Tatrha" Mho" Kyang:-33

(SHAO GYANG" JHAM: PAUG' )

切换到福音影视网-新版圣经

  • 1 Mo"so: byu Moshe wa yao: mashid shi: re Israel amyu" qe re ceru: ga: min
  • 2 gam jhaung: byid: co' ra". – Mo"so wa Sina' bam dao mae" gyo" lo: ra". Sira' jo, qo mae" ai: byu jham re bao: qhu" ra". Parain: bam dao mae" phung bao bao: myhao" mung: shao gyang" ra" mo, ataung atug jham we' daga" joe" li" mung: yao" lo, mae yao: bam: tau: tarha" myi: te' ci: ra".
  • 3 Gai gai: yao: ce: amyu" re yao: jhid' de; ra". Yao" shao lho" ra" mo, alhab' wa ni" lo, khug mae ngaid ko" ra". Yao: bam wa Ni" khyid qao: mae goe; gam" mung: Ni" mung dao: re tae" gyo" na: bam ko" ra".
  • 4 Moshe ngonhaung" re khang" dao: tarha" Yaku' mo, phaung: tau: mae khyao kham khyao khae: to" to: byid: va".
  • 5 Israel amyu" zug: agyi qe we' daga" amyu" akaung ako' jham phaung: na ko" au: , Yeshurun: mae yao: jhaung zug: ngaid: ra".
  • 6 Rubin: mashid magain adaui: na shao: yao" zo: myid: qe kam" wa mataung" na: je: genae".
  • 7 Yuda amyu" re kam" wa Mo"so we" Yuda dao: thoe re tae" gyo: mung: yao" amyu" qe jhao" dam: jhui" lo byid: la, yao" lo, wa yao" tau: gug: gam veshao: , yao: re gyevo: lo, mae" khyi: yu byid: la, .
  • 8 Levi re wa Ni" Thumim: we' Orim: we' din: main: yaug Masa, jo, qo mae Nao yao: re lag yu: qu" va". Meriba qid thug' nhae mae Nao yao: we' jho" ngag; qu" veko" ra".
  • 9 Yao: wa yao" myhi" pho" re lao" myhi" pho" maga: , yao" mao: nhaung: re maxam: maso: lo: , yao" zo: dau qe re lhao" re: mabeim: maso: lo: sho' Ni" mung dao: tae" gyo: mung: Ni" dao: thang" re cao" pyang" veko" ra".
  • 10 Yao: bam wa cao" khyao jin kham re Yaku' amyu" , Ni" tarha" re Israel qere mho" shid' na geshao: . Sheim nae pyo" xeim: dau: re Ni" qhid' kheim: mae phaid' ngaui" , xeim: dau: re Ni" xeim: ngaui" phain dao mae caung da" kai" to" li" genae" ngaid: ra".
  • 11 Mo"so we" Ni" jo, nho" re min byid: mung: yao: zaui: so" lo, mau" zo" re khae: yu byid: la, yao: re kaung: kag' mo, madam: gai: to" ye, lo: sho' phyid' dam: re khyug' pye' wa, .
  • 12 Benyamin: re kam" wa Mo"so: jhid' de, yaug wa yao: we'daga" yaug yo za: na: na shao: , yao: re malam: lai: gug: gam nae" yaug ngaid mung: yao" kin: khung" dao mae zaung: na: jo; li" nae".
  • 13 Yoseb; amyu" re kam" wa ai: amyu" na: ra" mang: wa tho' zhao" mug: gaung: jo, nho" yang re: , no; thao" ra" jo, qo mae nyham" to" ra" ja" yang re: ,
  • 14 malam: lai: ba mae min xau: ra" qhovo: qho shi: we' re: , lho" mo" khye' qug yaug: ra" gaug zo maui: lam: we' re: ,
  • 15 geco' getoe: bam jham: gai: thao" ra" zai yo jham we' re: , thain" madaui jo; jo; ra" bug gaung jham phug' thao" ra" jo, nho" zai yo we' re: ,
