1 Yesu wa naung cao daxe: shid' yaug re khai: zhang" yu mung: yui jham alhab' re khe' pye' nae" we' no phyo: a ja: ja: re2 gai byid: nae"kheim: so' byid' ra". – Yesu yao: bam re Mo"so: mang: din" akhyo cao" ta" hau" kyo: nae" we' no mo, re pho: gai3 byid: genae" tau: nhao: ke' ra". – Yesu yao: bam re dao: pin: ke' ru wa naonhaung" ai: gyaung: khyo tau: mae pe" re: dayu: ci ge, zaung: bao" daci ge, thaung pyain , zo: shaug' ngaui davin ge, bau: zam" re: ajain"4 davin ge, . – Naonhaung" khag' yham mae vao: re ai: vo mae" dam: thug' sho' ai: yham5 mae za: na ge, . – Naonhaung" re bang" malham" ko" ra" mo, bo: ngaid: re ai: vo ai: yham mae" dam: thug' lo" mung: yao: bam: tau: sagso: boe" veshao: naonhaung" khyid mae" phaui: lhug re ko: khyo" co' ge, ga:6 pin: ke' ra". – Ailao" logyo: qe thug' ye" lo" mung: vogaung: alhab' gam: sho' du" qin" mung: ngaui bau: lau dao: re cao" ta" kyo" ru we' khyi" khao: ngo" no phyo: mo, re gai byid' ako".7 Ailao" boe" lo: ra" akhyo re mang: zug: Herod' the' gyo: mung: gyai myid myo: gaung yug: na: ra". Pe" mung: ga" re byu daqhae: wa qid nyhab' byid: yaug Yohan dam: daui: li" ru ngaid: ra" ga: ta"8 na: ako". – Amung: getau daqhae: wa Elia dam: na: thug' li" va" ga: re: , dam: damyo" wa genhae" re" lapa qe mae" dayaug yaug dam: daui: li" ru ngaid sam" ra" ga: ta" na:9 ako". – Ailao" Herod' wa Yohan: au: re ngo phyid' pye' byid: va" ru ngaid: . Ana" the' gyo" na: ra" ceyaug wa khag' ngaid: i"?ga: ta" mung: yao: wa Yesu re the' myao: qu" qa: wa ga: myid: ra".10 Logyo: jham wa dam: lhang" joe" lo lao" yao: bam: zaui: so" lo: ra" mau" zo" Yesu re lo: zhao:kyo" ako". Aru: mung: Yesu yao: bam re myaung: ngho: nhao nug yang: cae: tae" ra" Bedsaida vo khyo jhui"11 ye" ra". – Ce: akhyo re byu mo, thaui: jham ba: pye' gemung: yao" thao cao" ye" ako".Yesu wa yao: bam re lham: khae: yu yang: Mo"so: mang: din" akhyo re mho" shid' kyo" ra".No mo, re re: gai: yo nhao:12 ra". – Ana" ba vao: lo" na lao" naung cao daxe: shid' yaug wa AsAng jhao" qui" ye: mung: ce: volo byu qere nhao: ke' se, . Ailao" she, yao: bam wa vogaung: mae yodae mae khag' re: khag' yab jo, qo we' zo: shaug' re qho zo" lo" vegeshao: . Khoru: ga" re ce: jo, qo wa din" pyaid' yo ngaid: ra"13 ga: ta" ako". – Ailao" Yesu wa naonhaung" yao: cebam re zo: pho: byid: zho: ge, ga: mho: ke' ra". Yao: bam wa ngonhaung" mae genam pe" lao" maqo" lo: , cin main" ngo" yho' we' ngo: nau" shid' dau: za: aqo" lo". Byu ce:nho" mo; tau: zo: shaug' ye: vai14 nae" i"?ga: myid' ako". – Byu ai: gu: mae yaug gai qe za: ngo" taung kho bo: ra" ga: ta" kyo" ako". Ailao" Yesu wa ngo" xe yaug dazhain zhain kaid' yang: nyhang" zaung:15 jin: nhao ge, ga: mho: ra". – Naung cao qe wa yao: mho: ra" khyo: yao: bam re zaung:16 jo, nhao: ako". – Ailao" Yesu wa cin main" ngo" yho' we' ngo: shid' dau: re yu: yu yang: mug: gaung khyo tau: qu" jeju caung: jhaung: mho' ra". Volo byu jham re gae byid: genae" tau: cug' phai" mung: naung17 cao qere byid' ke' ra". – Yao: bam alhab' mo; geim" gyi: sho' zo" ako".Yao: bam zo" tang" ra" gu: dao: daxe: shid' dao: byang" sho' qo" gaug: zhang" yu: ashi: ko".18 Dane; re" ba mae Yesu wa naungcao qe we' cae: tae" jao: mae jhaung: mho' na: au: naung cao qe yao: jhao" qui" ye" ako". Yesu wa volo byu qe ngo re khag' ngaid:19 ra" ga: ta" ako"? ga: myid' ra". – Naung cao qe wa daqhae: wa qid nyhab' byid: yaug Yohan ngaid: ra" ga: . Damyo" wa Elia ngaid: ra" ga: dam: damyo" wa geco' ne; re" lapa qe mae" lapa dayaug dam: daui: to" li" ru ngaid nho dau: ra" ga: ta" ako"ga: tau"20 ako". – Ailao" Yesu wa yao: bam re ai re naonhaung" wa ngo re khoyaug ngaid: ein: jho ko" i"? ga: myid' ra".Ailao" Petru' wa AsAng wa Mo"so ga: mae" Khristu ngaid: ra" ga: mho: ra".21 Ai ru: ga: lao"Yesu wa yao: bam re ce: akhyo re khag rere: mata" kyo: genae" tau:22 gyag yao: zug' to: nhao: ra". – Amung: Byu: yao: zo: wa sao qhid' mae qug: khai: aja:ja: phau: mung: lau: de; qe , khin jaung yin" qe we' jham: ba pho" qe: yang ngag: ha: pye' ru qhug' mung: se' pye' ru qhug' nae". Ai: thao sam ba ein: ba mae dam: daui: to" ru qhug' nae" ga: mho: ra".23 Yesu wa yao" naungcao alhab' mo, re khoyaug ngaid yang: re: nga" thao cao" nug: ra" yaug wa ne, khao: ngo" yao: yao" gaung re ngag: pye' mung: yao: yao" pyao:24 re vo, yang: nga" thao cao" shao: . – Khoru: mung: ga" re byu khoyaug ngaid yang: re: yao: yao" kao re lhoe' yu nug: ra" yaug wa kao so' zai" phyaug' pye' nae" yao: yao" kao re ci: phyaug' yaug kam" wa kao so'25 qo" the' yu: li" nae". – Pe" mung: ga" re myid kin geim" re qo" ug ngaid qere: yao" kao so' seim" byaug: re pe" so' ha" nae". –26 Ngo we' nga" mho dao: re qho' ra" yaug re kam" Byu: yao: zo: wa yao" phung bao mug: logyo: qe: phung bao we' joe" li" lao" Byu: yao: zo: re: ai: yaug re qho' phau:27 nhao nae". – Ngo naonhaung" re mho geli" cetau mae na: ra" mo, mae" daqhae: Mo"so: mang: din" re mamyao myao wa mashid genae" ga: mho: ra".28 Ai:gu: re bin: ta" thao she' ba lao" Yesu wa Petru' Yohan we' Yaku' bam re jhui: mung: yang: jhaung: mho' nae" tau: bam29 dao khyo do, ye" lo" ako". – Yao: jhaung: mho' na: au: yao" myo, khung: ave, akhyao lai" lo" mung: yao" mai bau: re: bao: bao:30 phyu: bao: li" ra". – Ai: tau mae nyag din taung" byu shid' yaug wa Yesu we' dao: jho" jhau: na: ako". Ai shid' zo: wa Moshe'31 we' Elia ngaid: ako". – Khomyhao" makyo re yao: wa Yerusalem: vo mae zaui: nae" mau" zo" we' tin: yang: yao: tao re: phung32 bao we' jho" jhau: ako". – Petru' we' yao" byin cao: tao wa yab nghoe" nghoe" na: ako". Ngaid qere: yao: bam gyang" li" ko" re Yesu phung bao rere: yao: we' daga" ye;33 jo; byu shid' zo: rere: myao: ako". – Ai: shid' zo: phao: lo" gelao" Petru' wa Yesu ngonhaung" re: cetau mae na: re gai nae" myao: ni" tau: zaung dalam: Moshe' tau dalam: , Elia tau: zaung dalam:ngonhaung" zaung sam zaung kaid' nae" ga: mabeim: maso: ta" ke' ra".34 Petru' ai ru: ga: jhau: na shi" au: jham thaui: thug' li" mung: yao: bam re nghoe' lo" ra". Naung cao qe wa jham thaui" yang sham" nghoe' lo" lao" gyaug: nin" byaug:35 ako". – Ai:jham thaui: khug mae" ce: yaug wa nga" zo: ngaid: yao: re ngo khyin: to" ru ngaid: .Yao" mho dao: re tae" gyo: ge,36 ga:thoe dathoe jhau: thug' li" ra". – Ai:thoe jhau: thang: lo lao"ai: tau mae Yesu yao: za: na: na: ra". Naung cao qe wa yao: bam the' myao: ra" khyo alhab' re ai: ayo, mae khag' re re: mata" kyo: lo: sae za: na: ako".37 Ai: thao: ba yao: bam wa bam mae" dam: gyo" lo gelao" byu phaung mo" zang38 Yesu re li" qhug' ako". – Byu dayaug wa mo, phaung gaung: mae hug' mung: mho" pho" we" nga" zote: zo: re qu" byid: nae"39 tau: ngo nao re mho' ra". – Ai: yui wa yao: re bin: mung: nyag din taung" hug' ru we' lao" thin: jab: lo" yang: nhaid' mae" nyab dui" athaui: thaui: thug' ra".no sho' aqug: akhai: kaid' mung: lhaung" phao: thug' lo"40 ra". – Ai:yui re khe' thug' pye' byid: genae" tau: ngo ni" naungcao qere mho' ngaid qere: yao: bam maqo" khe' thug' ngaid:41 ako" ga: mho: ra". – Yesu wa lam" myid mabo: ru we' shaid' nghung" na mo, we" ngo naonhaung" we' khomyhao" joe" sho' na: na zai i"?. Ngo naonhaung" re khomy- hao" joe" sho' zang: qhao" byid: zai i"?ga: tau" ra". Ai:thao Yesu wa ai: yaug re ni" zo:42 re ce khyo jhui" li" ri: ga: mho: ra". – Ai: zoshao re jhui" li" na: au: yui wa ai: zoshao re be; lhang" ke' mung: lao" thin: jab: lang" lo" nhao: ra".Yesu wa ai: yui re qeim: ke' mung: yaug gai nau" re gai byid: mung: yao: pho" re dam: qhaug' byid' ke' ra". –43 Volo byu qe alhab' mo; wa Mo"so: qam: so' re mug' hao" byaug: ako".44 Volo byu qe wa Yesu zaui" ra" mau" zo" we' dao: kheim: jham re mug' na shi: ko" au: , Yao: wa naung cao qere mho: kyo" ra" gu: re gelho: za: xam" ci ge, lhe". Byu: yao: zo: wa su: lo, khyo gye tug' she: qhaug' pye' ru qhug' nae" jhao" li" ava" ga:45 mho: ra". – Ngaid yang: re: yao: bam yao: ta" peim" dao: re maba: gyo" beim: ko". Ai: dao: kheim: re yao: bam maba: gyo: ve geshao: ga: nyham" to: byid' ra".Naung cao qe wa ai: khyo we' tin: mung: Yesu re mavae" myid: ko" ngaid: ra".46 Naung cao qe wa yao: bam mae" qi" thao" ru