang: dae mae za: ana: gu: alhab' shid: byaug: ako".4 Sam ein: ra" mug: logyo: yao" keim re qid zang qid' thug' jham mae vhe' sheim" ke' lao" ai: gu: alhab' wa sa: boe" lo" byaug: ra".5 Mug: logyo: wa lai: lo" va" ta , ana" ta , joe" lo nae" ta mae na: na: ra" shao gyang" AsAng we" nao ce: khyo: dao: phyid' ru wa6 jo main: ra". – Khoru: mung: ga" re yao: bam wa lapa qe we' shao gyang" ra" mo, re sa: sheim: gyo" nhao mo, ngaid mung: nao wa yao: bam re sa: byid: jhaug' ava" ga: ta"7 dao: re ngo the' gyo" ke'. – Ai: phain mae" thoe dathoe wa qam: mo" bo: ra" AsAng Mo"so we" nao dao: phyid' ru wa dang jhaug' yang: jo main: ra" wo" ga: ta" ke' ra" thoe re ngo the' gyo".8 Byid ein: yaug: mug: logyo: wa yao" keim re Ba mo" khye' dao mae vhe' gyain" ke' ra". Ailao" ba wa Sosu byu qere myi:9 ngha" nae" qam: bo: lo: ako". – Saung" laung mung: Sosu byu qe wa nga" gyaid: ru qhug' mung: ai: nho" mo" jham re boe" nhao: ra" Mo"so: mang re nhang: myain" nhang" thoe ta" ako". Mo"so re caung: khin" nae" nhag' lam: malhang: phaug' lo ko" ngaid: ra".10 Ngo" ein: ra" yaug mug: logyo: wa yao" keim re ai: zoqhid: la kin dao khyo vhe' khyo" ke' ra". Yao" mang: din" wa no, tang: lang" caid' lo" byaug mung: mang: byu qe wa khai" no geyang: yao: bam: sho11 re bin" zag: ci: ako". – Yao: bam dae no: ru we' byang myaug: ra" dae mathao mae Mo"so re nhang" ako". Ngaid qere: yao: bam: magai: ra" ave, re matha" lhag' lo ko" ngaid: ra".12 Khyaug' yaug ein: ra" mug: logyo: wa yao" keim re Uphared" qid gyaung: mae vhe' zaui: ke' re ai: qid gyaung: wa kin" lo" pye' ra". Ai wa ba thug' shaid' mae" joe" li" nae" jhaung zug: qe tau: su: khyo nyhang"13 to: byid' ru ngaid: ra". – Ai: thao solo zo: alhaung sam yaug wa po: haung ru"ru thug' li" ko" ru re ngo myao: ke'. Dadau: wa maojaung" nhaid' mae" , dadau: wa Zoqhid: nhaid' mae" dam: dadau: wa lapa lho yhe' ra" yaug; nhaid' mae" byae: thug'14 li" ako". – Ai jham wa mug' pho: mau" zo" kaid' qhu" qin" ko" ra" yui jham ngaid: ako". Yao: bam wa myid kin geim" mae" jhaung zug: qe we' myid gye, geim" mae" Sosu byu qe jhao" ye: mung: qam: mo" bo: ra" Mo"so: ba na re gye kaid' nae" ga:15 khyui: zhang" na: ako". – Qu" ge, ngo wa khug' byu re"ru: thug' li" lo nae". Yao: bam wa gaung lam: sho: pyaid' su" qin" yang: su: qhid' kheim: mae qho' maphau: nae" tau: mae" mai bau: ve; ci yang: lhaug' lao" zaung" na ko" mo, wa nga: lho" ako" ga:16 mho: ra". – Hebre" myain" khyo" Amage- don: ga: mang: ra" jo, qo mae khai: jhui" zang" to" ako".17 Nhaid' ein: ra" mug: logyo: wa yao" keim re mug: le; phyo: mae vhe' tao" ke' ra". Ailao" mug: gaung: jhaung: yham mae jo; ra" la kin mae" thoe mo" dathoe18 wa bin va" wo" ga: mho: ke' ako". – Lhe' caid' caid' ru , mug: myang: ru , mug: dam: dam" ru , myid lab: qi: re: lab' ra". Myid gaung dao mae byu na: qhid: ra" ayo, mae" ana" joe" sho' gyo: mae dalhang re:19 ceqhi" ra" myid lab: malab' qu" shi: . – Qi" qhang: ra" vomo" wa sam gao go; sin" lo" byaug: ra". Mang: khao: mang: ngo" mae" vogaung: mo" jham re: byo; qeim: lo" byaug: ako". Mo"so wa nhag' mo" gyid' ra" sabyi' yhid qang: keim re Babilon: vomo" re byid: jhaug' nae" myid: beim" ra".20 Gogyo: kao" we' bam jham alhab'21 byaug: lo" byaug va". – Lag qu mo" jham wa mug: gaung mae" byu jham: dao mae qu: zag byid' ra". Byu qe wa qu" gyaug sho' ra" lag qu nho" mo" gyo" ra" mathao mae Mo"so re nhang: myain" nhang: thoe mung: ako".