1 Moshe we' Israel amyu" mae" nhag' bo ade, qe wa amyu" zo: qe re ceru: ga: pin ko" ra". Ana" ne, ngo naonhaung" re pin: ra" dao: alhab' re cao" pyang" na ge, . –2 Nao Yodain: gyaung: gau" de, mung: ni" Mo"so byid' ra" mang: joe" lo" lao" , laug baui aqi: be; lhang" yu yang: myid au:3 naug: shain" gyaid nae" ngaid: ra". – Ni" phug' pho" Mo"so: dao: so: jo; ru we' dakhyo: nao re byid' ra" mang: , nung: nug' we' byo: yhid yug: ra" mang: re vao: sang nae" tau: gau" de; lo" lao" ce: cao" khyao khang" dao: jham alhab' geim" re ai: laug baui dao mae tung" to: ca" nae". –4 Yodain: gyaung: gau" de; lo" lao" ana" ne, ngo pin: ra" laug baui re Ebala' bam mae tau: zhaug' mung: myid au: naug: shain"5 gyaid: jhaid' ca" nae". – Ai: jo, qo mae ni" Mo"so: tau: mae xeim: phain re laug baui:6 yang kaid' ca" nae". – Jo, to' be, dau: yang makho' yu lo: , laug baui jham: yang za: kaid' ca" nae". Ni" Mo"so re ai: phain dao7 mae xeim: phaid' ngaui" ca" nae". – Zam" khug xeim: jham re re: caung da" mung: ai mae zo: shaug' yang: ngaui bau: ngaui lho"8 ru re kaid' ca" genae". – Ai: laug baui dao mae ce: dao: kheim: alhab' geim" re gelho: za: tung" te' to: ca" nae" ga: mho: ra".9 Dam: dalhang Moshe we' khin jaung jham Levi amyu" zo: qe wa Israel amyu" zo: qe we" gelho: za: tae" gyo: ge, ana" ba nao wa ni" Mo"so: amyu" qe ngaid veko"10 ra". – Ai ru: mung: ni" Mo"so: dao: thoe re tae" gyo: ca" nae". Ana" ba ngo kai" ta" kyo" ra" cao" khyao jin kham jham re cao" pyang" ca" genae" ga: Israel amyu" zo: qe alhab' bam: re mho ko" ra".11 Ai: ba mae Moshe wa volo byu qe re12 dam: pin: to" ru wa , – naonhaung" Yodain: gyaung: re gau" de; lo" thao volo byu qe min jhaung: byid: nae" tau: mae Gerizim: bam dao mae ye, nae" mo, wa , Simon , Levi , Yuda , Iskha: , Yoseb' , Benyamin:13 ngaid nae". – Nhang: kheim: ke' nae" tau: mae Ebala' bam dao mae ye, nae" mo, wa Rubin: , Gaid' , Asha: , Zabulun: , Dain: ,14 Nabthali' ngaid genae". – Alao" Levi zo: qe wa thoe mo" ke' mung: Israel amyu" zo: qe ceru: ein: zag: yao nae" dao: kheim: jham wa ,15 Mo"so ca' ra" ga" ru wa lo, mau" jhao yaug: lo; yang kaid' ra" gyoe lho , co' kyaung" lhang" yu: ra" alho kaid' mung: gug' ra" jo, qo mae nyham" to" ra" yaug wa byuxa: voqoe, nae" ga: nhang" ke' ke' lao" volo byu qe wa Amen ga: tau: geshao: .16 Yao: myhi" yao: pho" re maphug' mamyao: kaid' ra" yaug wa byuxa: voqoe, shao: wo" ga: nhang: lao" volo byu qe wa Amen ga: tau: geshao: .17 Yham kyo: cao" mug: myid: kyo: dam: re qhui" ra" yaug wa byuxa: voqoe, shao: wo" ga: nhang: kheim: ke' lao" volo byu qe alhab' wa Amen ga: tau: geshao: .18 Myo, jid yaug re khyo nghung: nhao: ra" yaug wa byuxa: voqoe, shao: wo" ga: nhang: kheim: ke' lao" volo byu alhab' geim" Amen ga: tau: geshao: .19 Tarha" dao: phyid' ru mae getau: amyu" byu we' cug' zo: cug' mo" jham re tarha" mavao: ru seim nhao: ra" yaug wa byuxa: voqoe, shao: wo" ga: nhang: kheim: ke' lao" volo byu qe alhab' geim" Amen ga: tau: geshao: .20 Yao: pho" za: tin" ra" yao: pho" yham sang myhi" we' zam" ra" yaug wa byuxa: voqoe, shao: wo" ga: nhang: kheim: ke' lao" volo byu qe alhab' geim" Amen ga: tau: geshao: .21 Gug' nyhug' daja: ja: we' gaung sho: zam" ra" yaug wa byuxa: voqoe, shao: wo" ga: nhang: kheim: ke' lao" volo byu qe alhab' geim" Amen ga: tau: geshao: . –22 Pho" zo: myhi" zo: zomyi: ngaid: ra" yao: nhae: mo" we' zam" na: shaid' ra" yaug wa byu xa: vo: qoe; shao: wo" ga: nhang: kheim: ke' lao" volo byu qe alhab' geim" Amen ga: tau: geshao: .23 Yao: yao" yaug myhi" we' na: zam" shaid' ra" yaug wa byuxa: voqoe, shao: wo" ga: nhang: kheim: ke' lao" volo byu qe alhab' geim" Amen ga: tau: geshao: .24 Yham kyo: cao: re kung" yang: be; ra" yaug wa byuxa: voqoe, shao: wo" ga: nhang" ke' lao" volo byu qe alhab' geim" Amen ga: tau: geshao: .25 Pe" qobo re: maqo" yaug re se' nae" tau: aphug' yu: ra" yaug wa byuxa: voqoe, shao: wo" ga: nhang: kheim: ke' lao" volo byu alhab' geim" Amen ga: tau: geshao: .26 Ce: khang" dao: tarha" jham re malam macao" ra" yaug wa byuxa: voqoe, shao: wo" ga: nhang: lao" volo mo, byu alhab' geim" Amen ga: tau: geshao: .