1 Mug: gaung we" tae" gyo: wa, ngo ta" nae". Myid gaung we" ngo ta" ra" dao: re gyo: wa, .2 Nga" dao: wa mug: ce' ru: zo; gyo" mung: nga" dao: thoe nghin re" ru: zo" zo" dag nae". Nyug lao qam" vohau: yo dao mae qu: khyo" ra" mug: qid ru: , boe" nae".3 Ngo wa Mo"so: mang khyao: re qhu" byid: va" mung: ngonhaung" Mo"so: phung bao re caung: khin" ge, wo".4 Mo"so wa jo, qao: apain ngaid: , yao" lo, mau" wa dang main" ra". Vin tang" ru we' qobo mabo: Mo"so wa din: main: dang byang" ra" Mo"so ngaid: ra".5 Yao: bam gyoe; gyo" veko". Mo"so: zo: qe mangaid: . Anyain: avho" mo, za: ngaid: ko". Nhag' lam: kaui mung: tug' shai" ra" amyu" ngaid ko" ra".6 Juyi maba: ra" byu vhang: zi" amyu" qe we" Mo"so: jeju re cere" khyo: xe' genae" i"? AsAng Mo"so wa nao re poe" ke' ra" pho" , nao re khau myhung mung na tang ye, tang nhao yaug mangaid: i"?7 Geco' getoe: mae" ru re beim: so: wa, lai: lo" va" ta re dam: myid: qu" wa, . Ni" pho" re myid: wa, ta" kyo" li" nae". Kao qi: mo, re cao" myid: wa ta" kyo: genae".8 Tho' zhao" myhao mae" Mo"so wa A:Dam" byumyu" qe re kho' khaui: mung: xaosu byu re phain" ra" au: , Israel amyu" aso: re qug: qu" yang: myid kin: byumyu" qe: mug: kyo: dang: laug: re to" to: va".9 Mo"so: dai kham kam" yao" amyu" qe ngaid: ra". Yaku' yao" dai kham jo, nho" ngaid: ra".10 Pyaid' laid sede: cae: jhug tag ngaid mung: myang kha: zoqhid myang: yhai: ra" seyo segae: mae Yaku' re myao: ra". Yao: re lhaug' zaung" gug: gam byid yang: yao" voxao zo: re" ru: gug: gam: ra".11 Zeim baung: wa said' lhau: phyo' zo" maqao" ngho' nau" jham re yao" daung phyid: lhu: ci zo" re" ngho' nau" jham re yu mung: yao" daung" vho' yang gam: ci: lo" ru ru: ,12 Yaku' re jhui" lo" ru Mo"so yao: dayaug za: getau: mo"so khag' mabo: bo.13 Mug: myid mae myhao: thao" ra" jao: mae she: zhaung , myid gaung mae" qhovo: qho shi: re zo: mung: laug baui mae" byo: yhid re re: , myi: be; laug mae xau re re: ,14 yao nau" xau thaung: , Bashain: yao lo: , caid' be, lo: xau kug' , saung so gaug , noce' xau kug' we' nung: nug' xau , yao nug' re re: shaug' nae" akhyo kaid' mung: nao wa sabyi' shi: sa: agyang" re shaug' nae".15 Ngaid qere: Yeshurun: wa xau lam: lateim" ngaid mung: khyid: yang pag' ra". Xau lam: lateim" ru gaung yaung" ngaid qere: , Mo"so re shepye' mung: khyaid' khyi: ra" laung: mo" baui re maphug' makhyaid' kaid' ra".16 Yao: bam wa getau: mo"so: yang yao: re qu" nhung nhao ko"ra". Qu" ca' pho" ra" ja: re: yao: re zai" yho: ko" ra".17 Mo"so mangaid' ra" min: yui , mamyao maba: ra" mo"so , phug' pho" qe magyaug: qu" ra" mo"so asag' jham re caung da" ko" ra".18 Nao re khau myhung: ke' ra" laung: mo" baui re mabeim: lo: , nao re phain: ke' ra" Mo"so re to" myhid' pye' va" ra".19 Mo"so ai re myao mung: yao" zo: dau qe re yao: bam: qobo: