1 Mo"so wa lai: lo va" ayo, abain: mae nyhao: nhaung" phug' pho" qere lapa qe myo, myhao" khyo" aja: ja" akhyo jham re boe" nae" akhyo mho" shid' kyo: va". –2 Ana" ce: lo" thao" ra" abain: gu: mae Mo"so wa yao: zo: khyo" yang boe" lo shi: nae" gu: mho" shid' byid: va". Mo"so wa yao: zo: khyo" yang mug: kin myidkin alhab' re phain: phaug' mung: lo" thao" mae ja: khao: ngo" alhab' re ug nae" jaung: to" ava". –3 Ai: yao: zo: wa yao: pho" aqab abao ngaid yang: re: sosu gaung ave, ngau: yu mung: khyo shid' yaug ngaid: ra". Aimung: yao" qam: o: dao: kheim: thoe: yang ja: khao: ja: ngo" re zaui" zag: ci: ra". Nyhao:nhaung" qobo jham re khyaid' shao: pye' byid: yang: myhao: thao" ra" mug: gaung: dao mae Mo"so: lo, yo shaid' mae zaung: na: jo; ra".4 Mo"so: yang yao: re byid' to" ra" mang kheim: wa mug: logyo: qe: mang tho' je: qi" ra" khyo: byid' to" ru we' dakhyo: yao: zo:5 wa mug: logyo: qe tho' je: qi" ra". – Khoru: ga" re nao wa nga" zo: ngaid: ra". Ana" ne, ngo nao re myhung: ke' va". Ngo wa yao" yao: pho" boe" nae". Yao: re: nga" zo: boe" nae" ga: mug: logyo: khoyaug re airu:6 mho: qhu" ra" i"?. – Dagau: wa zo:qhid' re myidkin khyo nhao: ke' ra" au: mug: logyo: jham re: yao: zo: re goe; pa" ge, ga: ta" ra".7 Mug: logyo: qe we' tin: mung: Mo"so wa yao" mug: logyo: qere la re" ru: boe" nhao: mung: yao" daui mung mo, re myi: shae boe" nhao: ra" ga: Mo"so ta" ra".8 Ngaid qere: yao: zo: re wa O" Mo"so we" ni" la kin tao" wa qam: mo" bo: la kin ngaid: ra". Mo"so: mang: din" wa dang main" ra" khyo" dao: phyid' ra" mang: din" ngaid shao:.9 Asang wa dang main" rure o ngaui mung: madang: main" rure ca' nghang: yaug ngaid: ra". Airu: mung: Mo"so we" Asang: Mo"so wa ni" byin cao: qe alhab' tho' mae nao re je: phug' te' mung: ngaui bau" ra" xau boe, byid' ava" ga: Mo"so ta" ra".10 Airu: mung: nao wa mug: thug' sao peim mae" myid gye, re phain: ke' mung: mug: gaung re re: ni" lo; yang kaid' to" ru ngaid: ra".11 Aijham wa byo; baui" lo" byaug ge ngaid yang: re: nao kam" wa gang" tang: na nae". Aigu: alhab' wa mai bau: axug' jham we' dakhyo: qeim" lo" byaug: li" genae".12 Nao wa adao: bau: qhang re dang" lhain" ru we' dakhyo: ai jham tha" lo" byaug qere: nao wa da ru: za: boe" na: ra". Ni" kao re: thao" ga: ru majo, ga: mho: to" ra".13 Ai mae" getau ni" gyevo jham re ni" khyid nao: tao" ngo poe" toe' nae" ayo, joe" sho' nao wa nga" lo, yo shaid' mae zaung: na: jo, wa, ga: mug: logyo: qere dalhang14 kho yao: mho: qu" i"?. – Mug: logyo: qe wa khyaid' yu: khyo qo" va" mo, re qu" caung gam genae" tau: nhao: ke' qhug' ra" daui mung Solo zo: qe ngaid: mangaid: i"?.