1 Dug no: ba dane, mae Yesu wa Phareshe"qe mae" lau: de; mo" dayaug; yham khyo zo zo: nae" ga: vao ye" ra". Yao:bam wa Yesu re khug' jhug' qu" na:2 bam: ako". – Vae: dug: mae qid thaung bo mung: no: na: ra" byu dayaug Yesu jhao"3 li" joe" na: jo; ra". – Yesu wa Phareshe" qe we' jham: ba pho" qere naonhaung" tarha" wa dug no: ba mae no gai: byid' ga: ta" ra" i"? mangaid: lao" magai: gai byid: ga:4 ta" ra" i"?ga: myid' ra". – Yao: bam wa pe" dakheim: re: matau: ko" ngaid: ra". Ailao" Yesu wa ai: no yaug re jhui" yu yang: gai byid: mung: yao: re phao nhao: ke' ra". –5 Amung: Yesu wa yao: bam re dug no: ba mae naonhaung" gug' nyhug' dadau: dau: dung: gyain: mae byid: gyo" laung" jo; re mashe: thaid' yu nae" khoyaug na genae"6 i"? ga: myid' ra". – Ngaid qere: yao: bam wa ce: dao: kheim: re maqo" phaug' tau: ko" ngaid: ra".7 Poe mae khai: to: qhug' ra" mo, wa langa: bo: ra" zaung jao: mae cao" qho: zaung ko" ru re myao lao" yao: bam re8 mho: ru wa – Naonhaung" re dayaug yaug myi:vhin" poe li" khai: re je: myhao: ra" jo, qo mae daye: zaung ge, kho khoru: nao tho' je: phug' myao: gai: ra" yaug re re: khai: to:9 nae". – Khai yaug wa yao: we' nao jhao" li" mung: nao re ceyaug; tau: mae" jo, qo qhui" byid: wa, ga: ta" lao" nao wa nyham: thao" ra" jo, qo khyo qho' mo" dage, le,10 gyo" qui" zaung ca" li" nae". – Nao re su: yang khai lao" nyham: thao" jo, qo mae shi" ye: zaung wa, nao re khai yaug wa li" yang: ba nam pho" we" je: myhao: ra" jo, qo khyo li" zaung wa, ga; nao re ta" nae". Ailao" nao wa bang" vo alhab' mo; qhid'11 kheim: mae nga:bo nae". – Khoru: mung: ga" re yao: yao" gaung re khin" ra" yaug wa nyham: khyo" pye' ru qhug' li" nae".Yao: yao" gaung re nyham: khyo" ra" yaug kam" wa khin" ru qhug' li" nae" ga: mho: ra".12 Yesu yao" bang" sang pho" re mho: ru wa nao wa myi" xeim zo: poe nyhang" seim" to" re ni" byin cao: qe , ni" ba nam qe, ni" mao: nhaung" qe ni" yham kyo: cao: dai zug: qere dakhai khoru: ga" re yao: bam wa nao re dam: tug' khai zho: mung: nao re13 jeju dam: tug' xe' li" genae". – Airu: mung: nao wa zo: shaug' poe da" zho: nae" lao" myaung sho: mo, khyid gyug: myo, jid mo,14 re khai zho: wa, – Ailao" nao wa nga: lho" li" nae". Khoru: ga" re yao: bam wa nao re jeju maqo" tug' xe' lo: ko" ngaid: ra". Dang main" ra" mo, dam: daui: to" li" ra" ba na re Mo"so nao re jeju xe' li" nae" ga: mho: ra".15 Zo zo: poe mae zaung: na ko" ra" gu: mae" dayaug wa ai: dao: re the' gyo: lao"Mo"so: mang: din" zo: shaug' poe mae ye: qo" vao zo: nae" yaug wa nga: lho" ra"16 wo" ga: ta" ra". – Ailao" AsAng yao: re dam: mho: ru wa byu dayaug wa zo zo: poe mo" kaid' yang: byu myo: sho' re khai: to" ra". –17 Zo zo: yo, joe" lao"yao: wa alhab' geim" jin" to: va" zang" li" ge se, ga" ein: cao" ta" nae" tau: khai: to: mo, jhao" yao" daui mung18 yaug re