1 Ai: thao ngo qu" ke' re yao nau" wa Ziun: bam dao mae ye; jo; ru re ngo myao: . Yao" mang we' yao: pho" mang re yao: bam: nga: lao: mae tung" te' to" ra" datid: byid tug: byid taung yaug wa yao:2 we' daga" za: na: bam: ako". – Qid dae myang thoe mug: gyug: gyug: thoe re"ru: tang: pag' yaug dayaug tang: pag' thoe ru: ga"ru mug: gaung mae" thoe re ngo the'3 gyo" ke'. – Yao: bam la kin: qhid' kheim: lau: de, qe we' gug' nyhug' byid dau" qhid' kheim: mae nghaui" thoe asag' daja: re nghaui" na: ako". Ai: khyin: yu qhug' ra" byu datid: byid tug: byid taung mae" je yang: nghaui" thoe asag' re khoyaug lao"4 maqo" mho" xeim: yu ngaid: ako". – Yao: bam wa myiqe: qe we' pang lhag' maqhug' ra" mo, zomyi: agyang" qe ru" ra" zolau: qe ngaid: ako".Yao: bam yao nau" khai: ye: khai: cao" qin" mo, ngaid: ako". Byu: khug mae" khyin: thug' yu: ra" Mo"so we' yao nau" tau: sao qhid' re" ashi: jham re: ngaid:5 ako". – Yao: bam wa khonhae" mhug' vhain" dao: mata" qu" mo, qobo vhin nae" khyo mabo mo, ngaid: ako".6 Myid kin dao mae na: bam ko" ra" byumyu" cao jab akaung aboe: cao jab qe we' myain" aja: ja: jhau ko" ra" byu alhab' geim" re apyaid ato: ngaui bau: lau dao: cao" hau" qin" ra" mug: logyo: dayaug wa –7 Mo"so re gyaug phug' na ge, yao: re caung: khin" ge, khoru: mung: ga" re dao: phyid' nae" ayo, wa joe" li" na: ava". Mug: gaung myid gaung qid zo: qid zang we' qid mang: dae re phain: to" ra" Mo"so re goe; pa" ge, ga: thoe mo" phin: yang: hug' mung: mug: le; phyo: mae dao" lhang" qin" ra" mug: logyo: re ngo the' myao: ra".8 Mug: logyo: dayaug wa Babilon: vomo" re: byo; qeim: lo" va". Pe" mung: ga" re yao" phavae mau" mae ngae: ra" khin cid' myo: no; we' dau: ra" yhid re mang: din" geim" mae shaug' nhao: ra". Ai: gu" yang Mo"so re nhag' gyid' nhao: ra" ga: mho: ra".9 Ai mae" getau sam yaug ein: ra" mug: logyo: wa sao qhid' yaug: thao cao" mung: thoe mo" we' zoqhid we' yao" alho re goe; pa" mung: yao" nga: lao: mae mangaid: lao" lo, mae so: deim: khae: yu: ra" yaug10 wa – Mo"so: nhag' gyid' ra" keim mae vhe' zaui: to" ra" sabyi' yhid agyang" re qhug' shaug' li" nae". Ceru: kaid' ra" yaug wa shao gyang" ra" mug: logyo: qe we' yao nau" qhid' kheim: mae fang we' lhag' to"11 ra" myi: mae yhin" ru qhug' nae". – Ai: yhin" ra" myi: khyeim" myi: khug' wa apyaid ato ngaid: na nae". Zoqhid we' yao" alho re goe; pa" mung: yao" mang aso: de, mo, wa myi" na" mamyain: makhyaid' boe" yang: na myain yaug mayo genae". –12 Mo"so: khang" dao: rere: Khristu lam jang" ru rere: cao" pyang" ra" shaogyang" mo, wa qo" zang: qhao" nae" akhyo bo: ra" ga: thoe mo" we' zag: hug' qin" ra".13 Ai: thao mug: gaung mae" thoe wa ana" mae" thao phyao: AsAng mae shid: lo" ra" mo, wa nga: lho" ako" ein: tung" to: wa, ga: ta" thoe re ngo the' gyo". Solo re: ngaid va" wo" yao: bam wa yao: bam: mau" zo" mae dug no" li" genae". Pe" mung: ga: re yao: bam: lo, mau" aphug' wa yao: bam we' daga" ngaid: ra" ga: mho: ra".14 Ngo dam: qu" ke' re jham phyu thaui: dathaui: re myao: . Ai: jham phyu thaui: mae Byu: yao: zo: we' dau: ra" byu dayaug zaung: na: ra". Yao" au: mae hhang dain zi maug zhaung" ci mung: yao" lo, mae15 tho' ra" lagam: zhab' ci: ra". – Mug: logyo: dayaug pa" jhaung: yham mae" thug' li" mung: myidkin dao mae" qhovo: qhoshi: re jham" yu yo, joe" va". Airu: mung: nao wa yaid: yu nae" ayo, ngaid va". Ni" lagam: re yheim" ke' yang: yaid: yu wa, se, ga: jham thaui: mae zaung: na: ra" yaug re thoe mo"16 ke' mung: hug' ta" ke' ra". – Jham thaui: mae zaung: na yaug wa yao" lagam: re qang: ke' mung: myidkin wa yaid: yu: ru qhug' va".17 Ai: thao mae mug: gaung mae jo; ra" pa" jhaung: yham mae" lagam: ci yang:18 mug: logyo: dayaug re: thug' li" ra". – Myi: ug: ra" mug: logyo: dayaug wa phain khug mae" thug' li" yang:ai: tho' ra" lagam: qo" ra" yaug re myid kin: dao khyo ni" lagam: re qang: ke' mung: myid kin: dao mae" sabyi' shi: pau: jham phyo' zhang" yu wa, pe" mung: ga" re sabyi' shi: poe jham wa19 mhang" ne: jo; ava" ga: ta" ra". – Mug: Logyo: wa lagam: re myid kin dao khyo qang: ke' mung: sabyi' shi: jham re xe" yu yang: Mo"so nhag' yo" ra" sabyi' shi: pyag'20 jao: khyo pye' zaui: ke' ra". – Sabyi' shi: jham wa vomo" yae mae" ashi: pyag' thang" mae nao" pyag' ce' ru qhug' ako". Sabyi' pyag' thang" mae" sa: qang: yug: thug' li" ru wa myao" nhaid' joe" dang mung: khyo shid' yo dain: kho qhang mung: no, phyao: daye, kho no; ra".