1 Ai: dao: tau" jham: yang yao: bam re ta" ra". Byu dayaug wa sabyi' yo dakhyao: qho" to: mung: ai: khyae re kyae" lhang" yang: sabyi' pyag' xam rere: dau" to" ra". Gyebyu zaung rere: kaid' to: mung: yo ngho" kaid' zo: mo, re ngho: byid: co' yang: getau:2 mang: khyo ye" lo" byaug: ra". – Ayo, gyai myao" thao re joe" lo mung: yo ngho" zaui: mo, jhao" jeim dayaug re yo ngho: phug' sabyi' shi: mho' nhao: ke' ra".3 Yo ngho" zaui: mo, wa ai: jeim re lham: taui" be, mung: akeim dam: nhao:4 ke' ko" ra". – Thao dalhang yo sang wa jeim dayaug re dam: nhao: ke' ra". Yo ngho" zaui: mo, wa ai: jeim pho" re au: be; caid' dae te' ke' mung: qho' lham: phyo'5 ako". – Getau: jeim dayaug dam: nhao: ke' re yo ngho" zaui: mo, wa yao: re lham: be; se' pye' ako". Getau myo: sho' mo, rere: dakhyo: za: be, mo, re be, se' mo, re se'6 pye' mung: kaid' ako". – Aimung:yo sang wa nhao: ke' nae" ru yao" zote: zo: dayaug za: adang: alo". Aimung: yao: wa nga" zo: re lham: phug' myao: genae" ga: ta" mung: lo" thao" mae yo ngho" zaui: mo, jhao" yao: zo: re nhao: ke' ra".7 Yo ngho" zaui: mo, wa ce yaug wa yo sang: Ma khae: yu nae" yaug ngaid: ra". Li" geri: yao: re se' pye' gelang: alao" yao" jo, nho" wa nyhao: mae" boe" zai ngaid:8 ga: yao: cao: jho" ta" ako". – Yao: bam wa yao: zo: re cam" yu yang: se'pye' mung: yo gyeim: taung gaung mae ye: she: pye' to" ako".9 Airu:lao" yo sang wa khoru: kaid' nae" i"? yao: wa li" mung: yo ngho" zaui: mo, re se' pye' yang: sabyi' yo rere: geje re ngho:10 byid' li" nae". – Yham kaid' mo, kang" lhaui" pye' ra" laug baui wa khaung nho mo" thao mae nghoe' ra" laug baui boe" lo va".Ce wa Mo"so: yang kaid' ru ngaid: ra".11 Ai wa ngonhaung" qhid' kheim: mae mug' pho" mau" ngaid: ra" ga: jham: dao: re naonhaung" manghe' qu" ko" i"? ga:12 mho: ra". – Yuda au: she mo, wa yao: bam re qang yang: ce: dao: tau" ta" rure ba gemung: AsAng re cam" nae" seim" ako". Ngaid yang: re: volo byu phaung mo" re gyaug geyang: AsAng na: jao: mae" thug' lo" ako".13 Ai: thao mae yao: bam wa yao" dao: thoe: yang qobo qo" zhaug' nae" tau: Phareshe" qe we' Herod' byu daqhae: re14 AsAng jhao" nhao: ke' ako". – Yao: bam wa te' ye: mung: AsAng Mo"so we" nao wa dang main" ru we' khag' rere: myo, nho makhyin: rure ngonhaung" ba: ra". Pe" mung: ga" re nao wa byu gaui maqu" lo: Mo"so: khyo re dang dang za: mho" na: ra". Siza: jhaung zug: re khang" daug gai:15 ke' i" magai i"?. – Ngonhaung" byid: zai i"? mabyid: zai i"? ga: myid' ako". AsAng wa yao: bam geim kaid' rure ba mung: ngo re pe" mung: lag yu: qu" ko"?. Ngo jhao" ngaui16 dakye' ci: li" ge, ga: mho: ra". – Ailao" yao: bam wa ngaui dakye' ci: li" ako". Ce: mae khag' sulho we' khag' mang aso: de; ra"? ga: myid' ke' ra". Siza: jhaung zug: sulho we' mang aso: de; ra" ga: tau" ako".17 Yesu wa jhaung zug: Siza: we' tin" ra" gu: Roma jhaung zug: Siza: re byid: ge, Mo"so we' tin" gu: Mo"so re byid: ge, ga: mho: ra".Yao: bam wa gyai mug' byaug: ako".18 Ai: thao dam: daui: to" li" khyo majo, ga: ta" ko" ra" Saduke" damyo" AsAng19 jhao" li" mung: , – AsAng Mo:so we" byu dayaug zo: maqo" lo: shid: lo" yang: myiqe: re shid: cug' co' ra". Yao: nhaung: wa ai: myiqe: re dam: ngho" mung: yao: mao" nyaug dam: xo' veshao: ga: ngonhaung"20 re Moshe tung" to: byid: co' ra". – Nhaid' yaug danhae tao ho' na: ako". Saoqhid' yaug myi: yu yang: zo: dau makhau shi:21 mae" shid: pye' ra". – Thao mae" yaug cug' gaug yang: zo: mabo shi: re dam: shid: lo"22 va". – Ai we' dakhyo: sam yaug ein: yaug mae" re , nhaid' yaug: geim" myiqe: myhi" ai: yaug re yu mung: zo: made; ru shid: pye' veko". Lo" thao" mae ai: myiqe: myhi"23 re: bocao" shid: pye' ra". – Airu: ngaid: re dam: daui: to" li" ra" ta mae ai: myiqe: myhi" wa khoyaug: yham sang myhi" ngaid: nae"?. Pe" mung: ga" re yao: wa nhaid' yaug geim" yham sang myhi" boe"24 qu" va" ga: myid' ako". – Yesu wa yao: bam re naonhaung" wa jham: tung" we' Mo"so: qam: so' re maba geyang: shaid'25 nghung" na ko" mangaid: i"?. – Shid: ra" mo, dam: daui: to" li" lao" myi: yu myi: byid: ga" ru majo, lo: mug' logyo: qe we'26 dakhyo: ngaid: genae". – Ai mae" dagau: wa shid: ra" mo, dam: daui: to" li" ru we' tin: mung: myi: nga" na: ra" thao" paung" mae" Mo"so Moshe re mho: ru wa ngo wa Abraham: Mo"so , Isag: Mo"so we' Yaku' Mo"so ngaid: ra" ga: ta" ra". Jham: dao: mae Moshe tung" paug' re naonhaung"27 mathe' nghe' qu" ko" i"?. – Mo"so wa shid va" mo; Mo"so mangaid: daui: ra" mo; Mo"so angaid:. Naonhaung" wa gyai yao: shaid' nghung" byaug veko" ga: mho: ra".28 Yesu we' Saduke qe jho" ngag: na ko" rure jham: ba pho" dayaug the' gyo: yang: AsAng yao: bam re gelho: za: pheim byid' na: rure ba mung: qui" ye: yang: amyin" khang" dao: alhab' mae" kholam:29 wa je: akao ngaid: ga: myid' ra". – Yesu wa amyin" khang" dao: alhab' mae" akao mo" wa O" Israel amyu" qe we" tae" gyo: ge, . Ngonhaung" AsAng Mo"so wa daso30 za" Mo"so ngaid: ra". – Ni" Mo"so AsAng re aung khug nhag' lam: , nyain ba: gu: alhab' , qam: o: bun alhab' we' jhid' de, ca".Ce: khang" dao: wa saoqhid' khang"31 dao: ngaid: . – Shid' lam: ein: lam: wa ni" yham kyo: cao: re ni" gaung re" ru: jhid' de, wa, ga"ru ngaid: ra". Shid' lam" khang" dao: wa saoqhid' mae" khang" dao: we' dakhyo: za: ngaid: