1 Saoqhid' mae" dao: thang" re cao" pyang" nae" tau: pa" caung" li we' byu: yang kaid' ra" pa" caung: nae" seim zaung jo;2 ra". – Pa" jhaung seim zaung mae Haja ga" saoqhid' qe, wa shaogyang" qe, ga: mang: ra". Ai: qe, mae gai" , myi: te' zang we'3 qhu" to" ra" cinmain" yho' jo; ra". – Shid' qe, ein: ra" qe, kyo re pin: lung: lao" khao" to" ra" nhaung thao" mae shaogyang" thao" ra" qe, Ha: jung: Ha: ja: ga: mhang" ako". –4 Ce: qe, ein: mae sag' xau meim sheim ngha" ngaui" ra" hhang khug' we' hhang: yang thab' pye' ra" dao: thang" bain" jo; ra" ug' pye: shid' pye:. Mana' cinmain" yho' ke' to" ra" hhang ug' we' abu" bu" ra" Arun" zaung: bao" we' khang" dao: laug pye: bo:5 ra". – Ai: bain" dao mae phung bao bo: ra" Kherubim: alho shid' lam: wa qobo khyaid' la kin re nghoe' gam: ci: ru jo; ra". Ana" cegu: alhab' geim" akhyo re jid' jid' naug naug daja" thao daja: re matho' ta" sho' na: lo:.6 Ai: gu: re bin: seim" nyhang" jaung: to: lao" khin jaung qe wa yao: bam: pa" kug: ra" mau" zaui: so: nae" tau: ba khao: ngo" seim zaung saoqhid' qe, khyo vao ye"7 ako". – Ngaid qere: shid' qe, ein: ra" kug qe, akhug khyo dazin re dalhang za: khin jaung yin" wa yao" qobo we' volo byu qe mabeim: maso: shaid' nghung" ra" qobo: tau: mae" sa: ci: vao mung: kug' ngaui"8 byid' ra". – Sao qhid' mae" seim zaung ajo; jo, wa shao gyang" thao" ra" kug qe, khyo vao nae" khyo mabung" rure shaogyang" Solo wa de: de: za: myhao" byid' ava". –9 Sao qhid' qe, ein: ra" kug qe, wa ana" ce: ayo, abain: sag' adau tau" qhu" ru ngaid: ra". Ce: qe, mae jhaung qhu" xeim: dau: jham re kug' ngaui" ru angaid yang: re: qhaug' ngaui" ra" yaug: aung lag: myid re nhag' dag taung" maqo" jab byang" byid:. –10 Ai: gu: wa zo: nam shaug' pho: we' aja: ja: cid' shao: ra" akhyao aja: ja: re asag' dam: kaid' ra" ayo, majoe" shi" au: lhau" de" to" ru za: angaid:.11 Ana" Khristu wa ce: seim zaung re" ru: byu: lo, yang kaid: yu: ra" yham ma ngaid:. Je: gai je: jab byang" ru joe" li" nae" kug qe; khin jaung yin" re" ru: li" lo: ru ngaid: ra". –12 Yesu wa shao gyang" thao" ra" jo, qo khyo dalhang mae za: bin kyab' sho' vao ye" au: xeim: ngaui" byid: nae" tau: caid' be, sa: nung: jaung sa: re ci yang: ma vao ye: yao" sa: ci yang: vao ye: mung: nyhao: nhaung" tau: mae" apyaid ato: khyaid' yu: ru qo"13 byid' ra". – Khoru: mung: ga" re Nung: jaung sa: , Caid' be, sa: we' mung: nung: mo" nau" myi: mhab: yang mashao gyang" ra" mo; adao mae vhe' phyu: yang: gaung14 sho: kyang" byid' ru dang: re wa – Aitho' mae" qobo made; AsAng: gaung khyao re qam: mo" bo: solo khyo" yang qhaug' xeim: boe" va" khristu; sa: yaung" yang shid nae" gau: mae" lhoe' yu mung: kao daui: na: Mo"so jhao" qhaug' byid' ke' ra" khyo" mung: aung khug nhag' lam: re je: qo" shao