khoyaug ngaid: i"?ga: yao: cao:47 yao: jho" ta" ngag: na: ako". – Yesu wa yao: bam: nhag' khug mae pe" myid: na ko" ru re ba yang:, zoshao dayaug re jhui" yu mung:48 yao" nhae mae yhe' to: yang: – Yao: bam re nga" mang khyao: mathao mae ce: zoshao re khae: yu: ra" yaug khag' ngaid qere: ngo re khae: yu: ra". Ngo re khae: yu: ra" yaug khag' ngaid qere: ngo re nhao: ke' ra" yaug re khae: yu: ra". Pe" mung: ga" re naon- haung" mae" alhab' tho' ngai: thao" ra" yaug wa qi" thao" ra" yaug ngaid: ra" ga: mho: ra".49 Ailao" Yohan wa AsAng we" , Ni" mang khyo" yang yui jham re khe' thug' na: ra" byu dayaug re ngonhaung" the' myao: .–50 Ngaid qere: yao: wa ngonhaung" phung: mae" mangaid: yang: ngonhaung" tam" pye' co' va" ga: dam: mho: ako". Yesu wa naonhaung" we' daga" na: ra".51 Yesu wa ce: myid gaung: dao mae" jhui" lo" nae" ayo, joe" li" na va" ru mung: yao: wa Yerusalem: khyo do, lo" nae" myid:52 phyid' yang: do, lo" ra". – Yao: wa yao" qhid' au: khyo logyo: qere nhao: ke' mung: yao: lai: lo" nae" khyo re nyhang" byid: genae" tau: Samari vogaung: khyo vao ye"53 ako". – Ngaid qere: Yesu wa Yerusalem: khyo do, lo" na: ru: yang vogaung: bao: wa54 yao: re makhae: yu ko" ngaid: ra". – Yao" naungcao qe mae" Yohan we' Yaku' tao wa ai re myao lao" AsAng we" Elia kaid' ru: cebao: re se' jheim" pye' nae" khyo: ngo tao mug: gaung mae" myi: khai: khyo" yu nae" nao qaid: i"? ga: ta" ra".55 Yesu wa lhang: lo mung: yao: shid' tao re qeim: ru we' nao tao wa pe" ru" nhag' lam: bo ko" i"?. Byu: yao: zo: wa byu qere se' jheim: nae" li" ru mangaid: . Byu: kao re khyaid' yu nae" ein: li" ru angaid: ga: dam:56 mho: ra". – Athao yao: bam gevo khyo thug' ye" lo" ako".57 Yao: bam khyo le; mae su" na ko" au: byu dayaug wa Yesu re nao khai: ye: khai:58 ngo ni" thao cao" nae" ga: li" ta" ra". – Yesu wa zagne jham wa khyaung qo" ako". Ngho' zo: jham re: said' qo" ra". Ngaid qere: Byu: yao: zo: wa au: ngha jao: lao" re: maqo" ngaid: ra" ga: lham: mho: ra". –59 Yesu wa getau dayaug re nga" thao cao" wa, ga: lhaung: ra". Ngaid qere: ai: yaug wa mho" pho" we" nga" pho" mao gaung re shi" lo" nyhab' shaung: pye' co' nae"tau:60 akhang" byid: la, ga: ta" ra". – Yesu wa yao: re sushid qe wa sushid yao: cao: jho" nyhab' shaung vegeshao: . Nao nga" jhao" cao" wa, se,. Mo"so: mang: din" akhyo61 re cao" hau: wa, ga: lhaung: ra". – Getau dayaug wa mho" pho" we" ngo ni" thao cao" nae" ngaid yang: re: nga" byu qere shi" lo" au" co' nae" akhang" byid: la, ga:62 ta" ra". – Yesu wa yao: re yophaug' lo, zo" mae kheim zang re zaui" ci yang: nhaung thao" khyo lhang: qu" ra" yaug khag' ngaid qere: Mo"so: mang: din" tau: pe" khyag' ma thaid' ngaid: ra" ga: mho: ra".