1 Nyhao: nhaung" ana" ta" lo va" akao wa ce ru: ngaid: ra". Mug: gaung: mang: din" mae" qi" thao" Mo"so: la kin tao" lo, yo shaid' mae zaung: na: ra" qi" thao" khin2 jaung yin" ngonhaung" qo" ra". – Yao: wa byu: yang makaid'. Mo"so yao" yang tau: yhe' to" ra" dang main" ra" seim zaung3 kug qe, mae jaung yaug ngaid: ra". – Khin jaung qe ga" ru wa xeim: re ngaui" byid: nae" tau: khyin: to: mo, ngaid: ru mung: nyhao: nhaung" khin jaung yin'' re: ngaui" byid: nae" xeim: gaung daja: ja: ca" ra". –4 Airu: mung: yao: wa myid gaung: dao mae na: jo; ngaid: re khin jaung dayaug gai: boe" nae" mangaid:. Pe" mung: ga" re Yuda, qe: tarha" khyo" yang jhaung qhu" xeim: jham re ngaui" byid: nae" tau: khin jaung qe na:5 bam geyang: ngaid: ra". – Khin jaung qe zaui: so" lo: ra" mau" zo" jham wa mug: gaung mae" azai: akho jham: ve, lho we' aqab re" khyo: ngaid: ra". Moshe wa pa" caung: seim zaung re kaid' nae" seim" ra" au: qu" wa, ngo wa nao re bam dao mae qhu" ra" akhyo we' dakhyo: za: alhab' geim" re kaid' ca" nae" ga: mho: to" we'6 dakhyo: za: ngaid: ra". – Airu: mung: ana" Khristu wa je: azhao" je: myhao: ra" zaui: mau" zo" qo" va". Ai: tho' mae yao: wa je: gai: ra" dao: thang" dao mae de" to" ra" je: gai: ra" dao: thang" agyo: mae myain myhain" yaug yo byid' ra".7 Saoqhid' re" dao: thang" wa pe" qo mabo lo: ngaid: re shid' lam: ein: ra" dao: thang" to: nae" khyo majo, ngaid: ra". –8 Ngaid qere: Mo"so wa aqhid yao" byumyu" qere qobo vhin yang: ta" ru wa Israel amyu" Yuda, myu" qe we" ngo dao: thang" sag' to: nae" ba joe" li" nae".9 Ai: dao: thang" wa yao: bam: phug' pho" qere lo; yang she mung: Egutu mang: mae" ngo jhui" thug' lo: ra" au: yao: bam we' ngo to" ra" dao: thang: we' dau nae" mangaid:. Yao: bam wa nga" dao: thang" re macao" pyang" lo: ko". Airu: mung: yao: bam re lhaui" pye' va" ga: AsAng mho: ra".10 Joe" lo nae" ayo, abain: mae Israel amyu" qere ngo byid: nae" dao: thang" wa nga" tarha" re yao: bam: aung khug nhag' lam: mae ngo ke' byid: nae".Yao: bam: nhag' lam: khug mae tung" to: byid: nae".Ngo wa yao: bam: Mo"so boe" nae". Aimung: yao: bam wa nga" amyu" qe ngaid: genae".11 Yao: bam mae dayaug rere: yao: yao" byumyu" yao: cao: ngaid ngaid , yao: yao" kaung mae" mao: nhaung: qe ngaid ngaid AsAng re ba ge, ein: mho" byid: qo: lo: nae" mangaid:. Pe" mung: ga" re yao: bam wa ngai: thao" yaug mae" qi" thao" yaug joe" sho' ngo re ba: li" genae".12 Ailao" ngo wa yao: bam: qobo jham re khyaid' pye' byid: mung: yao: bam shaid' nghung" ru re xam" to: byid: lo: nae" mangaid: ga: Mo"so ta" ra".13 Ai: dao: thang" sag' ga: mho: ra" ru mae saoqhid' re" dao: thang: lam: re axug' boe" lo" nhao: ra". Xug' lo" byaug: ra" ja: pe" ngaid qere: dazab baui" lo" byaug: li" nae".