Luka-19

(SHAO GYANG" JHAM: PAUG' )

切换到福音影视网-新版圣经

  • 1 Yesu Yerikho" vogaung: khyo vao ye"
  • 2 ra". – Ai: vogaung: mae Zake" ga: mang: ra" khang: khyui mo; au: she da yaug na: ra".Yao: wa jo, nho" gyai qo" yaug ngaid:
  • 3 ra". – Yao: wa Yesu khoru" yaug ngaid: ru re myao: qu" nug: ra". Ngaid qere: yao: wa byu baid lang" ngaid: ru mung: mo, paug' saung" thau yang: Yesu re maqo" the' myao
  • 4 ngaid: ra". – Airu: mung: yao: wa Yesu re the' myao nae" tau: volo byu qe: qhid' au: khyo tao" lo" mung: pho' ham" gae mae lo"
  • 5 do; zaung: jo; ra". – Yesu ai: jo, qo khyo joe" lo" lao" tau: qu" mung: Zake" phyaid gyo" lo wa, ana" ba ngo ni" yham mae
  • 6 bang" thang zai ngaid: ga: ta" ra". – Ailao" Zake" wa phyaid za: gyo" lo mung:gyai ngaui bau" ru we' tug: yu yang: bang"
  • 7 lham" ra". – Ai re myao: ra" mo, alhab' wa byu ce:yaug wa qobo qo" ra" yham mae bang" nae" ga: cao: lo" ava" ga: ta" nyung:
  • 8 ako". – Zake" wa to" ye, mung: AsAng we" nga" jo, nho" agaung: daqi" myaung sho: mo, re gae byid: nae" dayaug yaug mae" ngo mhug' zo" ci: ngaid: re ai: yaug re byid' nho" ngo dam: tug' byid: nae" ga: ta" ra". –
  • 9 Yesu wa khyaid' yu nae" jeju wa ana" ba ce: yham mae joe" li" ava". Pe" mung: ga" re ceyaug re: Abraham: zo: myid: ngaid:
  • 10 ra". – Byu: yao: zo: wa byaug: lo" mo, re cao" qho: yu mung: khyaid' yu nae" tau: joe" li" ru ngaid: ga: zake" re mho: ra".
  • 11 Yao: bam wa Yerusalem: vo khyo joe" li" na geyang: volo byu qe wa Mo"so: mang: din" ana" yao: myao: thug' li" ava" ga: myid: jho: na ko" ru: yang Yesu wa yao: bam re ce: dao: tau" ta" kyo" ra". –
  • 12 Dalhang mae" zug: dayaug wa jhaung zug: aya: re ye: khae: yu mung: dam: lo nae" dau va" ra" mang: din" khyo gyaung: su:
  • 13 nae" seim" to" ra". – Yao: gyaung: masu: shi" au: yao" byu daxe yaug re khai: yu mung: yao: bam dayaug re ngaui dajoe: joe: byid: yang: ngo dam: joe" lo sho' ceyang gau pai: gau mung myho" khyo"
  • 14 ge, ga: pin co' ra". – Yao" mang: byu qe wa yao: re nghang: geyang: ceyaug jhaung zug: kaid' nae" ru re ngonhaung" ma o ga: yao" thao khyo logyo: re cao" nhao: ke'
