1 Nga" mao:nhaung: qe we" Israel byumyu" qe khyaid' yu: ru qhug' genae" tau: nga" aung khug: nhag' lam: alhab' we' gyai kao bau: ru mung: yao: bam: tau:2 Mo"so jhao" jhaung: bao" mho' ra". – Yao: bam wa Mo"so re gyai phug' myao: kao bau mo, ngaid: rure ngonhaung" re zhaug' za: sagso: qo" kham byid' ra". Ngaid qere: yao: bam qhug' myao kao bau: ru wa dang main" ra" laba lajhao khyo" mangaid: ko"3 ngaid: ra". – Yao: bam wa Mo"so: dang main: khyo re maba ko" mung: yao: bam yao: kaid' yu: ra"khyo re qam: ke' cao" ako". Aimung: Mo"so: dang main" khyo re4 makhae: yu ko" ngaid: ra". – Airu: mung: Khristu wa lam jang" ra" mo, yaug khao: ngo" tau: dang main" tarha" mae jab byang"5 byid' ra". – Khoru: mung: ga" re Moshe wa byu qe yao: yao: zaui" ra" mau" zo" yang yao: wa daui: na nae" ga: khang" dao: tarha" dang main: khyo re tung" so" to: co' ra".6 Lam jang" myid: dang main: khyo re ta" ru wa ceru: ngaid: ra". Khristu re jhui" khyo" yu nae" tau: mug: gaung khyo khag' do, lo" nae" ein: naonhaung" nhag' khug7 mae damyid ge, – Airu: mangaid: lao" Khristu re shid: ru mae" dam: daui: to" yu nae" tau: no; thao" dung: gyain: khyo8 khag' gyo"ye: ko"?. – Jham: dao: mae ta" nug: ru wa mung dao: wa nao we' te' te' mae ngaid: ra" ni" nhaid' mae re: , ni" nhag' lam: khug mae re: bo: ga: ta" ra". Airu: ein: ru wa ngonhaung" hau" kyo" ra" lam khug9 tarha: re mho nug; ru ngaid: . – Nao wa AsAng Yesu re nhaid' khyo" khae: yu mung: Mo"so wa yao: re shid: ru mae" daui: to" li" nhao: ra" ga: nhag' myid khug mae lam jang" re nao khyaid' yu: ru qhug' li" nae". –10 Dang main" ru mae joe" nae" tau: nhag' lam: aung khug khyo" lam khug ca". –11 Khyaid' yu: khyo qo" nae" tau: nhaid' khyo" yang re: khae: yu ca".Jham: tung" mae ta" to" ru wa ai: laug baui re khug pao: ra" yaug qho' gyaug ma phau: genae" ga:12 tung" to" ra". – Yuda amyu" , Helini amyu" re makhyin byu alhab' mo; re gug: gam: ra" AsAng dayaug za: na mung: yao: re jhaung: mho' ko" alhab' mo, adao mae jeju la laug:13 jo; ra". – Mo"so: mang kheim: re lao: yang: jhaung: mho' mo, alhab' wa khyaid' yu: ru qhug' li" genae".14 Ngaid qere: yao: bam malam" ko" ngaid: re wa AsAng re khoru: ba: mho' yao genae".Yao: bam magyo" qu" ra" yaug re khoru: ba: lam" genae". Ta" kyo: yaug mana15 re khoru: qhug' gyo: nae" i?. – Mung dao: ta" kyo: nae" mo, re manhao: ke' re kho- yaug ba: cao" ta" hau" qin" genae". Jham: tung" mae yaug yo cae: tae" ra" gai: ra" ngaui bau: dao: re hau" kyo" qin" ra" mo, we' gai: ra" ja" akhyo re ci: li" ra" mo; khyid wa yaung" thao" va" ga: tung" to" ra".16 Ai qere: byu alhab' mo; wa ngaui bau: lau dao: re matae" gyo: ko".Esaia pa dao: mae AsAng we" ngonhaung" hau" kyo" dao: re khoyaug lam" ko" i"? ga: ta" to" ra". –17 Airu: mung: lam jang" myid wa the' gyo" yang ngaid: ra".The' gyo" ru wa Mo"so: mung dao: khyo" mae" qo" yu: ru ngaid:18 ra". – Ngaid qere: yao: bam ai:mung dao: re mathe' gyo: ga" ru dang: i"? ein: ngo myid: nug: ra". Yao: bam wa gaigai: yao: the' gyo" yu: aveko". Pe" mung: ga" re jham: tung" mae ai: dao: re ta" hau" kyo" ra" mo; thoe wa myidkin geim" mae byang" sheim: jo; ava". Yao: bam: dao: kheim: jham re: myidkin gye, geim" thao" sho' khyo byo: lo" va" ga" dao: we' dakhyo: dang dang qo"19 gyo: veko". – Aimung: Israel qe maba: gyo: genhaung i"? Mo"so wa Moshe khyo" yang ngo wa pe" mangaid' ra" mo, re ci mung: nga" byumyu" re myid: mug' nhao: nae". Nhag' magyang" ra" byumyu" qe khyo" yang nga" byumyu" re nhag' yo: nhao nae" ga: mho: to" ra".20 Ailao" Esaia wa vae" vae" za: mho: ashi" ngo re maqho ko" ra" mo, wa ngo re myao: ako".Nga" akhyo re mamyid: maqin" ra" mo, re nga" gaung qhu" byid: va" ga: ta"21 ra". – Israel amyu" qere qang mung: mho: to" ru wa mho dao: re magyo" ru we' dae" ra" amyu" adao mae dane, geim" nga" lo, yheim" qang: to" ga: mho: ra".