1 Yuda, mang: mae" Antiug khyo joe" li" ra" mo, damyo" wa naonhaung" Moshe: tarha" we' dakhyo: nyaug maphyid' ko" re khyaid' yu: akhyo maqo" ga: mao: nhaung:2 qere mho" shid' ako". – Ai: mo, thaui: we' Po"lu Banaba tao jho" qham: ngag myo" lo ko" au: Po"lu we' Banaba' tao getau: naung cao damyo" we' daga" ai: qug: khai: re sho' nae" tau: Yerusalem: mae na: ra" logyo: qe we' phung: ug qe khyo lo" ca" ga:ta" phyid' ako".3 Phung: zo: qe khyo le; mae" cao" dai" mung: Po"lu we' Banaba tao wa Phyinid' mang: , Samari mang: khyo" lo" mung: taung bug byu qe tha" lag: lo ko" akhyo re ta" kyo" ra" mathao: yang mao: nhaung: qere gyai lo" ngaui bau: nhao:4 ako". – Yerusalem: mae joe" lao" logyo: qe phung: ug qe we' phung: vao mo, wa yao: tao re lham: tug; yu gemung: yao: tao khyo" Mo"so zaui: so" lo va" akhyo re zhao:5 kyo" ra". – Phareshe" mo, thaui: mae" lam khug; lo mo, damyo" wa to" yang: taung bug byumyu" qere re: nyaug phyid' byid: ca" . Moshe: tarha" cao" pyang" nae" khyo: mho" shid' ca" ga: ta" ako".6 Ai lao" logyo: qe we' phung: ug qe wa ai: akhyo re gelho: myid; qu" nae" tau:7 qham phaung: ako". – Gyai jho" yhai: ngag; myao" lo" au: re Petru to" ye, mung: mao: nhaung: qe we"Mo"so wa naonhaung" re sao qhid' khyin: yu mung: ngo hau" kyo" ra" mathao: yang taung bug byumyu" qe ngaui bau: lau dao: the' gyo: geyang: lam khug; lo ko" rure naonhaung" ba veko". –8 Nhag' lam: re qo" kyao" myao: ra" Mo"so wa shao gyang" Solo ngonhaung" re byid' ru: yao: bam rere: byid; yang: yao bam mae9 re: sagso: bo: kham: byid: va". – Lam khug: ra" khyo" yang yao: bam: nhag' lam: re shao kyang" nhao mung: ngonhaung" we' yao:10 bam pe" jho" shai" ra" ru mangaid: . – Airu: mung: ngonhaung" we' nyhao" phug' pho" qe maqo" vin: ra" dao kang re naung cao qe: lo, sin mae vhin nae" tau: pe" mung:11 Mo"so re myid: nug: na ko"?. – AsAng Yesu jeju khyo" yang za: ai bam khyaid' yu: khyo qo" ko" ru: ngonhaung" re: qo" ca" ein: ngonhaung" lam khug: ra" ga: Petru hau" kyo"ra".12 Ai: au: Banaba we' Po"lu wa yao: tao khyo" yang taung bug byumyu" qe: adao mae Mo"so zaui" qhu" ra" mug' pho" ve, lho jham re ta" kyo" ra" au: ham phaung:13 na ko" byu qe tae" gyo" ako". – Ai bam ada" zo, bin: ta" kyo: thao Yaku khyo" mao: nhaung: qe we" nga" dao: re tae" gyo" yu14 ge, – Mo"so wa yao" mang khyao: tau: taung bug byumyu" akhug mae" daqhae: re she: thug' yu nae" ga: taung bug byumyu" qere li" qu" gam va" akhyo re Simon hau"15 kyo: ra". – Ai: akhyo jham lapa qe: dao: kheim: we' zhaung" ra".16 Jham: tung" mae the' myao: ru wa nga" mang khyao: khyo" mhang" yu va" taung bug byumyu" qe ngaid ko" dang shi" mo, re Mo"so qho: yu nae" tau: thao lao" za: ngo dam: li" nae".17 Lang" gyang: jo; ra" Davi seim zaung re dam: zhaug' tau: yhe' nae". Qeim: jo; mae" byao: nyhang" bin lao" ai: zaung re tau: yhe' to: nae" ga:18 Ce: mau" re nyhang" byid' na: apyaid ato: Mo"so: lamyhung" jo; jo, gau ngaid: ga: ta" to" ra". Mo"so wa mug: thug' sao peim mae" nyhang" byid' na va" jham re19 ada" zo, ba: ra". – Ai mung: taung bug byumyu" qe: akhug mae" Mo"so jhao" tha" lag; lo va" mo, re maye: nhaung" lo:20 za: – Mashao: ra" sulho rere: , magai: ra" phavae mau" rere: , lang