1 Airu: mung: cenho" myo" laug: ra" sagso: jham: yang nyhao: nhaung" re lhang" kham" to" bam: ru mung: akaung: akag' mung: ra" qola: rere: shaid' nghung" ra" qo bo alhab' re re: to" pye' co' mung: nyhao: nhaung" qhid' au: mae" myid: nghae" thao2 tae khyo qam: ke' tao" ye: gelang:. – Lalam lakhug: aqao: apain we' athao" ngaid: ra" Yesu re nyhao:nhaung" zhaug' qu" na gelang:. Thao: bain: mae jo, lao: nae" ngaui bau" ra" akhyo tau: Yesu wa qho' ma so: lo: pyao: zang re qhao" vo, va". Ana" ce: au: mae Yesu wa Mo"so: la kin tao" lo,3 yo shaid' mae jo, qo lo" yu va". – Yao: wa naonhaung" tau: qobo qo" mo; lo, mae kho qhi" zang: qhao" kham: rure myid: beim: ge, naonhaung" qam: mashain lo: qam: ke'4 thaug' qhao" na ge, . – Naonhaung" qobo we' jho" khaid' ru mae kao dau: je, nae" qhi" mathaung" qhug' shi: ko" ngaid: ra".5 Ai tho' mago" nga" zo: we" Mo"so nao re mho" ra" dao: re nyang" za: tae" gyo: wa, yao: nao re qeim: ra" au: nhag' dangai.6 Pe" mung: ga" re Mo"so wa yao: jhid' ra" yaug re mho" shid' ra". Yao: zo: khyo" khae: yu: ra" mo, re qobo dae byid' ra". Mo"so wa naonhaung" re yao: zo: qere we' dakhyo: qam: byid: dao: ta" rure naonhaung" to"7 myhid' pye' ko" i"?. – Naonhaung" wa mho" shid' dao: khae: yu lao" wa zo: re gam caung: ru: Mo"so wa naonhaung" re yao jham re" ru: caung gam: na ra". Khoru: mung: ga"re naonhaung" mae mo" mamho"8 zo: kho yaug na: ako". – Yao: zo: qere we' dakhyo: mho" myain" mho" thoe maqhug' khae: yu: ra" mo, wa zo: gyang" dau lho" qe9 mangaid: dae nau" qe ngaid: ako". – Naon- haung" alhab' geim" wa gaung sho: we' tin" ra" myhi" pho" qe nyhao: nhaung" re mho" shid' ko" ra" au: nyhao: nhaung" wa yao: bam re phug' myao" ra". Ai:tho' mago" Solo we' tin" ra" pho" re tae" gyo: mung: daui:10 na ca" nae" mangaid: i"?. – Sosu byu: yao: pho" qe wa dayo, dabain: za: yao: bam gai: ang: ra" ru we' dakhyo: za: zo: mho" dau qug ba: ako".Ngaid qere: Mo"so wa yao" gyang" shao: rure nyhao: nhaung" qo" khae:11 yu geshao: ga: mho" kyang" byid' ra". – Zo: mho" dao: re khae: yu: ra" au: na myain yaug mayo ai: au: re nhag' ngai ja: khyo" myid: jho: yu ngaid qere: airu: za: mho" qhug' va" mo, wa thao mae dang main" ra" kao ga" ngaui bau: yaug yo: ra" jhaung qhu" re qo" yu: li" genae".12 Airu: mung: naonhaung" pyaung" pyain" jo; ra" lo, we' ko, ko, nin" ra" paid'13 laug re gang: tang nhao ge, – Qeim: ra" khyid wa mapyain" jo, lo: gai: li" nae" tau: din" ra" khyo dang mae xo' yang: su" ye" lo" ge, .14 Byu yaug khao: ngo" we' nyang nyang za: jho" zam" khug mung: shaogyang" ra" akhyo mae cao" na ge, .Ai: gu: re macao" ko" re wa Mo"so re kho yaug qo" myao genae"15 mangaid:. – Mo"so: agyid aso re mathe' yu: ru dayaug lao" mabo genae" khyo: lha" yang: na ge, myo: sho' mo, re lhau: phyo' nae" ngaid: ra" myo, byo, shokhyam" nhag' kho: yo" ra" ru re agyi: macin" nae" khyo:16 lha" na ge, . – Aimung: co' jao: mae" qo" ra" min re zo damyo: we' za: tha" zo" pye' ra" Eso" re"ru: Mo"so: myo, nho nga: lao:17 dasham nhao ge, . – Naonhaung" ba veko" ru we' dakhyo: Eso" wa thao re dam: mho' ngaid yang: re: ha: lhaui" pye' ru qhug' va". Yao: wa ngug byid ngug nhe' we' nyhang" mho' ngaid yang: re: yao: pho" nhag' myid re maqo" tha" nhao lo: ngaid: ra".18 Naonhaung" wa lo; yang zao" tin" ra" bam rere: , nga" na: ra" myi: rere: , cag' cag' no; ra" nhag' hhid' thaui" we' mug: qu lahug' ru we' labo" maid thoe re re: –19 Labo" myang thoe we' mung dao: thoe gyo" ra" khyo joe" qu" mo, mangaid: . Ai: thoe re gyo" ra" mo, wa cethoe thao re madam:20 the' gyo: nae" tau: mho: ako". – Pe" mung: ga" re li" zao" thaung" ra" gug' nyhug' lao" laug baui: yang pye' se' qhug' ca" ga" ra" amyin" dao: re gyaug geyang: ngaid: ra". –21 Ai: jo, qo alhab' geim" wa gyai qu" gyaug sho' ru ngaid mung: Moshe lao" re: ngo22 wa gyaug: nin" pye' va" ga: mho: ra". – Ai: atha" naonhaung" wa Ziun: bam we' kao daui: na: ra" Mo"so: vo gaung: mo" ngaid: ra" mug: gaung mae" Yerusalem: mae re: , ajham ataung myo" ra" mug: logyo: qe: ham23 phaung mae re: – Naonhaung" wa mug: gaung mae" japhin: mae bo bo: ra" Mo"so" zo: qhid' qe ngaui bau: ngaui yao phaung: na ko" ra" jo, qo mae mug: logyo: qe we'24 daga" nha: to: qhug' veko". – Aimung: naonhaung" wa dao: thang" asag' re nyhang" jaung: to: byid' ra" Yesu jhao" re: , Abela , sa" yang byid' ra" tho' je: gai: ra" ja: jham ta" ra" pyi" sheim" ra" sa: khug khyo25 joe" veko". – Airu: mung: naonhaung" wa ai: mung dao: ta" ra" yaug re tae" gyo: nae" ha: pye' ra" mo, maboe" genae" tau: lha" ge, myid kin dao mae Mo"so: mung dao: re ta" ra" yaug: dao: thoe re tae" gyo: nae" ha: pye' ra" mo, wa maloe, ko" ngaid: ra".Airu: mung: nyhao:nhaung" wa mug: gaung mae" ta" peim" ra" dao: thoe re lham: jao" pye' ngaid: re je yang: maqo" loe, nae"26 mangaid: i"?. – Ai: ayo, mae Mo"so: dao: thoe wa myid gaung re lab; laui: nhao: ra". Ana" dalhang ngo wa myid gaung we' mug: gaung re lhaui" nhain" shi:nae" ga" dao:27 so:to" to" ashi". – Dalhang dam: mho: ra" dao: kheim: wa maqo" lhaui" nhain" ra" ja: jham wa dang: jo, nae" tau: mae" phain: to" ra" ja: jham wa lhaui" nhain" ru qhug' mung: yu: pye' ru qhug' li" nae" ga" ru28 ngaid: ra". – Nyhao: nhaung" wa malam: lai: mang: din" re qo" sang nhao qhug' ra" mo, ngaid: ra".Airu: mung: nyhao:nhaung" re byid' to" ra" je ju re zaui" zag: ci gelang:. Ai: jeju re beim: so: gyaug vae phug' myao" ru we' Mo"so re pa" caung" na gelang:. –29 Pe" mung: ga" re Mo"so wa nga" jeim" lo" nhao: ra" myi: ngaid: ra".