1 Sao qhid' maqhid mae" yao: bam yao" myo; yang zhaug' the' myao: mo, we' ai: mung dao: re ta" kyo" ra" mo; yang –2 Ngonhaung" qhid' kheim: mae boe" lai: lo va" khyo jham re ngonhaung" re ta" zhao: kyo: veko" ru we' dakhyo: mho myi: tung"3 to: mo, myo: sho' na: ako". – Airu: mung: ngo re boe" li" ra" khyo alhab' re athai: atho' jid' gam" jao gaug aqao: qag mung:4 myid: ca: qho yu yang: – Nao mho" zhao xeim: yu: ra" khyo wa gai gai: yao: dang: ra" khyo ngaid: ru re nao gelho: za: ba: gyo" yu shao: ein: cegu: re nao jhao" tung" vhin: ke' re gai nae" ein: ngo myid: ra". Nga: qo" Thophelu we".5 Yuda mang: mae Herod mang: zug: kaid' ra" ta mae Abia phung: vao su Zakharia ga: mang: ra" khin jaung dayaug na: ra". Yao: myi: wa Arun" kaung mae" myiqe: zo: ngaid: . Yao" mang wa Elizabed6 ga" ru ngaid: ra". – Ai shid' yaug: geim" Mo"so: amyin" we' khang" dao: re cao" na:7 dang main" ra" tao ngaid: ako". – Yao: tao mae khyid lo; mabo ko". Pe" mung: ga" re Elizabed wa bug daung: ngaid: . Yao: tao wa kao qi: va".8 Zakharia yao: bam: phaung mae zaui: yo, joe" mung: Mo"so: qhid' kheim: mae9 khin jaung mau" zaui" na: ra". – Mo"so: qhid' kheim: khyo vao ye:mung: phain mae sheim nae pyo" ra" xeim: phaid' ngaui" byid: nae"tau: khin jaung qe: li jo; ru we' dakhyo: pha" khyo" yang: khyin: yu: ru10 mae yao: ang: ra". – Ai: sheim nae pyo" ra" xeim: phaid' ngaui" na: ra" yo, khin: khao: ngo" mae volo byu qe wa taung gaung mae11 jhaung: mho' yang: na: ako". – Ai: au: mae AsAng: mug: logyo: dayaug wa sag' xau ngha" ngaui" na: phain lo, yo shaid' mae12 Zakharia re li" ye; qhu" ra". – Zakharia wa ai: mug: logyo: re the' myao lao" gyaug;13 din: pye' ra". – Mug: logyo: wa Zakharia we" dagyaug Mo"so wa ni" jhaung: mho' thoe re tae" gyo: byid' ava". Ni" yham sang myhi" Elizabed wa ni" qhid' mae" yaug gai nau" dayaug khau: li" nae" ngaid: . Nao wa yao" mang re Yohan ga: mhang" byid: zai14 ngaid: ra". – Nao wa ngaui bau" ru qhug' nae". Yao: khau: li" ru: yang byu myo: sho'15 mo, ngaui bau: genae". – Pe" mung: ein: re yao: wa Mo"so: qhid' kheim: mae qi" qhang yaug ngaid nae". Yao: wa sabyi' qang: we' yhid shaug' nae" yaug mangaid: . Yao: wa yao: myhi" aung mae" yao: shaogyang"16 Solo byang" ug: to: yaug ngaid nae". – Yao: wa Israel byumyu" myo: sho' mo, re yao" AsAng Mo"so jhao" jhui" lhang: lo nhao17 nae" yaug ngaid nae". – Yao: wa lapa Elia re" ru: kheim: so' we' AsAng Meshia qhid' au: mae ye" lo" li" nae". Yao: pho" qe we' yao: zo: qe: agyo: mae dam: jho" vang" nhao nae". Khug ngag: ra" mo; nhag' myid juyi shaid' khyo" dam: tug' lo nhao nae" yao: wa Mo"so: qhid' mae" jin" jin" ngaid nae" tau: AsAng byumyu" re seim" nyhang" to" li" nae". Yao: wa lapa Elia re" ru: kheim: so' we' AsAng Meshiya qhid' au: mae ye" lo" li" nae" ga: mug: logyo: ta" ra". –18 