zang: nhag' nag; se' ra" ja: rere: , sa: rere: jao" lha" genae" tau: yao: bam re pyang: ke' gai: ra" ein:21 ngo myid: ra". – Pe" mung: ga" re Moshe: khang" dao: jham re ham phaung yham mae dug no: ba ba qug; nghe' phaid' na: ru mung: Moshe: tarha" re genhae" mae" jo, qo khao: ngo" mae lhaung" zaui: so: va" ga: Yaku mho: ra".22 Ai:au: logyo: qe, phung: ug qe we' phung: zo: qe wa yao: bam mae" khyin: thug' mung: mao: nhaung: qe mae mang thug' ra" Banaba mang asag' qo" ra" Yuda we' Sila tao re Antiug khyo Polu Banaba tao we' daga" nhao: ke' nae" akhyo: myid23 vang" ako". – Yao: bam re byid' ke' ko" tung" khye' wa logyo: phung: ug mao: nhaung" qe khyo" Antiug , Shuri mang: , Kiliki mang: mae na ko" taung bug byumyu"24 qe ngaid: ko" mo, re kyo" ke' ra". – Byu damyo" wa ngonhaung" akhang" maqo" lo: za: ngonhaung" mae" thug' lo" mung: ngonhaung" nyhaug phyid' ca" , khang" dao: cao" na ca"ga"dao: kheim" yang naonhaung" nhag' lam: nhaung" khoe' phyo' qheim" ra" akhyo ngonhaung" the'25 gyo"ra". – Ai mung: ngonhaung" AsAng Yesu Khristu: mang khyao: khyo" yang yao: yao" kao re dain: to: va" yaug ngaid:26 ra". – Ngonhaung" jhid' ra" Banaba , Polu we' daga" khyin: yu qhug' mo, re naon- haug" jhao" nhao: ke' nae" tau: daqam: daqhi ceim" tau" yaung va" we' dakhyo: –27 Ce: akhyo: jham naonhaung" jhao" nhaid' yang yao: ta" kyo: nae" tau: Yuda we' Sila28 tao re bo nhao: ke' ra". – Sulho qhid' mae ngaui" tang: pye' va" xeim: rere: sa: rere:29 lang zang: nhag' se' ra" ja: rere: – Madau: ra" phavae mau" rere: jao" lha" ca" nae" ga" ra" khang" dao: mae" getau: qo re naon- haung" adao mavhin nae" tau: mae" shao gyang" Solo we' ngonhaung" ceim" myid vang" bam va". Ai:gu: re kam" jao" lha" ca". Qao" na geshao: ga: tung" vhin: ke'30 ako". – Aibam: tung" khye' yu: ci yang: Antiug khyo ye: mung: byu jham re yekhai: zhang: yang: tung" khye' re byid' ako". –31 Pyang tung" lham: phaid' qu" ko" au: ai: qam: byid: dao: mathao: yang ngaui bau"32 myid qo" yu: ako". – Yuda we' Sila tao wa lapa ngaid gemung: mao: nhaung: qere qi:33 sho' mho" shid' qam: byid' ako". – Ai bam wa gyai myao" na co' mung: logyo: qe jhao" yaug yo za: qo" dam: lo" nae" tau: mao:34 nhaung: qe nhao: ke' ako". – Ai qere: Sila wa yao: za: yao: na: thang: gyo" ra".35 Po"lu we' Banaba tao: re: Antiug mae na na zo" getau mo, byu qe we' daga" mho" shid' dao: ta" mung: Mo"so: ngaui bau: lau dao: re hau" kyo" ako".36 Dayo, zo: myao" sho' na ko" thao re Po"lu khyo" yang ngo tao Mo"so: mung: dao: hau" kyo: co' qu" va" vo khao: ngo" mae" mao: nhaung: qe jhao" cao" kam" lhang: lo" lang: ga: Banaba re mho: ra". –37 Banaba wa Maku mang: ra" Yohan re jhui:38 nae" ga: myid: ra". – Po"lu wa Pamphuli mang: mae yao: tao we' gao: mung: mau" zaui: jao: khyo macao" li" ra" yaug re39 magai: jhui" ga: myid: ra". – Ai: mathao: yang yao: tao majho" zhaung: yang: getau tau khyo" lo" mung: Banaba wa Maku re jhui: mung: Kupru gogyo: kao" khyo" lo"40 ra". – Mao: nhaung: qe Po"lu re Mo"so: jeju mae qhaug' to: va" mathao yao: wa Sila re khyin: jhui" ci mung: thug' lo" ra". –41 Phung: alam: lam: re mho" shid' gang: tang dao: cao" ta" mung: Shuri mang: , Kiliki mang: khyo" kam" lo" ra".