nhao: ke' ra". – Ngaid qere: yao: bam wa dayaug: thao dayaug maqo" li" ra" akhyo ta" ako". sao qhid' mae" yaug wa ngo myid gaung dacug' zo: vai: to" airu ye: qu" ca" ra". Airu: mung: ngo re akhang" byid:19 la, ga: daui mung yaug re ta" ra". – Getau dayaug wa nung jaung lo: ngo" zam" vai: to" ai jham re mau" ye: jhui" kaid' ca" ra". Airu: mung: ngo re akhang" byid: la, ga: ta"20 ra". – Amung: getau dayaug wa ana" shi" yham sang myhi" vhin" to: mung: maqo"21 li" ga: ta" ra". – Daui mung yaug wa dam: tug' lo" mung: ai: gu: alhab' yao" asang re lo: zhao: kyo" ra". Yao" asang wa nhag' yo: mung: yao" daui mung yaug re hau" mo" mae we' ajheim ajhe' khyo mye, mye, ye: mung: lo, qeim khyid gyug: myo, jid mo, re ce khyo ye: jhui" lo wa, ga: ta" mung: nhao: ke' ra".22 Ailao" daui mung yaug wa AsAng we" nao amyin" byid' ra" khyo: kaid' va".Ngaid yang: re: jo, qo qui" ashi" ga: dam: ta"23 ra". – Yham sang wa yao" daui mung yaug re khyo dang khain mae" we' sag' gae qao: mae na mo, re nga" yham byang" sho' ye:24 cao" lhaung: jhui" lo wa, – Ngo khai: to" ra" mo, dayaug lao" ngo yhaung" to" ra" zo: shaug' re maqhug' zo: shaug' genae" ga: ta" ra".25 Volo byu phaung mo" wa yao" thao cao" qin" ako". Ailao" Yesu wa yao: bam26 jhao" lhang; ye, yang: , – Byu dayaug wa ngo jhao" li" nae" ngaid: re yao" myhi" pho" yao" myi: zo: , yao" mao: nhaung: , nhae: mo" we' yao: yao" gaung re jhid' ra" tho' ngo re majhid' de; ra" yaug wa nga" naung27 cao maqo" boe" ngaid: ra". – Amung: yao: yao" pyao: zang re yao: yao: vo, yang: nga" thao macao" ra" yaug wa nga" naung cao magai: boe" nae".28 Naonhaung" mae" khag' ngaid qere: yham dayham kaid' pin" nae" ngaid: re qo" kaid' pin" nae" maqo" kaid' pin" nae" ngaui laug malaug nae" ein: ru re zaung: jo, mung: mamyid: tau" lo: khoyaug kaid'29 nae" i"?.– Kho khoru: yham kaid' yaung: to: mung: maqo" kaid' pin" ngaid: re myao:30 ra" mo, wa – Byu ceyaug wa qhid: to: mung: maqo" kaid' pin" lo: ngaid: ra" ga:31 jung" pye' genae". – Mang: zug: dayaug wa zug: geyaug we' mang: jho" khaid' nae" ngaid: re yao" byu datug wa gyevo shid' tug re lham: qo" aung nae" la, i"? ga: sao qhid' manghae" qu" lo: za: gye zin: to" nae"32 i"?. – Ai ru: mangaid: lao" gyevo va: mae na shi" au: mae" logyo: nhao: ke' mung:33 mang: gai dao: ta" nae" mangaid: i"?. – Ai we' dakhyo: za: naonhaung" mae" khag' ngaid yang: re: yao: qo" ra" gu: alhab' re mato" pye' co' ra" yaug wa nga" naungcao maqo" boe" ngaid: ra" ga: dao: pin" ke' ra".34 Xo: wa ngae: myho' ra". Ngaid yang: re: ngae: ra" ru shao" byaug lao" wa dam: ngae sho' khoru: madam: gai: kaid' ngaid: ra". –35 Ai wa myid gaung mae re: , myid jin" kaid' nae" tau: mae re: magai lo: ngaid: ra". Ai mung: ai: xo: re taung gaung khyo shepye' pye' nae" za: angaid lo". Amung: no: de, mo, wa gyo" yu veshao: ga: mho: ra".