1 Israel amyu" zo: qe we" , naonhaung" kao daui mung: naonhaung" phug' pho" qe lam khug: lo: ra" Mo"so byid' ra" mang: din" khyo lo" vao: sang: yu sho' naonhaung" cao" pyang" nae" cao" khyao jin kham tarha" re2 gyo" yu ge, . – Ngo pin: to" ra" khang" dao: mae naonhaung" laung: re: magai: laung" yu nae" she re: magai: she: pye' nae". Ngo khang" to" ra" dao: we' daru: za: naon- haung" AsAng Mo"so: khang" dao: tarha"3 re cao" pyang" ye" lo" ca" nae". – Bala' Pegura" mathao mae Mo"so dae byid' ru re naonhaung" yao: myo; myao ngaid veko". Bala' Pegura' re goe; pa" ra" mo, alhab' re naonhaung" AsAng Mo"so wa naonhaung" mo, phaung khug mae" jao khae qab: pye'4 va". – Naonhaung" AsAng Mo"so re lam khug goe; pa" mo, kam" wa ana" ne, joe"5 sho' kao qo" daui: na ko" ra". – Naon- haung" lo" vao: na nae" mae cao" nae" tau: nga" Mo"so AsAng pin: to" ru we' dakhyo: cao" khyao jin kham jham re ngo mho"6 shid' va". – Ai ru: mung: ai: khang" dao: tarha" alhab' re cao" pyang" ge, alao" ce: khang" dao: cao" khyao jham re the' gyo" ra" byumyu" qe: qhid' kheim: mae naon- haung" au: naug: sozo: du" ru bao: myhao" li" nae". Yao: bam re: ce: qi" qhang: ra" byumyu" wa gai gai: yao: laba lajhao we' au: naug: sozo: du" ru we' jab byang" ra" amyu" ngaid genhaung ga: ta" genae". –7 Ngonhaung" jhaung: lhaung" mho' ru mae Mo"so ngonhaung" we' ajhao" za: na: re re" ru: getau: mo"so re caung da" ra" mo, mae ai re" ru mo"so khag' byumyu" mae qo" ko"8 i"? – Ngo wa ana" ne, naonhaung" mae to: byid' ra" tarha" alhab' we' daru: za: dang main" ra" cao" khyao jin kham qo" ra" pe" byumyu" na: ra" i"?9 Naonhaung" Horeb jo, qo mae naon- haung" Mo"so: qhid' kheim: mae ye; na: bam ko" au: naonhaung" yao" myo; myao ngaid va" ru re dato" myhid' ge, dapyaid dato aung khug: nhag' myid mae qo" ke' ci nae" khyo: yao" gaung re yao: lha" ge, . Ai: akhyo jham re zo: myid: qe re mho"10 shid' kyo: ge, . – Ai: ayo, mae Mo"so wa byu jham re Nga" qhid' kheim: mae khai: zhang" ham nhao wa, yao: bam: mug: myid: dao mae kao daui: na: ra" dalo: gyo: mae Ngo re gyaug phug' mung: zo: myid: qe re mho" shid' na nae" tau: Nga" dao: thoe re gyo" qu" nhao nae" ga: ngo re mho:11 ru we' dakhyo: . – Naonhaung" wa yao: jhao" qui" te' li" mung: bam khyid mae ye; na: jo, ko" ra". Bam nyaug wa mug: gaung agaung: mae myi: de; na mung: mug: caid' ru , cag' no; ave, jham thaui: caid' no, thaui:12 ngaid: jo; ra". – Alao" Mo"so wa myi: khug mae" naonhaung" re dao: jhau: ra". Naon- haung" wa yao" akhyao re mathe' myao ko" ngaid: ra". Dao: thoe re za: athe' gyo:13 ko" ra". – Naonhaung" cao" pyang" nae" tau: dao: thang" tarha" ga" ra" khang" dao: tarha" daxe re ta" kyo: mung: laug pye: dao14 mae tung" to: va" ra". – Naonhaung" lo" vao: sang nae" mang: din" mae cao" pyang" na genae" tau: ngo naonhaung" re mho" shid' kyo" ra" pin dao: we' khang" dao: tarha" jham re ai: au: Mo"so ngo re khang" to: byid: va".15 Horeb bam mae myi: khug mae" Mo"so naonhaung" re jhau: ra" au: khoru" akhyo re re: naonhaung" mathe' myao ko" ru16 mung: , – thao