mathao mae shepye' to: yang: ,20 Ngo wa maqu" zeim geim myo, mung nae". Yao: bam nhag' myid qao mung: khoru: boe" thao" ko" ru re qu" nae". Dao: so: mazaung: ra" amyu" qe ngaid ko" ra".21 Mo"so mangaid' ra" ja" yang yao: bam Ngo re qu" nhung nhao veko". Ai: mathao lo, nyhug' makhyug' ra" amyu" we' Ngo yao: bam re manug nhung nhao mung: azhaug' amhe' mung: ra" amyu" yang nhag' zai" yho: nhao nae".22 Nga" nhag' gyid' ru we' myi: ngha" ke' mung: no; thao" ra" movo: mug: joe" sho' nga" nae". Myid gaung we' qhovo: qho shi: nga" jeim: mung: bam khyid jham joe" sho' nga" lo" li" nae".23 Yao: bam: dao mae qug: khai: qam" khyo" ke' nae". Nga" myo: khe' jham gain sho' bag: zao: pye' nae".24 Yao: bam vae: moe; qid shab' alaung axi qhug' mung: , qug: khai: kyi" khyag' we' gyoe; gyo" genae" ngaid: ra". Myang kha: zoqhid zaui re re: maui kho" no, daug re re: , yao: bam jhao" Ngo nhao: khyo" ke' nae".25 Yham thaung: jao: kheim: mae shae lhae yham khug mae" gyaug din ci" pho: wa zomyi: zolau: re re: nug' shaug' zoshao we' au: phyu mao: zo: joe" sho' re phyo' qheim" li" nae".26 Ngo wa gyevo: nhag' lam: myhao: li" nae" ru maci". Gye she nae" mo, nghao" li" mung: ce: mau" zo" Mo"so qo" kaid' nae" mangaid: , ngonhaung" lo; yang: yao: kaid' va" ga: ta" nae" ru re maci" ,27 yao: bam re va" thao" mug: myid khyo khyi" khao: ngo" khyo pyo: sin" ke' mung: khag' re: mabeim: maso: lo: phyo' sham" khyo" pye' nae"ein: myid va".28 Khoru: ga" re yao: bam wa au: naug: sozo: madu: mo, nhag' myid juyi mabo mo, ngaid ko" ra".29 Yao: bam juyi qo" yu mung: ce: akhyo re ba: gyo: geshao: wo". Gau: thao" lao: mae pe" boe" nae" ru re myid: nghae" qu" na geshao: .30 Yao: bam khug ngha: na: laung: mo" baui yao: bam re ma-aung: ngaid: re , Mo"so yao: bam re ma qhaug' ngaid: re byu dayaug wa dataung re khoru: gai: aung nae" i"? Byu shid' yaug wa byu datug re khoru: gai: qo" khe' phao: thug' ke' nae" i"?31 Ngonhaung" re gye kaid' ra" mo, yao: re: ngonhaung" laung: mo" baui we' yao: bam: laung: mo" baui we' dau: ru mangaid: ga: ba: ta" genae".32 Yao: bam: sabyi' naui wa Sodom: sabyi' naui: amyu". Gomora' myid gaung mae yaug: ra" ja: ngaid: ra". Yao: bam: sabyi' shi: ao: kho: gae mae" ashi: ngaid mung: sabyi' paid' jham re: akho: za: ngaid: ra".33 Yao: bam: sabyi' qang: wa maui kho" no, daug thin: thao" ra" maui bab: daug ngaid: ra".34 Ce: akhyo alhab' wa Ngo mae bai" qaung" to: va". Nga" jo, nho" bain" mae so:35 xam: be; te' to: va" mangaid: i"?