Ailao" Zakharia wa mug: logyo: re ceru: boe" nae" ru re ngo khoru: ba nae" i"?. Pe" mung: ga" re ngo wa mao: va". Nga" yham sang myhi" re: mao: zo: angaid lo"19 ga: tau" ra". – Ailao" mug: logyo: wa ngo wa Mo"so: qhid' kheim: mae ana: na: ra" Gabrela ngaid: . Ce: ngaui bau: lau dao: re nao re ta" kyo: nae" tau: mae" Mo"so: yang20 nhao: ke' yaug ngaid: . – Qu" wa, ngo ta" ra" dao: re nao ma lam" ru: yang ceru: boe" li" nae" ayo, joe" sho' nao wa dao: magai: jhau lo: nhaid' jid: byaug: li" nae".Aimung: ayo, joe" lao" nga" dao: wa dang: li" nae"ga:21 ta" ra". – Volo byu qe wa Zakharia re lao" na: bam: ako". Yao: jhaung: qe, khug mae saung" myao" na: byaug yang: mug' na:22 ako". – Zakharia jhaung: qe, mae" thug' lo: re yao: wa yao: bam re dao: maqo" jhau lo: ngaid: ra". Airu: mung: yao: bam wa jhaung: qe, khug mae myo, myhung" daja: ja: re myao venhaung ga: , yao: bam qu" beim" ba: aveko". Yao: nhaid' jid: byaug yang: yao: bam re lo, tu" za: tu" ra". Ai:au:23 mae" yao: wa nhaid' jid: jao" lo" va". – Yao: zaui: nae" bana ayo, byang" lao" yao" yham khyo phao: lo" ra".24 Ai: thao mae yao" yham sang myhi" Elizabed wa gaung la" li" mung: lho" mo" ngo" khye' lam: lam: su: phaung mavao lo:25 yham mae za: laung" na: ra". – Elizabed wa ana" Mo"so ngo re nhag' myain" yu va". Su: yang ngo re gaui mho jung" khyoe' ta" ru re yu: pye' byid: va" ga: ta" ra".26 Lho" mo" khyaug' khye' ein: ra" khug mae Mo"so wa logyo: Gabrela re Galile mang: Nazared ga: mang: ra" vo khyo tang:27 shain" dayaug jhao" nhao: ke' ra". – Tang: shain" ai: yaug: mang wa Mari ga" ru ngaid: ra". Yao: wa Davi boe: mae" Yoseb ga: mang: ra" yaug mho' to: va" yaug ngaid: . –28 Mug: logyo: joe" vao ye: lao" jeju qo" ra" Mari we" qao" zin" yaug yo: nashao: . Jid so jab byang" yaug we" myiqe: geje tho' nga: qo" yaug ngaid: ra". Mo"so wa nao29 we' daga" ngaid: ra" ga: ta" ra". – Mari wa mug: logyo: li" ta" ra" dao: thoe: yang myid: mug' sang: kho: mung: ce: bang" se" dao: wa pe" ga" ru ngaid: laug i"?ga: myid:30 aug' o" na: ra". – Ailao" mug: logyo: wa Mari we" dagyaug da aug' o: , Mo"so: qhid'31 kheim: mae nao wa nga: lho" ra". – Nao wa gaung la" li" mung: yaug gai zo: dayaug khau: li" nae". Nao ai: zo: re Yesu ein:32 mhang" byid: zai ngaid: . – Ce: yaug wa qi" qhang yaug ngaid: li" nae". Myhao: thao" Mo"so: yao: zo: ga: mhang" genae". Yao:33 pho" Davi La kin re byid: mung: – Yao: wa Yaku zo: myid: qe re ug: na: li" nae". Yao" mang: din" re: thao" ga" ru majo, nae"34 ga: ta" ra". – Ailao" Mari wa ceru khoru: gai: boe" li" zai laug i"?.Ngo wa yaug gai we' mana: qu" shi: ga: mug: logyo: re ta"35 ra". – Mug: logyo: wa shao gyang" Solo ni" adao mae joe" li" mung: myhao: thao" ra" Mo"so: phung qab bao bao yang: nghoe' gam: to: byid' li" nae". Airu: mung: khau: li" ra" yaug wa Mo"so: yao: zo: ga: mhang"36 li" genae". – Qu" ge, ni" amyu" banam myhi" Elizabed re: mao: thao re yaug gai nau" khau nae" gaung la: va". Su: yang bug daung: ga: mho ko" ra" yaug wa gaung la" li" mung: ana" lho" khyaug' khye' ngaid:37 ava". – Khoru: ga" re Mo"so maqo" kaid' ru daja: re: majo, ngaid: ra" ga: ta" ra". –38 Ailao" Mari wa qu" wa, ngo wa AsAng: jeim myhi" ngaid: .Ni" dao: we' dakhyo: ngo mae boe" dang: lo shao: ga: tau" ra". Ailao" mug: logyo: wa Mari mae" phao: tug' lo" byaug: ra".39 Ailao" Mari wa Yuda, mang:bam mug: vogaung: da vo khyo hin hin za: to" ye: lo"40 ra". – Yao: wa Zakharia' yham khyo vao ye: mung: Elizabed' re bang" se" lo, zaui:41 ye: zaui" ra". – Mari' bang" se" dao: re Eliz- abed' the' gyo: lao"yao" aung khug mae"42 zo: nau" wa thug' jhu" li" ra". – Elizabed' wa shao gyang"solo byang" jo, mung: thoe thaid' mung: nao wa myiqe: alhab' mo; tho' mae nga: lho" ra". Ni" aung khug mae"43 zoshao re: nga: lho" ra" wo". – Nga" AsAng yao: myhi" ngo jhao" joe" li" ru wa pe" jeju44 khyo" yang qo" khae: yu: laug i"?. – Pe" mung: ga" re qu" wa, ni" bang" se" dao: the' gyo" ru we' nga" aung khug mae" zo: nau" wa ngaui bau: mung: thug' jhu" li" ra". –45 AsAng yao: re ta" ra" dao: gai gai: yao: boe" dang: lo zai ngaid: ga:lam: ra" myi qe: wa nga: lho" ra" wo" ga:mho: ra".46 Ailao" Mari' wa nga" aung khug nhag' lam: ai: AsAng re caung: khin" byid' ra".47 Nga" sozo: re: ngo re khyaid' yu: ra"AsAng Mo"so khug mae ngaui bau" ra".48 AsAng wa nyham: gyo" jo; ra" yao" jeim myhi" re qu" myao: ava".qu" ge, ana" mae" byu aqae: qae: ngo re nga: lho" ra" yaug ga: mhang" genaeva".49 Pe" mung: ga" re qam: so' bo: ra" AsAng wa qi" qhang: ra" mau" zo" Nga" tau: mae" kaid' byid' ru ngaid va". AsAng yao" mang gyang" shao: ra".50 AsAng yao: re gyaug phug' ra" mo; dao mae zo: myid: byu qae: xag' qug apyaid ato mae yao" nhag' myain" ru wa ajo; jo, nae".51 Kheim: so' bo: ra" yao" lo; yang: la nga: kaid' phug mo; nhag' lam: khug mae myid: yaung: to" ra"mau" zo" jham re lhau: sin" pye' byid' ra".52 Yao: wa jhaung zug: qe re la kin mae" khyo" pye' mung: nhag' myid nyham: ra" mo, re tau: to' byid' ra".53 Moe, shab' ra" mo, re gai: ra" ja" yang nhag' dag nhao mung:jo, nho" qo" mo, re lo, keim nhao: ke' ra".54 Ngonhaung" phug' phyid' qe re yao: ta" to" ru we' da khyo: Abraham: yao: zo: myid: qe re ,55 Khonhae" re: nhag' khyag' shogu" ru myid: beim" na mung: yao: wa yao" daui daui yaug Israel amyu" re bao" thaug' byid'56 ava" ga: ta" ra". – Mari' wa Elizabed' we' da ga" lho" mo" sam khye' kho na co' mung:yham khyo dam: phao: lo" ra".57 Ailao" Elizabed' wa ba na nge, mung: yaug gai nau" re khau myhung: ke' ra". –58 AsAng Mo"so wa Elizabed' re gekai: lai jeju byid' ru mung: yham kyo: cao: qe we' ba59 nam qe re: bo: ngaui bau" ako". – Ai:thao she' ba ein: ba