kyang" pye' byid: nae" mangaid:15 i"?. – Airu: mung: saoqhid' ra" dao: thang" ayo, mae shaid' nghung" ra" qobo jham re lhoe' ke' nae" tau: Khristu wa shid qhug' va" ru mung: khai: to: qhug' va" mo, wa dao: thang" Ma re qo" khae: yu genae" tau: ai: AsAng wa dao: thang" Ama' kham: yaug16 boe" lo va". – Ma khae: yu nae" tau: agu byid: yang: dao: so: tung" yaug wa dao: so: tung" khye' dang va" ngaid: re wa dao: so:17 to" ra" yaug wa dang dang shid ca". – Kho khoru: mashid ngaid: re ai: dao: so: tung" khye' wa madang ngaid: ra". Shid lao" za: agai: dang: ra".18 Airu: mung: saoqhid' re" dao: thang" lao" re: sa: re ci: ra" khyo" yang za: jao19 dang boe" ra". – Moshe wa khang" dao: tarha" re volo byu qere bin: ta" kyo: mung: qid we' lhag' ra" nung: jaung sa: caid' be, sa: re yu mung: ane: yang xug' to" ra" yao mug' bo te' to" ra" fin" bau: dang" yang jham: paug' we' volo byu qe: dao mae byid:20 sheim: mung: – Ce: sa: wa Mo"so: yang naonhaung" cao" pyang" ca" genae" tau: khyo" to" ra" dao: thang" sa: ngaid: ra" ga:21 mho: ra". – Aimung: phain we' kug' ngaui" mae ci yhung" ra" kang: keim alhab' geim" rere: sa" yang yao: wa byid: gyain" ashi". –22 Khang" dao: tarha" mae alaug ja: khao: ngo" re sa" yang za: kyang" shao: ru ngaid: ra". Sa" yang za: mangaid: re pe" qobo re: mashao" ngaid: ra".23 Cekhyo" yang mug: gaung dao mae jo; ra" ja" alho jham re qo" shaokyang" pye' ra". Ngaid qere: mug: gaung mae" zai jham re kyang" shao: pye' ru: je: gai: ra" xeim: re24 ngaui" byid: qo: ra". – Khoru: mung: ga" re Khristu wa mug: gaung mae dang dang jo; ra" ja: re adau tau" yang: byu: lo; yang kaid' ra" kug qe, khyo mavao lo: za: yao: vao lo" ra" jo, qo wa mug: gaung khyo khyao vao lo" mung: nyhao: nhaung" gaung tha" ana" Mo"so: qhid' kheim: mae yao" gaung25 lo" thug' ye; qhu" ra". – Ngaid qere: khin jaung yin" wa yao: yao" sa: ma ngaid: getau genam: sa: we' zin qug: shaoyang" qe, khyo vao ye" ru we' dakhyo: Khristu wa xeim: ngaui" byid: nae" tau: myo:26 sho' lhang mavao ye: ngaid: ra". – Yao: ai ru: myo: sho' lhang vao ye: ca" dang: ngaid: re mug: thug' saopeim mae" ga" re yao: wa myo: sho' lhang yao" gaung shid qhug' nae" ngaid:.Ana" kam" byu na bain: thao" lo" nae" jhao" li" na lao" yao: wa yao: yao" gaung re ngaui" xeim: ngaui" byid' ra" khyo" qobo re yu: pye' nae" tau: mae"27 dalhang za: ali" thug' ye; qhu" ra". – Byu yaug khao: ngo" wa dalhang za: shid ca" mung: lo" thao" mae dao: phyid' ru qhug'28 ra". – Ai we' dakhyo: Khristu re: byu myo: sho' mo; qobo re khyaid' pye' nae" tau: yao" gaung re dalhang za: ngaui" xeim: ngaui" byid: mung: thao dalhang ai: AsAng re myid: lao" mung: na mo, jhao" khyaid' yu nae" tau: qobo khyaid' byid' ru we' matin: lo: za: shid' lhang ein: lhang dam: thug' ye; li" nae" ngaid:.