1 No lo" ra" yao , nung: jaung , mayaung" malho" daja: ja: qo bo: ra" yao , nung: jaung ni" Mo"so re xeim: magai: caung da" nae". Ai ru" ru re ni" Mo"so AsAng: tau: maca' majhaid' ngaid: ra".2 Ni" Mo"so nao re byid' to" ra" vogaung: jham mae yaug gai myiqe: dayaug yaug Mo"so: khang" dao: re lhoe" mung: , –3 getau: mo"so re mangaid: lao" ba kyi lho" mo" , mug: gaung mae" ajham ataung daja: ja" akhyo cao" yang: goe; pa" ru we' yao" qhid' kheim: mae mangaid makhung" kaid'4 ko" re wa , – ai: lau dao: nao the' gyo: mung: gelho: ca: qu" ra" au: Israel amyu" mae ai re" ru: mangaid makhung" kaid'5 ru dang dang ngaid: re , – ai: mangaid makhung" mau" zai" thug' ra" yaug gai myiqe: re voyae kham: mo" dung: khyo she: ye: mung: laug baui: yang pye' se' ca"6 nae". – Sagso: shid' sam yaug bo: ngaid: re shid main: qi" ra" yaug wa shid: ru qhug' ca" gau , sagso: dayaug za: ngaid: re magai:7 shid nae". – Ai: yaug re se' nae" ngaid: re sagso: qe shi" lo, mung mung: vo lo byu qe lo, mung zai ngaid nae". Ai ru: kaid' lao" naonhaung" mae" makhyang: mashab: ru shao" lo" zai ngaid: ra".8 Ni" vogaung: mae xao au: gyoe laug: mau" yug: no mau" , se' da: be, khyaid' mau" thug' li" mung: nao maqo" zai" yhab' dao: maqo" phyid' ngaid: re ni" Mo"so aso:9 zhaug' to" ra" jo, qo khyo ye: mung: , – ai: ayo, mae tarha" agyi kaid' ra" khin jaung Levi zo: qe: qhid' kheim: ye: zhao: kyo: ca" nae". Yao: bam re: nao khoru: kaid' nae"10 akhyo re ceim" shid' li" genae". – Mo"so aso: zhaug' to" ra" jo, qo mae" mo, khyo shid' ko" ru we' dakhyo: nao cao" kaid' ca" nae". Yao: bam mho" shid' ru we' dakhyo:11 cao" yang: zaui: so: ca" nae". – Yao: bam nao re ceim" shid' ko" ra" tarha" we' dakhyo: re: , yao: bam dao: phyid' byid: ko" ru we' dakhyo: nao cao" zaui: so: zai ngaid nae". Yao: bam ceim" shid' ko" ra" gau: khyo mae" lo, vai: lo, yo gai: nghung:12 nae" mangaid: . – Ni" Mo"so: qhid' kheim: mae mau" vin: ra" khin jaung pho" we' tarha" agyi pho" dao: re matae" gyo: lo: tau thaug' lhoe" lai: ra" yaug re shid sho' se' ru: yang Israel amyu" khug mae" magai malho" ru re shao kyang" pye' ca" nae". –13 Alao" amyu" zo: qe alhab' wa ai: lau dao: the' gyo: mung: gyaug: nhag' myid bo: li" ru: yang thao phyao: yao: yao" nhag' myid macao" lona: na: li" genae".14 Ni" Mo"so byid' ra" mang: re nao lo" vao: sang: yu mung: na: ra" ayo, abang: mae nao wa nga" lhang" gam: mae na ko" ra" getau: amyu" qe re" ru: dayaug yaug re jhaung zug: aya: tau: to' nae" ga:15 myid: ngaid: re , – ni" Mo"so khyin: yu byid' ra" yaug , ni" amyu" mao: nhaung: yao: cao: re za: jhaung zug: aya: gai: byid: nae" ngaid: ra". Ni" amyu" mao: nhaung: mangaid' ra" getau: amyu" re jhaung zug:16 magai: kaid' nhao nae". – Ai: jhaung zug: wa yao" tau: myao: myo: sho' gai: khau myhung nae" mangaid: myao: myo: sho' qo" sho' ga: Egutu mang: khyo byu re gai: nhao nae" mangaid: . Ai: gau: khyo naonhaung" khonhae" re: magai: ye: lo:17 nae" ga: Mo"so: mung dao: jo; ra". – Yao" nhag' myid manghung: veshao: ga: yham sang myhi" myo: sho' magai: yu. Ngaui hhang re re: myo: sho' magai: qho: qaung: nae".18 Ai: jhaung zug: wa zo" qae: myid' xag' we' daga" Israel amyu" mae kao qhang myo, myi: qo" ug nae" tau: mae yao"19 Mo"so re gyaug phug' na mung: , – ce: khang" dao: tarha" dao: kheim: alhab' geim" re qo" cao" pyang" sho' mho" nae" we' yao" mao: nhaung: qe mae nga: mayu ngaid mabeim: lo: za: khang" to" gau: khyo mae lo, vai: lo, yo khyo thaung"20 mavao nae" tau: mae , – yao" la kin dao mae zaung: ra" au: Levi amyu" khin jaung: lo, mae jo; ra" khang" dao: tarha" tung" dang: re ko' kau: tung" yu mung: dapyaid dato nghe' xeim: xam" yu ca" nae".