1
Airu: mung: ngo myid: shi: nae".Mo"so wa yao" byu qere shepye' pye' va" i"? gai gai: yao: mapye' malhae" ngaid: ra". Khoru: ga" re ngo yao: re: Israel amyu" dayaug ngaid: ra". Abraham: zo: myid: Benyamin: boe:2
mae" ngaid:. – Mo"so wa aqhid mae" yao: khyin: yu: ra" amyu" re mashepye' ngaid: ra". Elia wa Israel byumyu" re qobo vhin3
mung: – AsAng we" yao: bam wa ni" lapa qe re se' pye' veko". Ni" phain jham rere: phyo' sin" pye' veko". Ngo dayaug za: adang lo". Yao: bam wa ngo rere: se' nae" seim" na: ako"ga: Mo"so re mho' yao: ra" jham: dao: mae naonhaung" maba ko" i"? ga:4
mho: ra". – Alao" Mo"so wa khoru: ga: dam: phaug' tau" ra" i"? ngo wa byu nhaid' taung yaug re nga" tau: mae" tang" to: va". Yao: bam wa Bala' alho re magoe; pa" ngaid:5
ra". – Ana" re: ai we' dakhyo: ngaid: ra". Yao" nhag' myain" ra" jeju khyo" yang yao: khyin: yu: ra" byu dajhid' dang: jo; ashi". –6
Mo"so yao: bam re khyin: yu: ru wa yao: bam: lo, mau" re qao: tae to: mung: khyin: yu: ru mangaid: ngaid: ra". Pe" mung: ein: re lo, mau" zo" khyo" yang khyin: yu: ngaid: re yao" nhag' myain" ra" jeju wa agyang"7
mangaid: ngaid: ra". – Airu: lao" wa khoru: i"? Israel byu qe wa yao: bam qo: ra" ja: re mamyao ko" ngaid: ra". Khyin: yu qhug' ra" mo, kam" wa the' myao: ako". Dang: ra" mo,8
wa myo, jhid' pye' ru qhug' ako". – Jham: tung" mae Mo"so wa yao: bam: myid nhag' lam: re vhao: lo" nhao: ra". Ana" ba joe" sho' yao: bam maqo" myao maqo" gyo: lo: ko"9
ngaid: ra". – Davi re: mho: to" ashi" yao: bam: zo zo: gai" wa yao: bam: taui: kheim" , dang" kam" , lha" jham mae myi" nae" main: qi" ra" qobo dae the' khae: yu vegeshao:.10
Yao: bam mamyao genae" tau: myo, jid: byaug: veshao: . Yao: bam: dao gaung: wa qug: khai: qola: vin yang: dao gug' byaug veshao: ga: ta" ra".11
Airu: ngaid: re Israel byu qe tha" lang: yang: yao: bam byo; qeim: lo" veko" ra" i"?. Airu: re: mangaid: taung bug qere yao: bam myid nug: genae" tau: mae" yao: bam shaid' nghung" qobo: yang khyaid' yu: ru wa labug byumyu" qe jhao" joe" li" ava". –12
Ana" yao: bam tha" lang: jao: boe" ko" ra" akhyo wa myidkin byu qe na: dai: khyo rere: , yao: bam seim" byaug; ra" akhyo wa taung bug amyu" qe: tau: na: dai: khyo rere: boe" byid' ngaid: re yao: bam: jab byang" ra" akhyo jham je: qo" poe" byid: nae" mangaid: i"?.13
Ngo naonhaung" labug amyu" qe re ta" peim" ru wa ngo wa labug amyu" qe: logyo: dayaug ngaid: ru we' nga" mau" zo" re ngo14
langa: yu: ra". – Ngo wa ngoyao" amyu" qere qu" myid nug: nhao yang: yao:bam mae" daqhae: khyaid' yu: ru qhug' yu: li"15
genae". – Pe" mung: ga" re yao: bam re khyang" khyo" pye' ru wa myid kin byu jham Mo"so: gyevo ngaid: ru mae" yao" ba nam boe" lo nhao: ra". Airu: mung: Yuda, Byu qe Mo"so re dam: khae: yu lao" khoru: ngaid nae"?. Ai wa shid: ra" mo;16
tau: mae" kao so' ngaid: li" nae". – Ashi: shaogyang" lao" wa ai: ashi: mae" thaung" yu: ra" cinmain" re: shaogyang" ra". Agyi: shao gyang" lao" wa akaung ako' re: shao17
gyang" ra". – Zhainlun: gae agai mae" akaung damyo" re xae" khyo" mung: ajeim gae mae" akaung re gae dai we' dam: xo' mung: agyi: mae" jin" we' min jham re yao" akaung ako' jham we' daga" bo:yaug:18
ngaid: re – Airu: mung: xae" khyo" pye' ra" akaung jham we' dau ko" ra" Yuda, qere daqu" ngaui ge, naonhaung" khoru: qo" nghao" genae" i"?.Naonhaung" wa akaung jham za: angaid: ako". Naonhaung" wa agyi: re bao" thaug' byid: mo, mangaid: agyi: jham: yang naonhaung" re bao" thaug'19