phyao: naonhaung" xaosu17 yaug gai: alho xaosu myiqe: alho , – mug: myid: dao mae na: ra" gug' nyhug' jham: alho , mug: le; phyo: mae dao" qin" ra"18 ngho' alho , – myid gaung mae yoe" qin" ra" gug' nyhug' alho , myid nyham qid mae na: ra" ngo: alho jham we' dau: ra" alho re yao: yao" tau: mathe' zao" kaid' veshao: . –19 Mug: gaung khyo tau: nghao" qu" mung: ba kyi lho" mo" jham re myao: ra" au: naonhaung" AsAng Mo"so wa mug: gaung gyid' na: ra" byumyu" jham re byid' to" ra" jham re goe; pa" gelang: ga" re magoe; pa", macao" nae" yao" gaung re lha" ge, . –20 Naonhaung" wa ana" ba ngaid: na: ru re" ru: Mo"so: Ma khae: yu nae" byumyu" boe" nae" tau: naonhaung" re Egutu mang: jo, to' myi: khyeim" mae" xoe: jhui" lo21 va". – Ai mae" getau naonhaung" mathao mae Mo"so ngo re nhag' yo: mung: Yodain: gyaung: thoe" te' magai: gau" de, nae" we' naonhaung" Mo"so wa naonhaung" Ma khae: yu nae" mang: khyo magai: qo"22 vao nae" ga: jham tang" pye' ava". – Ai ru: mung: ngo ce: mang: mae shid zai va". Yodain: gyaung: re magai: gau: lo: naon- haung" kam" wa gau" de; lo" mung: ai: gai lho" ra" mang: din" re qo" vao: sang:23 yu genae". – Ai ru: mung: naonhaung" AsAng Mo"so naonhaung" we' to" to" ra" dao: thang" re to" myhid' pye' mung: naon- haung" Mo"so tam" kyo" to" ra" ja: alho jham re mathe' zao" kaid' nae" yao: yao"24 gaung re lha" na ge, . – Khoru: ga" re naon- haung" AsAng Mo"so wa nga" ba: ra" myi: , qobo yu laui: ra" Mo"so ngaid: ra".25 Naonhaung" wa zo: myhung dau khau mung: ai: mang: mae na: myao" lo" lao" dam: phaug' lhain: mung: akhyao daja: ja" alho re kaid' mung: naonhaung" Mo"so nhag' yo: nae" tau: yao" qhid' kheim: mae26 zai" shaid' ko" re wa , – mug: gaung myid gaung re lao: yang: ana" ne, ngo naon- haung" re mho nae" ru wa , naonhaung" Yodain: gyaung: gau: mung: vao: sang nae" mang: din" mae kho myhao" mamyao" re na: gain na: thao" lo" li" genae". Ai: mang: mae myao" sho' kao maqo" daui genae". Shao" pyaid' sho' phyo' sin" pye' ru qhug'27 genae". – Mo"so naonhaung" re labug: byumyu" qe mae pyo: sin" ke' mung: naonhaung" re jhui" lo" ra" mo, phaung mae dajhid' zo: za: na: ngai: lo" ru phau:28 genae". – Ai: mang: khain mae byu: lo; yang kaid' mung: myo, mamyao , no: magyo: , maba: zo: maba: shaug' , sheim nae thoe maba: gyo" ra" sag' tam" gyoe lho laug baui gyoe lho jham re naonhaung" lam29 khug goe; pa" lo" li" genae". – Ngaid qere: ai: na jao: jham mae naonhaung" AsAng Mo"so re dalhang dam: qho nug ko" re nhag' myid lam: maug we' qho ko" ngaid:30 re qhug' li" genae". – Thao phyao: mae ceru" jham re thaung" qhug' mung: qug: khai: sho: jhin re qhug' mung: naonhaung" Mo"so AsAng jhao" dam: lhang: phaug' lo: mung: yao" dao: thoe re tae" gyo: ko"31 ngaid: re , – naonhaung" Mo"so wa nhag' ba: myain" ra" Mo"so ngaid mung: naon- haung" re gain sho' phyo' sin" pye' nae" mangaid: . Naonhaung" phug' pho" jham re jham kai" to" ra" dao: thang" re to" myhid' nae" mangaid: .32 Mug: myid: dao mae Mo"so wa xaosu byu re myhung: ke' ra" ba mae" mung: naonhaung" mana