- Qobo dae byid: nae" akhang" ngo qo" to: va". Qobo we' main: qi" ru byid: nae" akhang" re ngo sang: ci va". Ayo, joe" lao" yao: bam tha" lang: genae". Yao: bam mae qug: khai: kyi" khyag' joe" nae" jhao" va". Phyaid phyaid za: joe" nae" ngaid: ra".36 Mo"so wa yao" amyu" re tarha" dao: phyid' nae". Yao" byu jham qam: o: gain: byaug genae". Kyam: laung" ra" mo, loe; ra" mo, khonho" khoru: ngaid: ru re myao lao" yao: bam: tau: nhag' myid atha" qo" byid: nae" ngaid: ra".37 Yao: bam: Mo"so yao: bam khug ngha: ra" laung: mo" baui khai: mae jo, ra" i"?38 Yao: bam caung da" xau kug' re zo: mung: vhe' sheim: caung da" jhaung qhu" sabyi' qang: re shaug' ra" yaug khai: mae na: laug i"? Yao: bam wa to" mung: naon- haung" re gug: gam vegeshao: .39 Ngo wa Ngo yao: Mo"so ngaid: na va" ru re: Ngo mae" jain" yang: getau Mo"so mana: lo" ru re qu" ba ge, Ngo wa kao re qo" shid nhao: kao re re: gai: daui: li" nhao: . Dae te' ru re: Ngo zai" gai ru re: Ngo Nga" lo, mae" khag' yang re: maqo" khyaid' she: yu genae".40 Mug: gaung khyo Nga" lo, tau: qang mung: thain" madaui gyag maqui: adaui: na yaug Ngo ngaid: ru we' dakhyo: ,41 Ngo wa bao qhi: ra" shae re nyhang" saui: mung: Nga" gyevo jham re qobo tarha" pyam" nae" seim" ci zo" re" Ngo re nghang" ra" mo, re main: qi" ra" qobo dae byid: nae".42 Nga" myo: khe' jham re sa" yang yhid nhao nae". Nga" shae wa byu se' yaug byu myhag' ra" mo, sa: we' gye sin: thu qe: au: lam: re zo" li" nae".43 Labug: amyu" qe yao" amyu" qe we' daga" ngaui bau: ge, khoru: ga" re AsAng: jeim qe re se' ra" mo, re qobo dae byid mung: gyevo qe re pyam" yhin" nae". Mang: din" we' yao" byumyu" qe re khyaid' khyi:44 yu nae" ga" ra" , ce: caung: nghaui" thoe re Moshe li" mung: Nun" yao: zo: Yoshu' we' daga" amyu" zo: qe re ta" kyo: ko"45 ra". – Ai re" ru: Moshe wa ce: dao: alhab' geim" re Israel amyu" zo: qe alhab' bam: re46 ada" zo, ta" nghaui" kyo: bin lao". – Naon- haung" re ana" ne, ngo sagso: byid' ra" dao: kheim: jham re nhag' myid: mae ke' to ge, . Naonhaung" zo: myid: qe wa ce: khang" dao: tarha" jham re cao" pyang" ye: genae" tau: mae" yao: bam re dakai" dam: pin: to:47 co' ge, . – Ce ru wa mageim" mau" zo" mangaid: . Naonhaung" kao so' we' tin" ra" mau" zo" ngaid: . Yodain: gyaung: gau" de, mung: lo" vao: sang nae" mang: mae cegu: re cao" pyang" ko" re wa kao qhang myo, myi: genae" ga: mho: kyo" ra".48 Mo"so wa ai: ba mae yao: Moshe re49 mho: ru wa , – Yerikho" tau" te' Mo"ba' mang: mae" Abarim" bam jin Nebo" ga" bam nyaug khyo do, lo" mung: Israel zo: myid: qe re Ngo byid: nae" Khanain: re byu:50 qu" yu wa, . – Ni" mao: Arun: Hora' bam mae shid mung: yao" amyu" phaung khyo lo" ru we' dakhyo: za: nao re: ce: nao do, lo" ra" bam mae shid mung: ni" amyu" qe:51 phaung khyo lo" se, . – Khoru: ga" re Zina' seyo: din" Kadesha: jo, qo mae" Meriba' qid thug' anhae mae Israel amyu" qhid' kheim: mae Ngo re maphug' mamyao:52 kaid' yang: zai" shaid' veko". – Aru: mung: Israel amyu" qe re Ngo byid' ra" mang: din" wa ni" myo; yang myao ngaid yang: re: ai: mang: khyo boqo" vao: sang nae" mangaid: ga: Moshe re mho: ra".