1 Antiug vomo" mae jo; ra" phung: mae Banaba Niga: mang: ra" Shu'maung:, Kureni mang: byu Luki , mang: zug: Herod' byin cao: agyang" ngaid: ra" Manaen we' Sholu mang: ra" lapa pa yaug ai bam na:2 ako". – Aibam wa Mo"so re caung: pa" mau" zaui: mung: zo: nam jao" na ko" au: shaogyang" Solo wa ngo vhin: ra" mau" zaui: so: genae" tau: Banaba we' Sholu re3 khyin: to: ge, ga: mho: ra". – Zo: shaug' jao" jhaung: mho' mung: ai bam: au: dao mae lo, kai: byid: yang: nhao: ke' ako".4 Airu: shaogyang" Solo nhao: ke' ra" khyo" yang yao: tao wa Seluki vomo" khyo ye:mung: ai: vomo"mae" khuqaung lha: yang Kupru gogyo: kao" khyo joe" ye"5 ako". – Salamia vomo" mae na: na ko" au: Yuda tarha" ham phaung mae Mo"so: mung dao: re hau" kyo" ako". Yohan re: aibam: abao" athaug' ngaid: ra".6 Gogyo: kao" dalam" geim" mae su" kam" qin" mung: Paphu vomo" joe" lao" –7 Bar Yesu mang: ra" Yuda, byu: lapa mhug' ga: yaug na: ra". Yao: wa yui vha" juyi ba yaug re mang: zug: Sergi Polu jhao" na: ru ye: myao: ako". Ai: mang: zug: wa sozo: du: yaug mung: Banaba we' Sholu re khai: yu yang: Mo"so mung dao: tae" gyo: nug:8 ra" nhag' lam: bo: ra". – Vha" juyi ba: ra" Eluma mang yaug wa mang: zug: re lam khug; khyo mae" shai" lo" byaug nae" tau:9 logyo: tao re tam" kyo" ra". – Ailao" Polu mang qo" ra" Sholu wa shaogyang" Solo we' byang" vin" mung: yui dae: vha" ba:10 ra" yaug re qu" zhaug' na zo" – Mhug' phyo' ru , jeju re ba: phyo' ra" yui dae: yao: zo: , dang main" shaid' mae" gyevo nao wa apyaid ato: Mo"so: dang main" ra" khyo-11 dang re maphyo' lo: maqo" na i"?. – Ana" yao: apyaid ato: Mo"so: lo, wa ni" adao mae joe" gyo" mung: ba re lao" maqo" myao sho' ayo, dathaung: zo: ni" myo, jid: lo" byaug nae" ga: Po"lu mho: ra" dazab mae yao: yao" lo, re she: yu nae" byu qho: yam: qin"12 ra". – Ai: akhyo: re myao lao" mang: zug: wa lam khug: khyo qo" khae: yu mung: Mo"so: mung dao: akhyo re gyai mug' byaug va".13 Po"lu we' daga" bobo: lo mo, wa Paphu mae" lo" mung: Pamphuli mang: Perege vomo" joe" lo" ko" re Yohan wa yao: bam mae" thug' lo" mung: Yerusalem: khyo lo"14 byaug; ra". – Perege mae" dam: thug' lo" mung: Pesidi mang: Antiug vomo" joe" lao" dug no: ba mae tarha" ham phaung15 yham mae bo: zaung: ako". – Dao: thang: jham: lapa jham: phaid' nghe' qu" bin thao tarha" qe, do, agyi qe wa mao: nhaung: qe we" byu qere mho" shid' nae" ru jo; re hau" kyo: gela, ga: byu nhao yang: cao" ta"16 ako". – Ailao" Po"lu to" ye, mung: lo, vhag' yang: Israel byu qe we' Mo"so re gyaug17 phug' ra" mo, we" tae" gyo: ge, – Israel qe: Mo"so wa ngonhaung" phug' pho" qere khyin: yu mung: Egutu mang: mae bang" vo ngaid: ra" ai: byumyu" re tau: to' yang: bao bao za" lo; yang she: jhui" yu va". –18 Zin lam: byid