1 Ce: ru wa Horeb bam mae Mo"so Israel zo: myid: qe mae to" ra" dao: thang" mae" getau Mo"ba' mang: mae Moshe ai: amyu" qe we' dao: jho" thang: nae" Mo"so pin: to" ra" dao: thang" dao: kheim: jham ngaid:2 ra". – Moshe wa Israel amyu" zo: qe alhab' geim" re dam: khai yang: Mo"so wa Egutu mang: mae Pharaoh jhaung zug: mae re: , yao" jeim alhab' mae re: , yao" mang: din" geim" mae re: , naonhaung" yao" myo, qhao: tae mae kaid' qhu" ru jham wa , –3 yao: yao" myo; yang the' myao va" qi" thao" lag yu: ru gyai qi" ra" ve, lho we' mug' pho: phung bao jham re naonhaung" myao: qu"4 veko". – Ngaid qere: ba: gyo: nae" nhag' myid , the' myao nae" myo, jid' ,the' gyo" yu nae" no: khye' jham re Mo"so wa ana" ba joe" sho' naonhaung" re mabyid: shi: ,5 Ngo wa naonhaung" re byid xe zin lam: lam: seyo segae: khyo" jhui" dai" lo va". Naonhaung" mai bau: maqeim: majaid6 khyid zhaung: re: maqeim. – Naonhaung" wa cinmain" re mazo: , sabyi' qang: we' yhid re mashaug' lo: na ko" mathao mae Mo"so wa naonhaung" Mo"so ngaid: ra"7 khyo re ba veko". – Naonhaung" ce: jo, qo khyo joe" ko" au: Heshabung: jhaung zug: Shihung: we' Bashain: jhaung zug: Oga' wa ngonhaung" re khaid' nae" thug' li" lo ko" ru re ngonhaung" yao: tao re khaid'8 aung: mung: , – yao: bam: mug: myid re sang: yu yang: Rubin: amyu" , Gaid' amyu" , Manashe: amyu" dakhyae: re gae byid: va".9 Ai ru: mung: naonhaung" kaid' ra" ja: khao: ja: ngo" mae aung doe, nae" tau: mae ce: dao: thang" dao: jham re qu" gam10 mung: cao" na ge, . – Ni" Mo"so boe" na nae" tau: mae ana" ne, nao we' to" ra" dao:11 so: re yhin" yu nae" ga: yang: , – naon- haung" amyu" mae" au: she mo, ade, nhag' bo qe zug: agyi qe we' Israel amyu" myiqe: yaug gai zoshao qe mae" dadu, qid khae thao: qho mo, khug ngha: bang" vo12 jham alhab' , – naonhaung" Mo"so: qhid' kheim: mae ana" ba ye; jo; na: bam veko".13 Ai mae" getau ce: dao: thang" ce: dao: so: re naonhaung" we' za: to" ru14 mangaid: , – ngonhaung" Mo"so: qhid'15 kheim: mae ye; na ko" mo, we' re: , – ana" ne, cemae ngonhaung" mae mabo shi" ra" mo, we' re: ngo dao: so: to" ru ngaid: . –16 Egutu mang: mae ngonhaung" khoru: na: lai: lo: ru re: , gyaung: khyo mae su pe" byumyu" qe: agaung: khyo" khore" ru: lai: phyid' lo: ru re re: naonhaung" ba veko". –17 Yao: bam: maca' majhaid' ngaid: ra" sag' thaung: alho , laug baui alho , hhang: yang kaid' ra" alho we' ngaui sheim" ra" alho18 jham re myao: lo veko". – Ai ru: mung: nyhao: nhaung" Mo"so jhao" mae" khyo nghung" lo" nae" nhag' myid bo yang: yao: bam: mo"so re yegoe; pa" ra" yaug gai , myiqe: mangaid: lao" amyu" akaung ako' dalam: lam: naonhaung" mae mabo: bo nae" re: naonhaung" mae khin cid' ngaid: ra" myaug daug shi: zaui: ba: ra" apain agyi:19 mayaug: li" nae" re: , – ai ru" ra" yaug wa ce: nhang: kheim: dao: the' gyo" ra" au: nhag' lam: qao: ru we' dakhyo: ngo cao" mung: zo" yid shaug' yid ngaid yang: re: ngo wa ngaui pyo: nae" ga" byu mabo:20 thug' li" nae" ru re lha" wa, . – Ai: yaug re Mo"so pe" o: do nae" mangaid: . Mo"so nhag' gyid' ru we' manug: ra" nhag' myid wa ai: yaug: dao mae myi: ru: de; na mung: ce: jham: tung" mae tung" to" ra" nhang: kheim: jham alhab' re ai: yaug: adao mae zao" zaug nae". Mo"so wa yao" mang re mug: gaung gyid' mae said' shao: pye' nae" ngaid: ra".21 Mo"so re: ce: khang" dao: tarha" mae tung" to" ra" nhang: kheim: dao: thang" we' dakhyo: ai: yaug re Israel amyu" anyaug khug mae" phoe' pye' mung: qobo dae byid: nae" tau: mae kho' kao" to: nae"22 ngaid: ra". – Yao: bam: mang: mae Mo"so qobo dae byid' ra" no phyo: kyi" khyag'23 jham re re: , – Mo"so nhag' gyid' mung: tau: lhain" mhaug' pye' ra" Sodom: vo , Gomo ra' vogaung: , Adama: vogaung: , Zebain: vogaung: jham byo; qeim: lo" ru ru: damang: din" geim" fang we' xo: myi: nga" mung: myug: shi: masin: qhovo: qho shi: mazaui: mhin: zo: laung la mayaug: ra" akhyo re re: naonhaung" thao mae24 boe" lo nae" naonhaung" amyu" , – thao phyao" ta mae naonhaung" zo: myid: qe we' mug: va" mang: mae" joe" lo: ra" byu bang" jham the' myao ko" ra" au: ce: mang: din" re pe" mung: Mo"so wa ceru: kaid' i" ? Ce qhi" yao: nhag' gyid' ru wa khoru: i"?25 ga: myid' lo: li" genae". – Alao" byu geje wa yao: bam phug' pho" qe goe; pa" lam khug: lo: ra" Mo"so wa yao: bam re Egutu mang: mae" jhui" thug' lo: au: yao: bam we' to" ra" dao: thang" re phyo' ko" ra"26 mathao mae re: , – qhid' phyao: yao: bam maba , yao: bam re pe" so' ha" re: mabyid' ra" getau: mo"so jham re lam khug goe;27 pa" ko" ra" mathao mae re: , – tung" paug' tung" to" ra" nhang: kheim: alhab' re ce: mang: mae khyo" ke' mung: Mo"so nhag' kyid kyid yo" ru wa myi: ru: de; na: ru28 we' , – yao: bam: mang: din" khug mae" yao: bam re khe' thug' mung: ana" ba joe" sho' getau: mang: khyo khe' thug' pye' ru ngaid: ra" ga: ta" kyo: genae" ngaid: ra". –29 Nyham" to: vho' to" ra" gu: wa Mo"so we' tin" ra". Ce: pin: to" ra" tarha" alhab' gu: wa ngonhaung" qo" cao" sho' qhu" to" ra" gu: wa ngonhaung" we' ngonhaung" zo: myid: qe we' malam: lai: tin" na nae" ngaid: ra".