1 Ai:au: Agipa zug: khyo" nao ni" akhyo ta" nae" akhang" qo" va" ga: Po"lu re mho: ke' lao" Po"lu wa yao" lo, qang: ke' mung: qobo pheim: qhu" dao: re ta" ra".2 Mang: zug: Agipa we" Yuda byu qe: sam" ve, li we' jho" ngag: yhai: ra" akhyo ada" zo, re nao je: ba yaug ngaid: naeva"3 ru mung: – Yuda byu qe ngo re qobo vhin ko" akhyo alhab' re ana" ba ni" qhid' kheim: mae qobo bain" dao: qo" ta" ru wa ngo mae ngaui lho" ra" ein: khae: yu: ra". Airu: mung: nhag' lam: qhang qhang za: ngo ta" ru tae" gyo: byid: nae" mho' vhao"4 ra". – Sao qhid' ngo ve, qae" zoshao ban: mae" nga" byumyu" mae re: Yerusalem: mae re: ngo na: lai: co' va" ave, Yuda byu5 qe ba gau ngaid veko". – Genhae" mae" nga" akhyo ba ko" ru mung: ngonhaung" lam khug; li mae" thin: thao" Phareshe" ga" mo, thaui: mae ngo bo: ru wa yao: bam sagso: kham nug ko" re qo" kham:6 genae". – Mo"so wa phug' pho" qere byid' to" dao: so: mae" myid nghae" khyo daja" yang ngo re ana" ru: myid' ca pyam" ru7 ngaid: . – Ai: dao: so: jeju qo" the' yu veshao: ngonhaung" daxe: shid' nyaug: geim" myi" na" AsAng re lam khug qam: ke' na: bam: ra". Ai myid: nghae" ra" akhyo: yang mang: zug: Agipa we" yuda byu qe ngo re qobo vhin ko" ru ngaid: . –8 Shid va" mo, re Mo"so taui: to" yu nae" ga" akhyo re magai: khae: yu ein: naonhaung"9 pe" mung: myid; na ko"?. – Nazared' vo byu Yesu mang khyao: we' tug' shai" mau" zo" qo" kaid' qhi" kaid' nae" ein:10 ngo myid: phyid' qu" va". – Ai: akhyo Yerusalem: mae kaid' va". Khin jaung qe mae" akhang" qo" mung: shaogyang" mo, re kyam: lhaung" qu" va". Yao: bam re se' pye' ko" au: ngo re: gyai bo: ngaui bau:11 va". – Ham phaung yham mae re: alhang lhang qug: khai: byid; mung: Yesu re gaui mho shao" pyao: kaid' qu" va". Yao: bam re qi" ra" qug: khai: dae byid; mung: getau: mang: mae joe" pyam" yhin" qu" va".12 Ai re" ru: khin jaung aqi: qe byid' ra" akhang" yang ngo Damasku khyo do, lo"13 va". – Aire ba tho' je: bao: ra" bo" bao khyo mae ngo we' nga" byin cao: qe: avai: ayae mug: gaung mae" bao: thug' li" ru na" gaung: kao" mae ngo the' myao: ra" mang:14 zug: Agipa we". – Ngo we' ai bam myid gaung mae lang" de; na: au: Sholu Sholu ngo re pe" mung: yhin" na: i"? zau: ceim re pag' yu: re ni" qhid' mae" qug: khai: yao: ngaid nhaung ga: Hebre myain" khyo" ta"15 ru ngo the' gyo" ra". – Ailao" AsAng we" nao khag' ngaid: ein: ngo myid' ke' re ngo wa nao pyam" yhin" na: Nazared vo mae"16 Yesu ngaid: ra". – Ai qere: to" ye, wa, Ngo wa Yuda byu qe taung bug byu qe: lo, mae"17 nao re khyaid' lhoe' yu va". – Nao ngo re18 qo" the' myao va" akhyo we' – Ngo nao re bao: qhu" shi" nae" akhyo: jham mae mau" vin yaug sagso: kham yaug boe" nae" tau: mae" jaung: to: nae" ein: Ngo li" ru ngaid: . Taung bug byu qe mug: caid' mae" mug: bo" khyo satain" qam: so' khug mae" Mo"so shaid' khyo lhang: lo yang: qobo khyaid' pye' ra" jeju qo" yu nae" we' ngo re lam khug: ra" mathao shaokyang" yu qhug' va" mo, we' daga" Ma qo" khae: yu sho' yao: bam myo, bung" lo genae" tau: Ngo nao re yao: bam jhao" nhao: ke' ra" ga: mho: ra".19 Agipa mang: zug: we" mug: gaung mae" thug' li" ra" lamyhung" re matae"20 gyo: lo: ngo maqo" na. – Ai: akhyo re sao qhid' Damasku mae ai: thao Yerusa- lem: we' Yuda mang: geim" mae re: taung bug byu qe nhag' lam: atha" qo" lhang: lo vegeshao: ein: taung bug byu qere re: hau"21 kyo" na: ra". – Ai: akhyo: jham: yang Yuda byu qe pa" jhaung: yham mae ngo re taui: mung: se' nae" ga: gyai qam: ke' veko". –22 Aiqere: Mo"so lhoe' yu: ra" je ju ngo qhug' khae: yu mung: ana" ba joe" kao daui: na:23 ru ngaid: . – Khristu qug: khai: the' kham nae" we' shid; ra" mo, mae" sao qhid' daui: to" li" mung: yao" byumyu" we' taung bug byumyu" qe re bo" bao bao: qhu" byid: nae" ga" ru boe" lo nae" akhyo lapa qe we' Moshe hau" kyo" mae" je yang: ngo getau pe" re: mata"ga: zhao: kyo"ra".24 Aire" ru: Po"lu yao" qobo loe, dao: bin: zhao: kyo: thao Festu zug: wa Po"lu nao go: ava". Juyi myo: sho' xeim: ci mung: ko" byaug; ava" ga: thoe mo" hug' yang: ta" ke'25 ra". – Po"lu khyo" re: qi" qhang: ra" Festu zug: we" ngo wa ago mangaid: dang main" ru we' nhag' lam: gyang" ra"dao: ngo ta" ru26 ngaid: . – Ce: akhyo re Agipa mang: zug: ba: ra".Ai: zug' qhid' kheim: mae ngo bao bao za: vae" ta" ra".Ce: akhyo daja: re re: mang: zug: maba lo: sae za: mana nae" ein: ngo dao" nghae" ra". Pe" mung: ga" re ce: mau" wa anyham: avho' kaid' ra" mau"27 mangaid: . – Mang: zug: Agipa we" nao lapa dao: lam" ra" i"? lam" rure ngo ba: ra"28 ga: mho: ra". – Agipa wa nao lao" ngaug; ra" mathao: yang ngo lao" Khristain: boe"29 lo: na kyi va" ga: Po"lu re ta" ra". – Po"lu wa ayo, dazab daso' mae ngaid ngaid myao" sho' mae ngaid ngaid nao zug: we' daga" ana" ba ce: mae bo: gyo: mo, alhab' geim" ce: taui" to" ra" mae" lai yang: ngo mae boe" ra" khyo: boe" vegeshao: ein: ngo Mo"so jhao" jhaung: mho' ra" ga: ta" ra".30 Ai lao" mang: zug: we' Bereni to" mung: vomo" zug: we' yao" byin cao: qe31 daga" thug' ye" lo" ako". – Yao: bam yao: cao: ceyaug wa se' main" ra" qobo, kyam: lhaung" main" qobo daja: re re: kaid' ru32 mangaid: ga: jho" mho: ako". – Agipa zug: wa Festu re ceyaug Siza: jhaung zug: jhao" joe" ye: nae" mamho' re wa nhao: ke' gai: va" ga: ta" ako".