ra". Khang" dao: ce shid' kheim: mae" je yang: je: qi" ra" khang" dao:32 getau majo, lo: ga: mho: ra". – Ai: jham: ba pho" wa ngaid va" AsAng Mo"so we" nao wa dang: ra" khyo mho: ava". Mo"so wa daso za: na yang: yao: mae" je yang: getau33 mana lo: – Ai: Mo"so re aung khug nhag' lam: alhab' , nyain: ba jhao: ru alhab' , gaung khyao qam: o: alhab' we' jhid' de; ru , Yham kyo: cao: re yao: yao" gaung re we' dakhyo: jhid' de, ca" nae" ngaid: ra" ga: amyin" khang" dao: shid' lam: re phug' cao" ru wa ngaui" xeim: alhab' tho' je:34 akao ngaid: ra" ga: mho: ra". – Ai ru: nhag' gyang: taung" dam: tau" ra" rure Yesu ba lao" yao: re nao wa Mo"so: mang: din" we' mataung" va: lo: ngaid: ra" ga: mho: ra". Ai: thao mae Yesu re khag' re: pe" mavae" myid: lo: ko" ngaid: ra".35 Ai: au: Yesu wa pa" jhaung: yham khug mae mho" shid' na: au: yao: bam re Khris- tu wa Davi yao: zo: ngaid: ra" ga: jham: ba pho" qe khoru: mung: qo" ta" ko" ra"36 i"?. – Ni" gye jham re ni" khyid qao: mae ngo mato" to: byid: wa Nga" lo, yo shaid' mae zaung: jo, wa, ga: ai: AsAng nga" AsAng re ta" ra" ga: Davi wa shaogyang"37 solo vao jaung" mung: ta" ra". – Aimung: Davi yao: yao: lao" Khristu re AsAng ga: ta" ngaid: re wa Khristu wa khoru: mung: Davi zo: myid: gai: ngaid nae" i"?ga: mho: ra". Volo byu qe wa ngaui bau: ngaui lho" tae" gyo" yu: ako".38 Airu: mho" shid' zo" re" mho: ke' ru wa jham: ba pho" qere lha" ge, yao: bam wa bau: qhang ve, yang: su" qin" nug: ako". Gai aung" na: byu zang: jao: mae lham: phug' myao: genae" o mo, ham phaung jao: mae getau jaung: to" ra" jo, qo mae39 na nug mo, ngaid: ako". – Yao: bam wa cug' mo" cug' zo: qe yham zai yo khug' jham re phyo' zo: lhaid' zo" ci mung: su qu" gai nae" geim kaid' mo, jhaung: qhang40 sho' mho' mhug' mo, ngaid: ako". – Yao: bam wa qi" thao" pyam" yhin" ru qhug' li" genae" ga: mho: ra".41 Ai: thao Yesu wa aung lam bain" we' tau" te' mae zaung: jo, mung: byu qe aung lam bain" mae aung lam li" ke' ko" ru qu" na: ra". Jo, nho" qo" ra" mo, myo: sho' mo,42 wa myo: sho' li" ke' ako". – Sho: jhin: ra" cug' mo" myhi" dayaug re: aung lam bain" jo; khyo li" mung: thang: the: dakye' we' main" ra" gyid: cug' shid' cug' re li" ke'43 ra". – AsAng wa yao" naungcao qere khai: yu mung: ngo dang dang mho geli". Jo, nho" bain" mae ke' ra" mo, gu: alhab' tho' mae" ai: myaung sho" ra" cug' mo" myhi"44 wa je: myo" ke' ava". – Pe" mung: ga" re yao: bam alhab' mo, wa masheim: pe' go" qo" ru mae" jain" ra" gu: re li" ke' byid' ako". Ce: cug' mo" myhi" kam" wa myaung sho: ngaid qere: qo" ra" gu: alhab' yao: zo: nae" alhab' re ke' ava" ga: mho: ra".