  • 15 ako". – Ai:yaug jhaung zug: aya: khae: yu mung: dam: tug' lo: ra". Ailao" jao" yao: wa yao" o: kaung qere gau mung myho"khyo" yang: ngaui khoyaug khonho" qo" pai" yu veko" ru re ba nae" tau: yao: jhao" zang"
  • 16 lo nae" amyin" khyo" ke' ra". – Sao qhid' yaug wa li" mung: AsAng we" ngo wa nao byid' to: co' ra"ngaui: yang: gau pai: pai: mung: getau daxe joe: qo" va" ga: ta"
  • 17 ra". – Jhaung zug: pho" wa ngaid va" nao wa o: kaung gai dayaug ngaid: ra". Nao wa vin tang" ra" yaug ngaid; ru mung: nao re ngo vogaung: mo" daxe vo ug nhao
  • 18 nae". – Shid' yaug ein: yaug re: li" mung: asang we" ngo wa nao byid' to" ra" ngaui: yang gau pai kaid' mung: ngo" joe: qo" yu
  • 19 va" ga: ta" ra". – Jhaung zug: pho" wa ai: yaug re re: ngo nao re vogaung: ngo" vo
  • 20 ug nhao nae" ga: ta" ra". – O: kaung getau dayaug wa li" mung: asang we" ni" ngaui joe: ce ngaid: ra". Ci: phyaug' nae" re gyaug mung: pin: cug' yang kag' shaung:
  • 21 to" ga: ta" ra". – AsAng wa gyai qug' ra" yaug ngaid: mung: ngo nao re gyaug: ra". Asang wa nao yao: maqaung" to" ru mae" sham" yu nug: ra". Masin: maqho" to" ru mae" yaid: yu nug: ra" yaug ngaid: ra" ga:
  • 22 lao" – Jhaung zug: pho" wa o: kaung gao: we" ni" nhaid' thoe re cao" yang: ngo nao re dao: phyid' nae". Ngo wa qug' ra" yaug ngaid: ru , nga" zai mangaid' ru re gaug: sham" yu: ru , masin: maqho" to" ru mae" ashi: jham" yu yaug ngaid: ru re nao ba gau
  • 23 ngaid: ra". – Ai ru: mung: ngo dam: lhang" lo: re nga" ngaui re ngaui bai: we' dam: qo" yu nae" tau: pe" mung: ngaui jhi mae maye: ke' to: i"? ga: mho: ra".
  • 24 Ailao" ayae mae ye; jo, mo, re ai: o: kaung pho" mae" ngaui re yu yang: da xe joe: qo"ra"yaug re byid: ge, ga: mho:
  • 25 ra". – Ngaid qere: yao: bam wa AsAng we" yao: wa daxe joe: qo" yaug ngaid: ra" ga:
  • 26 tau" ako". – Ailao" jhaung zug: pho" wa ngo naonhaung" re mho geli". Ai: qo" ra" yaug re byid' laung: shi: nae". Maqo" ra" yaug mae" kam" wa yao: qo" ra" gu: lao"
  • 27 yu: pye' byid' ru qhug' shi: nae". – Airu: mung: ngo zug' gam nae" ma-o: ra" nga" gyevo re cekhyo jhui" lo ge, . Nga" qhid' kheim: mae yao: re se' pye' ge, ga: dao: phyid' ra".
  • 28 Yesu wa ce: dao: re bin: jhau lao" naung cao qe: qhid' au: mae Yerusalem: khyo do, ye" lo" ra".
