1 Khang" dao: tarha" wa thao phyao: boe" lo nae" min jeju akhyo re jhaug' za: maqhu" thab thab mung: aqab re za: qhu" ru ngaid mung: zin qug: phaid' ngaui" ra" xeim: khyo" yang Mo"so jhao" ye" ra"2 mo, jab byang" khyo maqo" ko". – Ai ru: jab byang" khyo ngaid va" re wa Mo"so re pa" caung" ra" mo, dalhang: yang za: shao- gyang" khyo joe" va" ru mung: aug' o: nae" khyo majo, lo" ru: yang ai xeim: re dalhang za: phaid' ngaui" mung: thao phyao: getau dalhang madam: phaid' ngaui" lo: na: na3 genae" mangaid: i?. – Ngaid qere: ana" ai: xeim: ngaui" jao: mae qobo re zin qug:4 amyid: beim" na: ako". – Khoru: ga" re nung: , caid' be; sa" yang qobo re maqo"5 khyaid' khyo" byid: ngaid: ra". – Airu: mung: Khristu myid kin khyo gyo" li" au: o" Mo"so we" AsAng wa xeim: dau: we' xeim: ngaui" rure ma o ngaid: ra". Ngaid qere: nao wa nga" tau: gaung khyao re nyhang" jaung byid' to" ava".6 Qobo: tau: ngha" phaid' ngaui" ru we' kug' ngaui" akhyo re ma o ngaui ga: mho: ra".7 Alao" jham: dao: mae tung" to" ru we' dakhyo: ngo wa AsAng o: ra" khyo re zaui: so: nae" tau:ngo khae: yu va" ga: mho:8 ra". – Khang" dao: tarha" paug' mae tung" to" ra" kug' ngaui" xeim: , tang ngaui" ra" ja: , ngha" hab' ngaui" ra" ru we' qobo khyaid' xeim: ngha" ngaui" akhyo jham re AsAng qam: mazaug mangaui ga: mho:9 ru we' dakhyo: – Mo"so we" ngo wa nao o ngaui: ru cao" nae" tau: ye: naeva" ga: shid' lhang: kug' ngaui" li re tang nhao nae"10 tau: sao qhid' re" li re phyo' pye' ava". – Ai: o ngaui: ru we' dakhyo: Khristu AsAng re: da lhang za: ngaui" byid' ra" khyo" yang nyhao: nhaung" wa shao gyang" ra" mo, boe" va".11 Khin jaung qe ga: ru wa , ne, khao: ne, ngo" qobo re maqo" khyaid' ra" xeim:12 ngaui" mau" re zaui: so" na: ako". – AsAng wa qobo tau: dalhang za: kug' ngaui" qhaug' pye' mung: Mo"so: lo, yo shaid' mae apyaid13 ato: jo, qo lo" yu mung: – Aimae" ru ana" yao: wa yao" gyevo jham re yao" khyid nao:14 tao" toe' nae" ayo, re lao" na: ra". – Airu: mung: yao: wa dalhang za: xeim: ngaui" byid' ru we' qobo mae" shao kyang" pye' byid: qhug' ra" mo, re apyaid ato jab byang"15 lo nhao: ra". – Shaogyang" Solo re: nyhao: nhaung" re sagso: kham byid' ra".16 Thao phyao: joe" lo nae" ayo, ata mae yao: bam we' ngo to: nae" dao: thang" ngaid: ga: AsAng ta" ra".Ngo wa yao: bam: nhag' lam: khug mae nga" tarha" ke' byid: mung: ai: tarha" jham re yao: bam: nhag' myid mae tung" te' to: byid: nae" ga: mho: ra".17 Ai: thao mae ngo wa yao: bam: qobo re , shaid' nghung" yug: no re maxam" to:18 byid: lo: nae" ga: xo' mho: ra". – Qobo jham bin: khyaid' pye' byid: qhug' lao" kam" wa yug: no qobo: tau: xeim: kug' ngaui" khyo getau majo, ca" lo:.19 Airu: mung: mao: nhaung: qe we" nyhao:nhaung" wa Khristu sa: khyo" yang shaogyang" ra" kug qe, khyo vao ye: nae"20 akhang" qo" bam va". – Yesu gaung khyao ngaid: ra" pin: lung: khyo" yang kao so' daui: ra" khyo asag' nyhao:nhaung" tau:21 mae" phung" byid: va". – Mo"so: yham ru: ug: ra" khin jaung yin" qo" bam va" ru22 mung:. – Nyhao:nhaung" wa yao: yao" nhag' myid mae