Yohan-18

(SHAO GYANG" JHAM: PAUG' )

切换到福音影视网-新版圣经

  • 1 Dao: cegu: bin: ta" lao" Yesu wa yao" naungcao qe we' Kedron lao: khaung: thoete' khyo de; ye" lo" ako". Ai mae khyae
  • 2 dalam: jo; ra". – Yao: we' yao" naungcao qe wa ai: khyae khug khyo dazab zab lhaung" ye" ako". Ai: jo, qo mae yao: re dain: pye'
  • 3 nae" yaug Yuda skarud re: ba: ra". – Yao: wa khin jaung qi: qe we' Phareshe qe nhao: ke' ra" gye phung: dajham we' pa" jhaung: yham gug: gam phung: re jhui: yang: myi: dam we' shae lhae ci: mung:
  • 4 ai: khyo li" lo: ako". – Yesu wa yao: mae boe" li" nae" gu: alhab' re ba mung: qhid' khyo ce" ye: mung: naonhaung" khag' re
  • 5 qho: ko" ga: yao: bam re myid' ra". – Yao: bam wa Nazared mae" Yesu re qho: ga: tau" ako". Yesu wa ngo yao: ngaid va" ga: ta" ra". Yao: re dain: pye' nae" Yuda skarud
  • 6 re: ai bam we' daga" ye; na: ra". – Yesu wa ngo yao: ngaid va" ga: ta" lao" yao: bam wa thao khyo dajhid' zo: zaid: lo" mung:
  • 7 ngo; lang" lo" ako". – Khag' re qho: ako" ga: dam: myid: lao" Nazared mae" Yesu
  • 8 re qho: ga: dam: tau" ako". – Yesu wa ngo ta" va" ru we' dakhyo: ngo yao: ngaid va". Naonhaung" ngo re gaigai: yao: qho ko" ngaid: re wa cebam mo, je qe shi" lo"
  • 9 vegeshao: ga: dam: ta" ra". – Ceru: ga: ta" ru wa nao ngo re byid' to" ra" byu ce gu: mae" dayaug re: mazai" phyaug' nae" ga: lhaung" ta" ra" dao: dang: lo nae" tau: mae"
  • 10 ngaid: . – Shae vin: ci: ra" Simon Petru wa shae she: yu mung: khin jaung yin" jeim dayaug re qam" ke' re lo, yo shaid' no: khye' pyo' khoe' khyo" ke' ra". Ai: jeim:
  • 11 mang wa Malakhu ga" ru ngaid: . – Yesu wa Petru re ni" shae re shae byao mae phyaid zaui: to: wa, nga" pho" ngo re byid' ra" keim ngo mashaug' zai ngaid: ra" i"? ga:
  • 12 Petru re ta" ra". – Alao" sin: thu qe Yuda gug: gam qe wa Yesu re taung: mung: taui" she yang: Anna jhao" saoqhid' jhui" ye"
  • 13 ako". – Anna wa ai: zin shi" khin jaung yin" aya: qo" ra" Kayapha yaug pho" khin
  • 14 jaung yin" xug' ngaid: ra". – Kayapha wa byu damyu" geim" tau: mae" byu dayaug za: shid: ru je: gai: ra" ga: juyi khyug' byid: yaug ngaid: ra".
  • 15 Simon Petru we' getau naungcao dayaug wa Yesu thao cao" ye" ako". Naung cao ai: yaug wa khin jaung yin" we' jho" se" mung: Yesu we' daga" khin jaung yin" qe,
  • 16 do, joe" sho' cao" vao ye" ra". – Petru wa taung gaung kham: nhae mae ye; na: ra". Khin jaung yin" we' jho" se" ra" naungcao: yaug wa thug' ye: mung: kham: zaung" ra" myiqe: myhi" re ta" mung: Petru re jhui"
  • 17 vhao" yu: ra". – Kham: zaung" ra" myiqe: myhi" wa nao re: yao" naungcao dayaug ngaid: i"? ga: myid: lao" ngo mangaid: ga:
  • 18 Petru tau" ra". – Ai: ayo, wa gyo, yo, ngaid mung: daui mung mo, we' gug: gam qe wa fa: myi: maid mung: ye; gao: na: bam: ako". Petru re: ai bam we' bogao: na: ra".
  • 19 Khin jaung yin" xug' wa Yesu re yao" naungcao qe: akhyo we' yao: mho" shid' ra"
  • 20 akhyo re myid' ra". – Yesu wa myidkin byu qe re ngo de: de: za: ta" hau" kyo: va".Yuda qe alhab' zang" ham: pa" jhaung: yham mae re: , ham phaung yham mae re: lhaung" mho" shid' va".Ngo ta" ru mae azug' avho'
  • 21 pe" mabo. – Nao pe" mung: ngo re myid' i"? ngo pe" ta" rure the' gyo: mo, re myid: wa, ngo pe" ta" rure yao: bam jhaug' za: ba