  • 29 Yao: wa Zhainlun: bam khyid mae" Bedphage: we' Bethani' vogaung: khyo joe" lao" yao" naung cao shid' yaug re qhid'
  • 30 khyo nhao: ke' mung: – Ni" shid' zo: qhid' mae" vogaung: khyo ye: ge, ni" shid' zo: vogaung: khyo vao ye" lo" re khag' re: majui" qu" shi" ra" zaung myao: nau" da dau: taui" to" ru re yemyao: li" genae". Ai: zaung myao: nau" re pheim yang: cekhyo
  • 31 she: lo geri: – Byu dayaug yaug ni" shid' zo: re pe" mung: zaung myao: nau" re pheim ko" i"?ga: myid: lao"AsAng ci qo: ra" ga" ein: yao: re ta" ge, ga: pin: ke' ra". –
  • 32 Amung: yao: shid' zo: ye" lo" re Yesu ta"
  • 33 ke' ru we' dakhyo: ye:myao ko" ra". – Yao: shid' zo: zaung myao: taui ye: pheim: na ko" au: zaung myao: sang wa ni" shid' zo: pe" mung: pheim ko" i"? ga: myid' ra". –
  • 34 Ailao" yao: shid' zo: wa AsAng ci qo: ga" ga:
  • 35 phaug' tau" ako". – Yao: shid' zo: wa zaung myao: nau" re Yesu jhao" she: lo mung:yao: bam: mai bau: jham re zaung myao: nau" dao mae khyaid' nhae: byid: mung: Yesu re
  • 36 jui: nhao: ako". – Yesu jui" ye" lo" na: au: volo byu qe wa yao: bam: mai bau: jham re
  • 37 khyo dang mae myhung: byid' ko". – Yesu wa Yeruslem: khyo joe" li" na: au: Zhainlun: bam mae" gyo" ra" jao: mae joe" lao" , Yao" thao cao" ra" mo, thaui: ajham ataung wa yao: bam myao: lo va" mug' pho: mau" zo" qi: jham: mathao mae thoe mo" we' Mo"so:
  • 38 jeju re caung: khin" mung: – Mo"so: mang kheim: khyo" joe" li" ra" jhaung zug: pho" wa nga: lho" veshao: wo". Mug:gaung: dao mae yaug yo: ru we' Mo"so wa phung bao qi" qhang: jo, veshao: wo" ga: hug'
  • 39 ako". – Ailao" byu phaung mae" Phareshe" qe daqhae: wa Yesu re ni" thao cao" mo, re sae za: na genae" tau:amyin" byid: wa,
  • 40 ga: ta" ako". – Yesu wa yao: bam re naon- haung" re ngo mho geli" cebam sae za: na gelao" wa laug baui jham zag: hug' thug' li" genae"ga: phaug' tau" ra".
  • 41 Yesu wa Yerusalem: vogaung: nhae khyo te' ye" lo" mung: vogaung: re the' myao lao" ai: vogaung" mathao mae Yesu
  • 42 nhag' ngai: ru we' ngug mung: – Vogaung: nao we" yaug yo: ra" khyo boe" nhao: ru pe" ngaid: ru re ana" ba nao ba: qa: we". Ngaid qere: ana" kam" wa ai jham ni" qhid' mae nyham" to" ru boe" byaug: ra".
  • 43 Ni" gyevo qe wa nao re myo, nho byid shaid' khyo" lhang" kham" lhaung" to: nae"
  • 44 ayo, joe" lo: li" nae". – Yao: bam wa nao we' ni" vang" khug mae na: ra" vobyu qe alhab' re mhain" za: kaid' pye' li" genae". Laug baui dabaui lao" re: yao" jo, qo mae makai" jo, lo:sho' kaid' li" genae". Pe" mung: ga" re Mo"so wa nao re khyaid' yu nae" tau: mae" nao jhao" joe" li" ra" ayo, bana re nao maba mabeim: ngaid: ra" ga: mho: ra".
  • 45 Ai: thao Yesu wa pa" jhaung: yham khug khyo ye: mung: zai: aung: zai vai mo, re nga" yham wa jhaung: mho' yham ngaid: ra" ga: jham: paug' mae tung" to: qere: –
  • 46 Naonhaung" wa aire cang tau: khyaung kaid' pye' aveko" ga: ta" yang: yao: bam re
  • 47 khe' thug' pye' ra". – Ba khao: ngo" Yesu wa pa" jhaung: yham mae mho" shid' na: ra" khin jaung qi: qe , jham: ba pho" qe we' lau: de; qe wa Yesu re se' pye' nug:
  • 48 ako". – Ngaid qere: volo byu alhab' wa Yesu mho" dao: re dakheim: re re: malhai: ke' lo: tae" gyo" na: bam ko" ru: yang yao: bam wa Yesu re khoru: qo" se' pye' nae" akhyo mamyao ko" ngaid: ra".
回到本卷目录 回到本版本目录 回到首页