qobo qo" jho: ra" nhag' lam: re tha" pye' ru we' nyhao:nhaung" gaung khyao re qid gyang" yang cid' shao" pye' mung: gang" tang: ra" lam khug: myid we' Mo"so: qhid' kheim: khyo qui" vao23 ye: gelang:. – Myid: nghae" nhag' myid re gang: gang: zaui" zag: ci gelang: pe" mung: ga" re nyhao: nhaung" re dao: thang" to"24 ra" yaug wa jhaug' zaug: ra". – Nyhao: nhaung" dayaug we' dayaug sho: jho" no mung: yao: cao: yao: jho" bao" thaug' ru we' jhid' de; nhag' myid jho" qhu" byid: mung: gai: ra" lo, mau" zo" re zaui: so" na25 gelang:. – Yao: cao: daga" lhaung" ham phaung: ra" khyo re damyo" to" pye' ko" ru we' dakhyo: nyhao:nhaung" wa mato" pye' lo: ba na jhao" li" na va" rure naonhaung" ba veko". Aimung: yao: cao: je yang: qam: jho" byid' na gelang:.26 Nyhao: nhaung" wa dang main" ra" akhyo re qo" thao qobo dam: kaid' ngaid: re wa ai: qobo khyaid' xeim: getau ma jo,27 lo: ngaid: ra". – Nyhao: nhaung" wa ai: joe" lo nae" dao: phyid' rure we' Mo"so re gye kaid' ra" mo, re ngha" jheim" pye' nae" laung: thao" ra" myi: re gyaug vae: ru we'28 lao" na nae" za: angaid: lo" ra". – Moshe; tarha" re shaid' lhoe" yaug wa sagso: shid' sam yaug dao: kheim: mae ajam: acai se'29 pye' ru qhug' nae". – Airu: mung: Mo"so: yao: zo: re pe" shui manho: ra" yaug qobo re shao kyang" byid' ra" dao: thang" sa: re phug' mate' ra" yaug shaogyang" Solo: nhag' myain" ra" jeju re maphug' makhyaid' kaid' ra" yaug wa kho qhi" qi" ra" qobo dae phau:30 nae" ein: jho: na ko"?. – Ngo wa dae co' phaug' nae" qobo: aphug' dam: tug' byid: nae" ga: re: AsAng wa yao" byumyu" re dao: phyid' nae" ga: ta" ra" yaug khag' ngaid: rure nyhao: nhaung" alhab' mo; geim" ba31 gau ngaid: bam va". – Daui: na: ra" Mo"so: lo, khug khyo gyo" vao lo" ru wa gyai gyaug ca" ru ngaid: ra".32 Naonhaung" wa bo" bao re qo" yu va" tho' mae qhid' phyao: naonhaung" qug: khai" lo: ra" ayo, abain: re myid: beim:33 ge, – Naonhaung" wa su myo: sho' myo, qao: tae mae shao" pyao: ru we' se' da: be, khyaid' qhug' ra" lai: lo va" ayo, re34 myid: beim: ge, . – Naonhaung" wa kyam: lhaung" qhug' ra" mo; tau: sho: bo no mung: naonhaung" qo" ra" jo, nho" jham re lhaid' yu: ru qhug' ko" ra" au: re ngaui bau: taung" zang: qhao" pye' ako". Pe" mung: ga" re naonhaung" wa ai jham tho' je: gai: ru we' mabaui mabyo; ra" mug: gaung: jo, nho" jham re qo" sang: yu zai ngaid: ru re35 ba geyang: ngaid: ra". – Airu: mung: naon- haung" qam: dashain ge, pe" mung: ga" re ai: ru wa naonhaung" re aphug' jhaung36 qhu" qi: qo" yu nhao: li: nae". – Mo"so myid o: ra" khyo re zaui: so: nae" we' yao" dao: so: re qo" khae: yu nae" tau: mae" naonhaung" wa zang: qhao" ra" myid bo: ca" ako".37 Khoru: ga" re joe" li" nae" yaug wa mana: nai" lo: mamyao" re joe" li" naeva".38 Dang main" ra" yaug kam" lam" myid: yang kao daui: na: li" nae". Ngaid qe re: dayaug yaug naung zaid: zaid' lo" re wa ngo yao: re ngaui nae" mangaid: ga: ta"39 ra". – Nyhao:nhaung" wa naung zaid: zaid' lo" mung: jeim" lo" nae" mo, mangaid: lam khug: myid bo mung: khyaid' yu: ru qhug' nae" mo, angaid:.