mae yao: bam wa zo nau" nyaug phyid' nae" khyo" li" ako". Yao: bam wa ai: zo: nau" re yao: pho" mang ru: Zakharia' ga: mhang" byid: nug: ako". –60 Ngaid qere: yao: myhi" wa ai ru: mamhang" nae" Yohan ein: mhang" zai ngaid: ga: ta"61 ra". – Yao: bam wa nao mo' amyu" mae ai ru: ga" mang da yaug re: mana shi: ga: ta"62 ako". – Ailao" yao: bam wa ai: zo nau" re pe" ru: mang mhang" nae" ga" la, yao: pho"63 re lo, tu" tu" yang: myid' qu" ako". – Yao: wa tung" the: mho' yu yang: yao" mang wa Yohan ngaid: ga: tung" qhu" ra". Yao: bam alhab' mo; gyai ceim" mug' ako".64 Ailao" jao" Zakharia' wa dao: dam: gai: jhau: li" mung: Mo"so re caung: khin"65 ra". – Yham kyo: cao: qe alhab' mo; wa gyaug mug' pye' ako". Airu: boe" ra" lau dao: re Yuda, mang: bam mug: khaung: joe" sho' hau" nhao" lo" ako".66 Ai re the' gyo" ra" mo, wa nhag' khug mae xam" ci yang: zonau" ce wa pe" ru" yaug boe" li" nae" laug i"? ga: ta" mug' ako". Pe" mung: ga" re AsAng: qam: so' lo, wa zoshao we' da ga" ngaid: ra".67 Ailao" Yohan: yao: pho" Zakharia' wa shao gyang" solo byang" mung: lapa dao: ta" ru wa ,68 Ai: AsAng Israel Mo"so wa nga: qo" veshao: wo".yao: wa yao" amyu" qe jhao" li" mung: yao: bam re loe; beim nhao: ava".69 Yao: wa yao" daui daui yaug Davi amyu" mae" qam: so' qi" qhang: ra"khyaid' yu: AsAng ngonhaung" re byid' ava".70 Amung: yao: wa genhae" mae" yao" shao lho" ra" lapa qe: nhaid' khyo" yang ,71 Ngonhaung" re gye jham: lo, mae" re: nhang: ko" ra" mo; lo, mae" re: yao: ngon- haung" re khyaid' yu nae" ga: dao: so: byid' to" ra".72 Yao: wa ngonhaung" phug' pho" qe re nhag' khyag' nhag' myain" ru qhu" byid: mung: yao" shao gyang" ra" dao: thang" re myid: beim: nae" ga: yao: ta" to"ra".73 Ngonhaung" Mo"so: qhid' kheim: mae ,74 Ngonhaung" pyaid geim" gyang" lho" ru we' dang main" ra" mo, boe" nae" tau: mae".75 Ngonhaung" re gye jham: lo, mae" khyaid' yu mung:yao: re ma zag ma vae lo: caung: da" byid: nhao nae" ga: .Ngon- haung" phug' pho" Abraham re jham tang: yang: ta" to" ra".76 Nga" zo: we" nao myhao: thao" ra" Mo"so: yao:zo: lapa ga: mhang" ru qhug' nae".Nao wa Mo"so: khyodang re nyhang" to: nae" tau: AsAng: qhid' au: mae ye" lo" mung:77 AsAng: byumyu" re yao: bam:qobo re khyaid' pye' byid: mung: khyaid' yu nae" ga" ra"khyo re ta" kyo" li" nae".78 Ngonhaung" AsAng Mo"so wa nhag' khyag' ru byang" jo, yaug ngaid: ra". Yao" khyaid' yu ra" jeju ba bao wa ngonhaung" dao mae thug' li" mung:-79 Shid: ra" aqab khug mae na: jo; ra" mo; dao mae bao byid' li" nae". Amung: ngonhaung" khyid re yaug yo cae: tae" ra"khyodang khyo ceim" shid' qhu" byid: nae" tau: ngaid: ra" ga: nghaui" jhau: ra" . –80 Ai: zoshao wa gaung khyao qi" qhang: li" ru we' qam: so' bo: li" mung: Israel amyu" qhid' kheim: mae de: de: za: ma na: qhu" shi: re yao: seyo mae cao" na: qin" ra".