shi" ra" lai: lo" va" ta geim" mug: khothao" myid khothao" mae cao" myid' ca: qu" ge, ceqhi" qi" ra" mau" boe" qu" i" , cere" ru" mau" zo" lau dao:33 re gyo" qu" ko" i"? – Mo"so wa myi: khug mae" jhau: ke' ra" dao: thoe re naonhaung" the' gyo" ru we' dakhyo: getau: byumyu" qe the' gyo: mung: kao daui: ru qo"qu" ko" ra"34 i"? – Naonhaung" Mo"so wa Egutu mang: mae naonhaung" myo, qhao: tae mae kaid' qhu" ra" lag yu: ru , mug' pho" ve, lho qhu" ru , gye zai" thug' ru , qam: mo" bo: ra" lo, we' tau: qang: ru , gyaug: din pho" lamy- hung" re qhu" ra" khyo" yang getau: mo"so jham wa byu damyu" re damyu" khug mae" yao: yao" tau: mae" ga" jhui" she: thug' qu"35 ko" ra" i"? – Mo"so daso za: Mo"so ngaid: ru we' yao: mae" getau Mo"so geje mana lo" ru re ba vegeshao: ga: naonhaung" re ai: gu: qhu" ru ngaid: ra".36 Naonhaung" re mho" shid' nae" ga: mug: gaung khyo" mae" yao" dao: thoe naonhaung" re the' gyo" yu nhao: ava". Myid gaung: dao mae myi: khyeim" mo" re re: qhu" mung: naonhaung" myi: khyeim" mae" dao: thoe re the' qhug' gyo: veko".37 Ni" phug' pho" qe re yao: jhid' kao yang: yao: bam: amyu" nyaug re yao:38 khyin: yu va". – Nao tho' je: qi: je: myo" laug: ra" byumyu" jham re ni" qhid' kheim: mae" khe' thug' pye' yang: ana" ne, ngaid: ru we' dakhyo: ai: mug: myid khug khyo nao re vhao" mung: Ma khae: yu nae" tau: amo" laha: kheim: so' yang Egutu mang: mae" yao" qhid' kheim: khyo jhui" pyaung"39 yu: ava". – Ai ru: mung: mug: gaung dao myid gaung: dao mae Mo"so ngaid: ru re re: , Mo"so getau jain" yang: mana lo" ru re ana" ba myid: beim: mung: nhag' myid40 akao" mae xam" ci ge, . – Naonhaung" we' daga" zo: myid: qe yaug yo nae" ru , naon- haung" re Mo"so byid' ra" mang: mae kao qhang: na nae" tau: mae ana" ba ngo pin: ra" khang" dao: tarha" jham re cao" pyang" ye: ca" genae" ga: Moshe ta" shid' kyo: ra".41 Moshe wa yham kyo: cao: re manug yang: mangaid' ru mabeim: maso: the' zao" se' yaug phao: khug nae" vo sam vo , –42 Yodain: gyaung: ba thug' te' mae Moshe43 nyhang" to: byid' ra". – Ai: vo jham: mang wa Rubin: amyu" tau: seyo: jao: gyu" mae jo; ra" Bezera' , Gaid' amyu" qe: tau: Gilaid' mang: mae" Ramod' vomo" , Manashe: amyu" qe: tau: Bashain: mang: mae Golain: vo ngaid: ra".44 Ce ru wa Israel zo: myid: qe re Moshe45 pin: to: co' ra" tarha" ngaid: ra". – Yao: bam Egutu mang: mae" phao: thug' lo thao Heshabung: mae tao" zaung: ra" Amori' jhaung zug: Shihung" mang: khug Yodain: gyaung: ba thug' te' Bed'-pegura' tau" te' mae jo; ra" lao: khaung: mae Moshe ta" kyo" ra" sagso: we' khang" dao: tarha"46 ngaid: ra". – Egutu mang: mae" thug' lo thao Moshe we' Israel zo: myid: qe wa47 ai: jhaung zug: re se' pye' mung: , – yao" mug: myid we' Bashain: jhaung zug: Oga'48 mug: myid re re: sang: yu ko" ra". – Yao: shid' zo: wa Anon: lao: khaung: nhae mae" Aro vo mae" re Hermon: ga" Ziun: bam joe" sho' Yodain: gyaung: ba thug' shaid' mae49 jao: dae we' daga" , – jao: dae we' te' ra" qid tham: mae" ru Pisga: bam khyid joe" sho' ug ko" ra" Amori' jhaung zug: qe ngaid ko"ra".