1 Ni" Mo"so AsAng wa nao lo" vao: sang nae" mang: khyo jhui" vhao" mung: Hiti byu , Gergashi' , Amori' , Khanain: , Pher- ezi' Hitvi , Yebuti' ga" ra" nao tho' je: qi: je: myo: laug: ra" amyu" nhaid' myu" re ni" qhid' kheim: mae" khe' thug' pye'mung: , –2 ni" lo, mae qhaug' byid' ra" au: yao: bam re shao" sho' se' ca" genae" ngaid: ra". Yao: bam we' ba nam magai: kaid' zam" khug3 nhag' magai: khyag' nae". – Yao: bam we' zomo, yaug pho" magai: kaid' , ni" zomyi: zo: re yao: bam: yaug gai zo: we' re: ni" zo: we' yao" zo myi: zo: qe we' re: ug'4 khug' magai: vai" nae". – Khoru: ga" re , yao: bam wa ni" zolau: zo: re ngo mae mangha nhao lo: getau: mo"so re goe; pa" nae" tau: jhui" pyag' lo" li" genae". Alao" Mo"so naonhaung" re nhag' gyid' mung:5 ajao" yao: nao re se' pye' li" nae". – Ai ru: mung: yao: bam re khoru: kaid' zai ein: ru wa , yao: bam: xeim: ngaui" phain re phyo' pye' ca". Alho jham re be; phyo' pye' ca". Ashera: alho jham re thau: lhang" pye' ca". Kyaung" co' lhang" yu: ra" alho jham6 re myi: ngha" pye' ca" nae". – Khoru: ga" re nao wa ni" Mo"so: tau: shao lho" ra" amyu" ngaid: . Ni" Mo"so sang nae" amyu" toe' nae" ga: myid kin: dao mae" byumyu"7 alhab' mae" nao re khyin: yu va". – Nao wa geje: byumyu" tho' je: myo: laug yang: ni" Mo"so nao re jhid' de, yang: khyin: ru mangaid: , nao wa geje: byumyu" tho' mae8 je: nang" ra". – Mo"so wa nao re jhid' kao nug: mathao mae re: ni" phug' phyid' qe re thang" to" ra" dao: thang" re pyang" lhoe" nug: ra" mathao mae nao jeim doe; na: ra" Egutu jhaung zug: Pharaoh lo, khug mae" yao" qam: mo" bo: ra" lo, lam" yang nao9 re khyaid' khyi: yu: ava". – Ai ru: mung: ni" Mo"so wa vin tang" ra" Mo"so dao: so: zaung: ra" Mo"so yao: re jhid' de, mung: khang" dao: tarha" re cao" pyang" ra" mo; akaung ako' jham re ataung atug' mathain: thoe gyag ma qhui: nhag' myain" ru re10 qhu" ra" Mo"so , – yao: re manug nghang" ra" mo, kam" wa yao: bam: myo, qhao: tae mae yao: qobo byid' ra" Mo"so ngaid: ru ba: xam" to: ge, yao: bam yao" myo, qhao: tae11 mae qobo dae byid' li" nae". – Ai ru: mung: ana" ba ngo to" to: byid' ra" cao" khyao jin kham; khang" dao: tarha" jham re cao" lhoe" pyang" na ca" genae".12 Ai: khang" dao: jham re cao" nae" tau: tae" gyo: ko" re ni" Mo"so wa ni" phug' phyid' re jham tang" to" ra" dao: thang" we' nhag' khyag' nhag' myain" ru wa gang"13 tang: jo; li" nae". – Nao re jhid' de, yang: min jhaung: byid: mung: myo: laug nhao: li" nae". Nao re byid: nae" ein: ni" phug' phyid' qe re dang: to" ra" mang: mae nao khau myhung: ke' ra" zo: myid qe re re: ni" mug: myid: amyug: ashi: , gaug zo maui: lam: sabyi' qang: , xau , nung: , caid', yao14 zhain mae re: min gam byid: nae". – Nao wa getau: byumyu" qe tho' mae je: min khae: yu: ra" yaug boe" mung: nao mae yaug gai myiqe: bug daung: dayaug re: gug' nyhug' jham mae amo" alo: mae gug'15 nyhug' yao" dadau: re: mabo nae". – Mo"so wa nao mae" no bug: mau byin: alhab' re sham" shao: khyo" pye' mung: nao myao: ra" Egutu mae" gyaug pho: qug: khai: nao mae zao" nae" mangaid: . Nao re manug: ra" mo, alhab' bam: mae de; lo" veshao: . –16 Ni" Mo"so wa ni" lo, mae qhaug' byid' ra" byumyu" alhab' geim" re phyo' paui" pye' ca" nae". Ni" myo, jid' yao: bam re nhag' magai: qu" khyag'. Yao: bam: mo"so re magai: goe; pa". Goe; pa" re tha" lang: jao: boe" nae".17 Ai: byumyu" jham wa ngo tho' je: myo: laug ko" ra". Ngo wa yao: bam re khoru: qo" khe' thug' nae" i"? ein: nhag' khug18 mae the' myid: qhug' yang: , – yao: bam re damyid: gyaug. Ni" Mo"so wa Pharaoh jhaung zug: we' Egutu mang: damang" geim" mae kaid' ra" mau" re re: nao myo; myao ngaid mung: qi" thao" ra" lag yu:19 ru jham re re: , – ni" Mo"so wa nao re khyaid' she: jhui" lo: ra" au: , kaid' qhu" ra" ve, lho mug' pho" ra" mau" re re: , qam: mo" bo: ra" lo, yheim" ke' ru re re: , nao ada" zo, gelho: za: myid: ke' qu" wa, . Ai re" ru: nao qu" gyaug: ra" byumyu" alhab' geim" re re: ni" Mo"so wa kaid' li" nae". –20 Ai mae" getau: na: dang mung: ni" qhid' kheim: mae phao: vho' na ko" ra" mo, jhao" ni" Mo"so wa tau mo" byo: jham re21 nhao: ke' li" nae". – Yao: bam: mathao din ci" ru dabo khoru: ga" re kheim: so' phung bao qi: mung gyaug pho" ra" Mo"so wa22 naonhaung" khug mae na: na: ra". – Ni" Mo"so AsAng wa ai: byumyu" qe re zo" zo" mae" khe' thug' pye' li" nae" va". Seyo mae" myang kha: zoqhid jham byang" lo: li" nae" ru re gaung yug mung: yao: bam ajao" yao: se' mhain" khyo" pye' ru gai:23 kaid' shi: nae" mangaid: . – Ngaid qere: ni" Mo"so wa yao: bam re nao mae qhaug' byid: mung: yao: bam: amyu" gain: shao" lo" sho' qi" thao" sho' byo, qeim: ru re24 kaid' li" naeva". – Yao: bam: jhaung zug: jham re re: ni" lo, mae qhaug' byid: yang: yao: bam: mang khyao: re mug: gaung: agyid' mae" qab: pye' li" nae". Yao: bam re maqo" se' mhain" pye' pye' wa ni" qhid' kheim: mae khag' re: maqo" na maqo" ye,25 genae". – Yao: co' lhang" kyaung" yu: ra" mo"so: alho jham re myi: ngha" pye' ca" nae". Alho mae de; ra" ngaui hhang jham re myo, danyaid magai: shao: yu. Yu lao" qobo qo" nae" ru re ba wa, ai ru" ja: re26 ni" Mo"so wa ca' ra". – Maca' majhaid' ra" kya" si: zai jham re ni" yham khug khyo magai: vhao" nae". Vhao" yu: ngaid: re nao wa nhang: kheim: zao" ra" zai re" ru boe" nae" gyaug ci" ca" ra". Ai ru" ra" zai jham re gai gai: yao: nao ca' ru we' jao" pye' ca" nae". Nhang: kheim: zao" ra" zai jham ngaid: ra".