  • 16 mug: myid yoso: mae" na gai nae" re: , thao" jam" mae laung" jo; ra" yaug mae" jeju we' re: , Mo"so wa yao" mug: myid re min byid: veshao: . Ai: min wa Yoseb; au: dao mae ngaid veshao: .
  • 17 Yao" nung: jaung lo: au: khaui: qhid' wa myo, nho nga: lao: bo: ra". Yao" khyug wa dam: bug: khyug ru" ru ngaid: ra". Ai: khyug: yang byumyu" cao jab re mug: myid gye, thao" sho' khe' thaung" sin" ke' li" nae". Ai jham wa Ephrim: atug atid; Manashe: amyu" ataung taung ngaid: ra".
  • 18 Zabulun: re wa Zabulun: amyu" we" nao thug' ye" ra" gau: khyo mae ngaui bau: wa, .
  • 19 Yao: bam wa amyu" zo: qe re ai: bam khyo khai: jhui" yu mung: din: main" ra" xeim: ngaui" genae". Qid dae mae" na gai: jhaung: we' ma coe bam mae nyham" to" ra" jo, nho" re the' qhug' shaug' genae".
  • 20 Gaid' re wa , Gaid' re ce" lhae: ke' yaug wa nga: lho" veshao: wo". Yao: wa lo: tin: re" ru: ngaid mung: lo, lam" yang au: go, sho' lao" caid' pye' li" nae".
  • 21 Sao qhid' nyhang" jaung: to" ra" dai kham re yao: khyin: yu mung: ai mae tarha" agyi pho" tau: gae bam du: to" ra". Amyu" qe: zug: agyi jham we' li" lo mung: Mo"so: dang main" khyo we' Israel qe mae to" to" ra" tarha" gau: khyo re cao" nae" ngaid: ra".
  • 22 Dain: amyu" wa lo: tin: nau" ngaid mung: Bashain: mang: mae" thug' byae: li" nae".
  • 23 Nabthali' amyu" re wa , Nabthali amyu" wa jeju we' byang" mung: Mo"so byid' ra" min qo" ru we' ba vao shaid' we' qid bang: shaid' re sang zo: veshao: wo".
  • 24 Asha: amyu" re , Asha: amyu" wa zo: dau khau mung: nga: lho" veshao: wo". Yao" mao: nhaung: qe we' myid qhug' shao: , yao" khyid wa xau mae dag: na shao: wo".
  • 25 Ni" kham: kyao" wa jo, to' we' gyid: ngaid: li" nae". Ni" kao daui: dalo: gyo: mae ni" kheim: so' qam: o: wa qam: o: qi" na veshao: .
  • 26 Yeshurun" Mo"so we' dau: ru khag' mana , nao re bao" nae" ga: mug: gaung re jui: , yao" phung bao we' jham thaui: mae jui: yang: ,
  • 27 thain" madaui: Mo"so wa nao khug ngha jao: ngaid mung: mathain: thoe lo" lo; yang nao re vo; yu nae" ga: , gyevo re ni" qhid' kheim: mae" khe' thug' mung: yao: bam re phyo' qheim" pye' nae" akhang" byid' ra".
  • 28 Gaug zo maui: lam: we' sabyi' qang: yug: ra" mang: mae Israel amyu" wa na myain yaug yo mung: mug: nghin coe: re: agyo" na: li" nae".
  • 29 Israel amyu" we" nao wa nga: lho" ra". Mo"so khyi: yu: ra" amyu", nao we' kho- yaug dau nae" i"? yao: wa nao re gug: gam: ra" go nao re tau: to' ra" shae lhae ngaid: ra". Ni" gyevo qe wa ni" qhid' kheim: mae seim" mung: myhao: ra" jo, qo mae qhug' zab; li" nae" ga: min byid' ra".
回到本卷目录 回到本版本目录 回到首页