xe lam: lam: zho: jhaug' lo19 va". – Khanain: mae" byu nhaid' myu" re se' jheim" pye' mung: ai: mang: re Israel byumyu" qere Ma khyo" gae: myho" byid'20 ra". – Ai: thao lapa Samuel mana: thug' li" shi" re zin na byid yo: ngo" xe lam: lam:21 tarha" agyi bang: khyo" na: lo va". – Thao dalhang jhaung zug: mho' ko" re: Sholu mang: ra" Kisa yao: zo: Benyamin: amyu" mae" yaug re zin lam: byid xe byid' to:22 va". – Thao re ai: yaug re yu: pye' mung: Israel qe: jhaung zug: jo, qo mae Davi re tao" zaung nhao: ra". Ai:yaug; akhyo yao: sagso: kham: ru wa nga" nhag' thaung: yang: Yese" yao: zo: Davi re ngo myao va". Ai: yaug wa ngo o: ra" khyo: zaui" pyang"23 lo: li" nae" ga: mho: ra". – Ai: yaug; akaung anyaug mae" Mo"so wa dao: so: to" to: va" we' dakhyo: Israel qe tau: khyaid' yu nae"24 AsAng na: thug' li" nhao: ra". – Ai: yaug mana: li" shi: re Yohan khyo" yang Israel amyu" alhab' bam re nhag' lam: atha" we' tin" ra" Babtizan: akhyo saoqhid' hau" kyo"25 ra". – Yohan yao: vin vo; mau" bao: lo: na lao" ngo re khag' ein: jho: na ko" ngo wa ai: yaug mangaid: .Nga" thao li" nae" dayaug ai yaug; khyid zhaung: khyaid' byid: nae" lao"26 mamain: yaug angaid: ga: ta" ra". – Abra- ham amyu" ngaid: ra" mao: nhaung: qe mae" qhid yang: naonhaung" mae" Mo"so re gyaug phug' na mo, jhao" ce: khyaid' yu: ra" dao: naonhaung" re hau" kyo" ke' ra". –27 Yerusalem: vomo" mae na ko" mo, we' daga" mang: zug: qe wa ai: AsAng rere: , Dug no: ba ne, qug: lhaung" phaid' ra" lapa dao: rere: maba: gyo: geyang: ai: AsAng re pyam" yhin" ra" khyo" yang ai: lapa qe: dao: kheim: re gyang" dang: lo nhao:28 ava". – AsAng mae shid main" ra" qobo daja: lao" mamyao qere: se' pye' nae" tau: mae" mang: zug: Pilaid jhao" mho' vhao"29 ako". – Ai: AsAng re zhaug' yang: jham: tung" mae tung" to" ra" alhab' re jab byang" bin thao mao re pyao: zang mae" khyo" yu30 mung: lab mae to" ako". – Mo"so wa shid: ru mae" taui: to" yu: ava".31 Galile" mang: mae" Yerusalem: vomo" khyo yao" thao cao" mo, jhao" ba na myo:32 sho' yao" gaung re li" qhu" va". – Ai bam wa byu qe jhao" sagso: kham: qhu" ako". –33 Shid' lhang: caung: khin" jham: mae the' myao: ru wa nao wa nga" zo: ngaid: ra". –34 Ana" ba yao: nao re ngo khau: nha: ke' va" ga: bo: ru we' dakhyo: Mo"so wa Yesu re taui: to" yu mung: ngonhaung" phug' pho" qe mae to" to" dao: so: re ai bam: yao: zo: qe ngaid: ra" nyhao: nhaung" mae dang: lo nhao: ava" ga: Davi mae gang" tang" ra" jeju re naonhaung" jhao" ngo byid: nae" ga: lamyhung" byid' to" we' dakhyo: ai: AsAng re shid: ru mae" taui: to" yu mung: thao dalhang bab: nae: ru mazao" nae" akhang" byid' to: va" ga: ngaui bau: lau dao: re ngonhaung" khyo" naonhaung"35 re hau" kyo" na: ra". – Ai mung: caung: khin" jham: dao: mae dam: tung" to" ru wa AsAng: shaogyang" yaug re bab; nae:36 ru majoe" nhao ga: bo: ra". – Davi wa yao" ban: mae Mo"so o ngaui: khyo re zaui" bin thao kao gain: lo" mung: yao" phug' pho" qe: phaung khyo vao lo" yang: bab; nae: ru37 joe" byaug; ra". – Mo"so: yang taui: to" ke' qhug' yaug wa bab qeim: mae majoe". –38 Aimung: mao: nhaung: qe we" ai: AsAng: jeju khyo" yang qobo lhoe' byid' tarha"39 re naonhaung" jhao" hau" kyo" ra". – Ai: AsAng re lam khug mo, alhab' wa Moshe: tarha" khyo" maqo" lhoe' ra" qobo alhab' re qo" lhoe' pye' rure ba: to: ge, .40 Lapa jham: mae mho: to" ru wa qu" ge, jung" gaui mo, we" , mug' yang: jeim" lo" ge,.41 Pe" mung: ga" re ai: akhyo re naon- haung" jhao" dayaug yaug ta" shid' va" qere: malam" genae" ga: lapa dao: naon- haung" adao mae majoe" nae" tau: lha" ge, ga: Po"lu hau" kyo"ra".42 Byu qe wa tarha" qe, do, mae" thug' lo" ko" au: ai: akhyo: jham re yao: bam jhao" thao: lhang: dug no: ba mae hau" kyo: shi:43 nae" tau: mho' ako". – Ham phaung byo: phao: lo" ko" thao Yuda byu qe myo: sho' we' Mo"so re lam khug; ra" phung: vao byu qe wa Po"lu we' Banaba tao: thao cao" gemung: ai bam wa Mo"so: jeju mae tang: na genae" tau: logyo: qe khyo" zaug zaug44 yao: mho" shid' ako". – Thao: ne, dug: no: ba mae Mo"so: mung dao: tae" gyo: nae" tau: da vogaung: geim" alaug gain sho'45 li" ham phaung: ako". – Yuda byu qe ai: ham phaung re myao gelao" myid: mug' gemung: Po" lu dao: re ngag: ha: ako". –46 Ai: au: Po"lu we' Banaba tao Mo"so: mung dao: re naonhaung" jhao" shi" saoqhid' mho" shid' ang: ra". Aqere: naonhaung" ha: pye' mung: apyaid ato: kao we' mamain: ga: yham sang yao: myid: phyid' yu veko" ru mung: apyaid ato: Mo"so mho: to" we' dakhyo: ngonhaung" myo, nho geshaid' khyo qang: ke' geyang: taung bug byu qe jhao" cao" hau" qin" ru ngaid: .47 Pyang: to" ra" lamyhung" dao: kheim: wa nao myid gaung athao" joe" sho' khyaid' yu: mau" zaui: nae" tau: mae" nao re labug amyu" qe bo" bao qo" nae" tau: ngo jaung: to" ga: myo, myhung" dao: jo; ra" ga: vae"48 vae" ta" kyo" ra". – Ai: dao: taung bug byu qe the' gyo: lao" ngaui bau: mung: apyaid ato: Mo"so: mung dao: re caung" ako". Apyaid ato: kao qo" nae" tau: jaung: to: mo, alhab' wa lam khug khyo qo" yu: ra". –49 Apyaid ato: Mo"so: sosuna wa damang" geim" nghae: lo: ra".50 Ai:au: Mo"so re lam khug mung: shab shab za: na ko" myiqe: qe we' ai: vomo" mae ade, boe" mo, re Yuda byu qe wa yo: o: lhaung mung: Po"lu we' Banaba tao re yhin" yang: ai: mang: mae" khe' ke' ako". –51 Logyo: tao wa yao: tao: khyid vo: mae de; ra" myid zhai: re aibam: jo, qo mae ko: khyo" co' mung: Ekoni vomo" khyo ye"52 ako". – Naungcao qe wa ngaui bau" ru we' shaogyang" Solo byang" vin" ko" ra".