1 Ai: ayo, Herod' mang: zug: wa phung: vao mo, damyo" re yhin" nae" tau: mho:2 ke' ra". – Yohan yao: mao: ngaid: ra" Yaku3 re shae: yang qam" se' pye' ko" ra". – Yuda byu qe qam: qo" ngaui bau" ru the' myao lao" Azuma: poe ba re dam: dalhang Petru re myhag' mung:4 Lai loe, poe bin lao" byu qere she: thug' byid: nae" ga: myid yang: lhaug' zaung" nae" gyezo: daxe: khyaug' yaug: lo, mae byid' ke' mung: kyam: lhaung" to: qhug'5 ra". – Petru kyam: laung" ayo, phung: vao byu qe wa yao" tau: gekai: lai Mo"so jhao" jhaung: mho' qam: yu: ako".6 Herod' mang: zug: Petru re lhoe' ke' nae" saoqhid' myi re myi" ayo, jao co: taui: dam shid' khe' yang taui" to: mung: gyezo: shid' yaug; gyo: mae yab: na: ra". Lhaug' mo, re: kham: dung: mae lhaug' na:7 ako". – Ai: au: Mo"so: mug: logyo: wa bao: thug' lo yang: kyam: yham mae li" bao: qhu" ra". Mug: logyo: wa Petru nae dain: re be; tin" ke' mung: mye, to" wa, ga: to" nhao: ra". Jao co: taui: re: Petru; lo, mae"8 gyaid: lo" ra". – Mug: logyo: wa nao phyid' cui: cui: wa, khyid zhaung: re: zhaung: wa, ga: mho lao" mho: ru: Petru kaid' ra". Mai pho' re re: lao" yang" ci mung: nga"9 thao cao" wa, ga: ta" ra". – Petru bocao" thug' lo" va" qere: mug: logyo: jhui" kaid' ru wa gaung gai ngaid: ga: maqo" beim: shi: yao: lamyhung" myao: na: ga: za: ajho:10 na: ra". – Lhaug' jao: shid' jo, qo lai thao vomo" kham: dung: joe" lao" ai: kham: dung: yao: za: yao: bung" li" yang: yao: tao thug' su" lo" mung: khyo dadain: lai thao mug: logyo: ajao" yao: Petru mae" byaug: gao" lo" ra".11 Petru beim" li" lao" Mo"so wa yao" mug: logyo: re nhao: ke' mung: Herod' lo, mae" re: Yuda byu qe myid: nghae" to" mae" re: ngo re khyaid' lhoe' yu: ru ngaid nhaung ga: beim" li" ra".12 Myid; beim: so" lo we' byu gyai myo: sho' ham yang: jhaung: mho' na ko" jao: Maku' mang asag' qo" ra" Yohan yao:13 myhi" Mari yham joe" lo" ra". – Yao: yham kham: lo" ko' ke' re Roda mang: ra" myiqe: nau" dayaug tae" gyo" qu" nae" ga: te' li" mung: Petru thoe re the' ba: gyo" ke' lao"14 jao" – Saung" ngaui bau: yang: kham: re maphung" yu shi" lo: akhug khyo tao" vao lo" mung: Petru wa kham: yae mae ye; na:15 ra" ga: lo" tao" ta" kyo" ra". – Aibam wa nao wa ago ngaid: ra" ga: ai: myiqe: nau" re mho ko" ngaid qere: Petru dang dang yao: na: ra" ga: zaug za: ata" na lao" Petru: mug:16 logyo: ngaid: laug ga: ta" ako". – Petru kham: xo' ko' na lao" kham: ye: phung" ko" re Petru re myao lao" gyai mug' hao" byaug; ako".17 Petru wa ai bam re sae za: na genae" tau: mae" yao" lo, vhag' qhu" mung: yao: re kyam: mae" Mo"so she: thug' lo: akhyo re bin: ta" kyo: thao naonhaung" ye: mung: Yaku' we' mao: nhaung: qere ce: akhyo jham re zhao: kyo: ge, ga: ye: mho co' mung: getau dajo, qo khyo thug' su" lo" ra".18 Mug: bo" lo: au: gyezo: qe wa Petru mae khoru: li" boe" ra" ga: jho" mho: yhai:19 na: ako". – Herod' mang: zug: wa Petru re qho mamyao lao" lhaug' zaung" mo, re ca: qu" mung: se' pye' nae" tau: amyin" byid' ke' ra".20 Ai: thao Herod' mang: zug: wa Yuda mang: mae" Kasare vomo" khyo ye: na: au: Turu' we' Sidon: vomo" byu qere nhag' gyid' ra". Aibam wa daqam: daqhi li" lo gemung: Balastu ga: mang: ra" mang: zug: byin qham lau: de, jhao" li" mung: ceim" mho' khyam" nhao: ako". Pe" ru: ga" re yao: nhaung" wa ai: mang: zug: ug ra" mang: mae" thug' ra" zo: nam re ceim"21 zo" na geyang: ngaid: ra". – Herod' zug: wa dang: to" bana re mang: zug: khyung shaung: ve; ci mung: tao" myhao dao mae22 yao: bam re dao: phyid' ke' ra". – Byu qe wa ce:thoe wa byu thoe mangaid: Mo"so: thoe ngaid: ra" ga: ceim" hug' ke' ako". –23 Ai: mang: zug: Mo"so: mang ham" hung: re maba: caung: nghaui" dao: ta" mung: ai: lao" jao" apyaid ato: Mo"so: mug: logyo: mho" ke' mung: gaung dau: mae no bug; khai: yang: shid: byaug: ra".24 Mo"so: sosuna lo, zo" wa ce" lae: lo"25 ra". – Banaba we' Sholu wa yao: tao zaui" ra" mau" bin: kyab' lao" Maku' ga: mang asag' re qo" ra" Yohan re khai: jhui" ci mung: Yerusalem: vomo" mae" phao: lo" ako".