  • 22 genae" ga: ta" ra". – Alao" avai: ayae mae ye; na: bam ko" mae gug: gam pho" dayaug wa Yesu myo, khung: mae pyo' ke' mung: khin jaung yin" qhi" zang re ai ru: agai: tau"
  • 23 i"? ga: nhag' yo" ra". – Yesu wa yao: re ngo ta" ru shaid' ngaid: re wa shaid' ra" sagso: qhu" la, ngo dang main: dao: ta" re pe" mung: ngo re pyo' ra" ga: dam: mho: ra". –
  • 24 Anna wa Yesu re taui: gau khin jaung yin" Kayapha jhao" she: ye: nhao: ra".
  • 25 Petru myi: gao yang: ai: tau mae ye; na: jo; ashi". Aibam wa yao: re nao re: yao" naungcao qe mae" dayaug ngaid: ra" mangaid: i"? ga: myid: gelao" ngo mangaid:
  • 26 ga: ha: pye' ra". – Petru yang no: khye' pyo' khoe' khyo" pye' ra" yaug we' mao: nhaung: dau: ra" khin jaung yin" jeim dayaug re: nao yao: we' daga" khyae mae na: ru re ngo myao va" mangaid: i"?ga:
  • 27 myid' ra". – Petru wa mangaid: ga: dam: ha: pye' lao" jao" qo, teim: lo: ra".
  • 28 Mug: bo" li" lao" Yesu re Kayapha yham mae" Pretore ga" ra" mang: zug' yham khyo she: ye" ako". Yao: bam wa lai loe, poe myi" xeim qo" zo: nae" tau: mae" mashao magyang" ru made, veshao: ga: yham khug
  • 29 khyo mavao ye: ko" ngaid: ra". – Aimung: Pilaid wa yao: bam jhao" thug' ye: mung: byu ce yaug re naonhaung" pe" qobo
  • 30 zhaug' ko"? ga: myid' ra". – Yao: bam wa ceyaug makhyang" byu mangaid: re wa ni" qhid' kheim: khyo jhui" li" zai mangaid: ga:
  • 31 phaug' tau" ako". – Pilaid wa alao" naon- haung" yao: re jhui" lo" mung: naonhaung" tarha" we' dakhyo: yao: re dao: lo" phyid' ge, ga: mho: ra". Yuda qe wa ngo-nhaung" byu se' nae" kheim: maqo" ga: tau" ako". –
  • 32 Airu: ga: mho: ru wa Yesu wa khoru: kaid' yang: yao: shid kham nae" ru ta" dao: zo; lo nae" tau: mae" ngaid: ra".
  • 33 Pilaid wa Pertore yham khug khyo dam: vao lo" mung: Yesu re khai: vhao" yu yang: nao Yuda qe: jhaung zug: ngaid: i"?
  • 34 ga: myid' ra". – Yesu wa ceru re nao yao" myid khyo" ta" i"? mangaid: lao" su geje: yang nga" akhyo ta" kyo: geyang: i"? ga:
  • 35 tau" ra". – Pilaid wa ngo Yuda byu ngaid: ra" i"? ni" byu qe we' khin jaung qe nao re nga" lo, mae li" qhaug' ako". Nao pe"
  • 36 nam zai" shaid' ga: dam: myid' ra". – Yesu wa nga" mang: din" wa ce: myid kin we' matin: . Nga" mang: din" wa cemyid kin mae ngaid: re wa ngo Yuda qe: lo, mae qhaug', byid' ru maqhug' nae" tau: nga" byu zo: qe zin" khyaid' gezai ngaid: ra". Ngaid qere: nga" mang: din" wa ce: myid
  • 37 kin mae mangaid: ga: mho: ra". – Pilaid wa ai ru: ngaid: re nao jhaung zug: ngaid: i"? ga: myid: lao" Yesu wa nao ta" ru we' dakhyo: ngo jhaung zug: ngaid: . Ngo wa dang main" ra" khyo re ta" kyo: nae" tau: mae" khau: li" mung: ce: myid kin khyo joe" li" ru ngaid: . Dang main" ru we' tin" ra" khag' ngaid qere: nga" dao: re tae" gyo"
  • 38 ra" ga: tau" ra". – Pilaid wa dang main" ru pe" ngaid: ga: dam: myid' ra". Cegu: bin: myid: co' yang: Pilaid wa Yuda qe na: ra" khyo dalhang dam: thug' ye: mung: yao:
  • 39 mae ngo pe" qobo mamyao. – Lai loe, poe ayo, mae byu dayaug yaug re naonhaung" tau: lhoe' ke' byid' ra" li jo; ra".Yuda jhaung zug: re naonhaung" tau: lhoe' ke' byid:
  • 40 nae" o: ako" i"? ga: myid' ra". – Yao: bam wa ai: yaug re mangaid: Banaba re lhoe' ke' byid: la, ga: zag: hug' ako". Banaba wa cang: tau: ngaid: ra".
回到本卷目录 回到本版本目录 回到首页