byid' ako". – Nao ta" nae" dao: jo; ashi" ngonhaung" wa xae" pye' ngaid yang: re:20
xo' yu: ru qhug' ashi" ga: genae". – Ai wa dang: ra". Yao: bam malam" ko" ru: yang yao: bam xae" khyo" pye' ru qhug' ako". Nao kam" wa myid khyo" yang gang: tang: na: ashi". Airu: mung: nao danghao" na ai21
atha" gyaug: lha" yang: na wa, – Mo"so wa azhao: mae" yaug jo, gau akaung gyang" jham ngaid ko" ra" Yuda, qere lao" matang" to" re nao re tang" to" li" nae" ein:22
dajho. – Airu: mung: Mo"so wa nhag' ba: khyag' yaug ngaid: ru we' gyai thin yaug re: ngaid: rure ngonhaung" qu" ba: yu: ra". Qobo kaid' mo; adao mae thin ngaid qere: naonhaung" wa yao" nhag' khyag' nhag' myain" khug mae kao xo' daui: na ko" ngaid: re nhag' khyag' shogu: li" nae". Ngaid qere: naonhaung" airu: kao madaui ko" ngaid: re xae" khyo" pye' ru qhug' li"23
genae". – Aimung: Yuda, qe yao: bam malam khug: ra" nhag' myid re to" pye' ko" re azhao: mae" yao: bam: angaid mae dam: xo' te' byid' ru qhug' li" genae". Pe" mung: ga" re Mo"so wa dam: qo" xo' zham: yu:24
ra" yaug ngaid: ra". – Khoru: ga" re Zhain- lun: ajeim gae mae" akaung xae" yu mung: Zhainlun: agyang" gae mae xo' gai: ngaid: re agyang" gae mae" akaung jham wa yao: yao" agyang" gae mae xo' qho: nae" ru wa je: gai nae" mangaid: i"?.25
Nga" mao: nhaung: qe we" no; thao" ra" dang main" khyo dalam: re ngo naon- haung" re ba nhao nug: ra". Ai wa naon- haung" yao" aung khug mae ngaid beim" nhag' myid mabo veshao: ein: ru ngaid: ra". Labug: amyu" qe bin sho' mo, vao lo ko" ayo, joe" sho' Israel amyu" qe mae" daqhae: wa nhag' lam: qao: na genae". Ai:thao mae she, Israel amyu" qe khyaid' yu: ru qhug'26
genae". – Ce: akhyo re jham: paug' mae tung" to" ru wa khyaid' yu: AsAng wa Ziun: mae" thug' li" nae". Yaku' zo: myid: qe: makhyang" ra" khyo re yu: pye' li" nae".27
Ngo wa yao: bam: qobo re yu: pye' byid: lao" yao: bam we' ce: dao: thang" re ngo to: nae" ga: ta" ru we' dakhyo: ngaid:28
ra". – Pe" mung: ein: re ngaui bau: lau dao: khyo" ga" re naonhaung" wa gyevo ngaid: ako". Khyin: yu qhug' ra" akhyo khyo" qu" tau" ke' re kam" phug' pho" qe: mathao29
mae yao"jhid' de, mo, boe"ako". – Khoru: ga" re Mo"so: agyid aso we' khyin: yu: khyo30
wa malam: lai: ngaid: jo; ra". – Pe" mung: ga" re lai: lo" va" ayo, abang: mae naon- haung" wa Mo"so: dao: re matae" gyo" ra" mo, ngaid geyang: re: ana" naonhaung" wa31
nhag' myain" yu: ru qhug' veko". – Ana" au: mho dao: re magyo: shi: ko" mo, re: ai we' dakhyo: za: ngaid: va". Naonhaung" nhag' khyag' ru qhug' ko" ru: yao: bam re: the'32
yu genae". – Khoru: ga" re Mo"so wa yao" nhag' ba: khyag' rure qhu" nae" tau: yao: bam alhab' mo, re mho dao: magyo" ra" mo, phaung mae" byu boe" nhao: pye' ra".33
Mo"so: aung gyang" ru we' bajhao se" khyo wa khoqhi" no; ru khoqhi" myhao: qi" rure khoyaug ma tho' ba. Yao: myid dau tau" ru we' yao: kaid' ra" akhyo jham re34
khag' re: maqo" ba: . – Jham: tung" mae AsAng: nhag' myid re khag' ba: jhoe" ko"?35
yao: re khoyaug juyi qo" byid' i"?. – Jeju re jhin dam: qo" xe' nae" tau: Mo"so re khoy-36
aug pe" byid' qu" ko"?. – Khoru: mung: ga" re ja: khao: ngo" wa yao: phain" to: mung: ja: khao: ngo" alhab' wa yao: khyo" yang we' yao: tau: mae" boe" na: ru za: angaid: ra". Myid gaung aqae: qae: yao" phung bao wa agang" tang: na veshao: ga' wo" . Amen.