Tatrha" Mho" Kyang:-8

(SHAO GYANG" JHAM: PAUG' )

切换到福音影视网-新版圣经

  • 1 Nao wa kao daui mung: na: je: na: myo: veshao: , Mo"so ni" phug' pho" qe re dao: thang" to" ra" mang: khyo lo" mung: qo" sang: yu nae" ru wa ana" ba pin: to: co' nae" khang" dao: alhab' geim" qo" cao"
  • 2 pyang" sho' lha" wa, . – Ni" Mo"so wa nao re nyham: khyo" lag yu: qu" mung: yao" khang" ra" dao: re cao" nae" nhag' bo mabo ga" ru re ba: yu sho' lai: lo" va" zin lam: byid xe geim" jhui" su" qin" va"
  • 3 ru re myid: beim: so: ca" nae". – Yao: nao re nyham: khyo" pye' mung: vae: moe; qid shab' phau: nhao: ru we' xaosu byu wa cinmain" yang za: kao magai: daui. Mo"so: nhaid' mae" thug' ra" mung dao" yang agai: daui: na: ga" ru re nao re: magyo" qu" ni" phug' phyid' qe re: mamyao magyo" qu" ra" Mana' cinmain" yang nao re khau: lo:
  • 4 ava". – Lai: lo va" zin lam: byid xe gu: mae ni" ve, mai bau: maqeim: majaid: lo" , ni" khyid re: maqae" mathe' thaung" caid'. –
  • 5 Yao: pho" wa yao: zo: re mho" shid' ru re" ru: ni" Mo"so wa nao re mho" shid' lo: ru
  • 6 re nhag' khug mae myid: so: ca" nae". – Ai ru: mung: ni" Mo"so AsAng nyhang" byid' to" ra" gau: khyo khyo" cao" mung: AsAng re gyaug phug' ru we' khang" dao: jham re
  • 7 cao" pyang" na wa, . – Khoru: ga" re ni" Mo"so wa gai lho" ra" mang: , lao: geim: , bam mae" yug: thug' ra" qid gyaung: , gyaung: zo: gyaung: zang qid thaung: , qid thug' , qid tham: jham we' byang" ra"
  • 8 mang: , – saung so , gaug , yho" , sabyi' naui , pho' ham" gae , khyae thaug' shi: we' byang" ra" mug: myid Zhainlun xau byo: yhid we' byang" sheim: ra" mug:
  • 9 myid , – pe" maca" lo: gyi: gyi: qhug' the' zo" ra" mug: myid; jo, to' laug byang" jo, mung: bam khug mae" gyid: ne qo" dau" yu: ra" mug: myid khyo nao re jhui" lo"
  • 10 ava". – Ai qhi" gai: ra" mug: myid re byid: va" ru mung: nao gyi: gyi: baug baug qhug' zo: lao" ni" Mo"so: jeju re caung: khin" ca" nae".
  • 11 Ana" ba ngo xo' ta" kyo" ra" cao" khyao jin kham , khang" dao: tarha" jham re nao macao" pyang" , ni" Mo"so AsAng re to" myhid' pye' ra" qobo re lha" yang: jao"
  • 12 pye' wa, . – Nao wa gyi: gyi: baug baug zo: mung: yham yo agai qo" kaid' mung: na:
  • 13 au: mae , – ni" yao , nung: jaung , ngaui hhang ru" ra" jo, nho" dai kham myo: laug:
  • 14 lo: li" au: , – nao wa nhag' myid qi" nghao" li" mung: qhid' phyao: jeim doe; na: Egutu mang: mae" jhui" she: phao: thug' lo: ra"
  • 15 yaug , – myi: , lhao maui , gung gug' myo: laug mung: qid majo, moe, shab' ra" jo, qo , qu" gyaug pho" ra" seyo yoqao" , no, qaid agaung: khyo" nao re jhui" dai" mung: myi: bo: ra" laug baui khug mae" qid yug:
  • 16 thug' li" nhao byid: yaug , – nao re nyham: khyo" lag yu: qu" mung: thao mae jeju kaid' nae" tau: ni" phug' pho" mamyao maba: ra" Mana' cinmain" we' seyo mae khau: zho" lo: ra" ni" Mo"so re to" myhid' pye'
  • 17 mung:, – nga" kheim: so' , nga" khyid lo, qam: o: khyo" yang ce: jo, nho" dai kham qo" ru angaid: ein: ni" nhag' khug mae myid: thug' ke' ra" qobo mathug' veshao:
  • 18 lha" wa, . – Ni" Mo"so AsAng re za: myid: beim: so" na ca" nae". Khoru: ga" re ni" phug' pho" qe re dang: to" ra" dao: thang" re ana" ne, re" ru: ngaid shao: , jo, nho" dai kham the' ba: qo" nae" qam: o: re Mo"so byid' ava".
  • 19 Ni" Mo"so AsAng re nao to" myhid' pye' yang: getau: mo"so jham re caung da" goe; pa" re byo, qeim: ra" khyo dang dang joe" nae" ein: ana" ba nao we' gyo: mae
  • 20 sagso: kham va". – Ni" Mo"so AsAng: dao: re matae" gyo: ko" mathao mae Mo"so wa ni" qhid' kheim: mae phyo' sin" jheim" pye' ra" byumyu" jham re" ru: ai we' dakhyo: nao re: byo, qeim: ra" shaid' khyo joe" nae" ngaid: ra".
回到本卷目录 回到本版本目录 回到首页