1 Yesu wa pa" jhaung: yham mae" taung gaung khyo thug' ye" lo" na: au: Naung- cao qe wa AsAng jhao" qhui" lo mung: pa" jhaung: yham jham re ceim"qhu" ako". –2 Yesu wa yao: bam re ce jham re naon- haung" myao ko" mangaid: i"?.Ngo naon- haung" re mho geli". Ce: yham mae" laug baui jham dabaui: dao dabaui re: makai" jo, lo: sho' byo; qeim: lo" byaug: li" nae" ga: ta" ra".3 Yesu wa Zhanlun: bam dao mae zaung: jo; ra" au: naung cao qe yao: bam yao: za: Yesu jhao" qhui" lo mung: ce: ru khon- hae" kho yo, boe" li" nae"?. AsAng dam: joe" li" ayo, we' lo" thao" ba na joe" nae" pe" ru" ve, lho jham boe" thug' li" zai laug i"? Ngonhaung" re ta" kyo: la, ga: myid'4 ako". – Yesu wa naonhaung" re khag' yang re: majhui" pyag' lo" geshao: lha" yang: na5 ge. – Byu myo: sho' mo, nga" mang vin mung: ngo wa Meshia ngaid va" ga: ta" yang: byu myo: sho' mo, re jhui" pyag' lo"6 byaug: li" genae". – Gye jho" she mung: mang: byo, lao baui: ra" lau dao: re naon- haung" the' gyo: genae". Dagyo" din ge, ai: gu: wa boe" yao: boe" zai ngaid: .Ngaid7 yang: re: lo" thao" ru mangaid: shi: .– Byu damyu" we' damyu" damang: we' damang: gye jho" she mung: mang: jho" khaid' li" genae" jo,qo getau tau mae myid lab: lab' li" nae". Bao" khug' gyo" lo nae". No8 qam" aja: ja: gyo" lo nae". – Aijham wa qug: khai: kyi" khyag' ru aqhid' shi" ngaid:9 ra". – Ai:ayo, mae naonhaung" re qobo zhaug' mung: khang: nhau: be, khyaid' kaid' genae". Se' pye' nae" tau: qhaug' byid' pye' li" genae".Nga" mang kheim: mathao mae byu myo: sho' mo, naon-10 haung" re manug mung: li" genae". – Ai: ayo, re byu myo: sho' mo, khyo nghung: nghung" lo" mung: yao: cao: yao: jho" qhaug' byid' ru we' yao: cao: yao: manug11 jho" thug' jho" qu"gyid' li" genae". – Lapa mhug' jham myo: sho' bo: thug' li" mung: byu myo: sho' mo, re jhui" pyag' lo" byaug:12 li" genae". – Azhaug' amhe' mo, myo" li" mung: myo: lo bug jhid' de; myid yeim:13 lo" byaug: li" nae". – Athao jao: sho' zang: qhao" ra" yaug wa khyaid' yu: ru qhug'14 nae". – Byumyu" cao jab tau: sagso: boe" veshao: mug: gaung: mang: din" ngaui baui: lau dao: re mug: myid gye, gam: sho' hau" nhao" joe" lo" nae". Alao" she, lo" thao" ru joe" lo: li" nae".15 Airu: mung: lapa Daniel ta" to" ra" qu" din nae" maca' majhaid' wa shao gyang" ra" jo, qo mae li" ye; jo; rure naon-16 haung" myao: li" genae". – Ce: rure the' myao lao" Yuda mang: mae na yaug bam17 myhao khyo phao: do, geshao:. – Yham khaung dao mae na yaug wa yham khug mae" yao" mai bau: malo" lhang: yu lo:18 veshao:. – Yothaung: din" mae na yaug re: yao" bau: qhang yu: ci nae" tau: yham19 khyo madam: lo" shao: .– Ai: ne, mae maqao" gaung la: mo, we' nug' nau" ci: ra" myhi" zang qe gyai qug: khai: sho:20 jhin: thao" ngaid genae". – Naonhaung" tao" phao nae" ayo, wa gyo, yo, we' dug no: ba mae ma-ang veshao: jhaung: mho'21 na ge. – Ai:ba mae boe" nae" qug: khai: kyi" khyag' wa mug: myid gye, jo; qhid: ru mae" ana" ba joe" sho' maboe" qu" shi" ra" qug: khai: kyi" khyag' wa ai: ba mae boe"22 thug' li" nae".– Ai: ayo,wa myao" mung: khag' lao" qo" loe, genae" mangaid: . Khyin: yu qhug' ra" mo; tau: mae" kam" ai: ayo, wa lang" lang" za: ngaid: li" nae". –23 Ai:au: su dayaug yaug wa qu" wa, Khristu ce tau mae na: ra" ga: ta" rure dalam"24 ge. – Khoru: ga" re Khristu lho she' mo, we' lapa lho she' mo, thug' li" genae". Yao: bam wa gai: boe" ngaid: re khyin: yu: to: va" mo, re lao" qo" jhui" pyag' yu nae" tau: mug' pho" ve, lho mau" aja:ja: re25 kaid' qhu" li" genae". – Tae" gyo: ge, ngo naonhaung" re gau: qhid' ngho" yang: ta"26 to: va" rure beim" na ge. – Su: yang naon- haung" re qu" ge, Khristu thoe" seyo mae na: ra" ga: ko" re daye: qu" ge, mangaid: lao" qe, khug mae na: ra" ga: ko" ngaid27 yang: re: dalam" ge, . – Lhe' caid' wa ba thug' mae" ba vao shaid' khyo bag bao: lo" ru we' Byu: yao: zo: joe" li" nae"ngaid:28 ra". – Mao jo; ra" tau mae zeim ngha, jham ham: na: li" genae".29 Ai: qug: khai: kyi" khyag' boe" lai: lo" thao khyain: mung: ba wa no; byaug nae". Lho" re: sham: byaug nae" kyi jham byid: gyo" lo" li" genae".Mug: gaung: phung bao30 jham laui" nain" li" genae". – Alao" mug: gaung mae" Byu: yao: zo: joe" li" nae"ve, lho jham myao: thug' li" nae". Myid gye, geim" byumyu" cao jab wa ngug byid ngug nhe' ru boe" genae". Byu: yao: zo: wa qam: o: phung bao we' daga" jham phyu la lhang" thaui:dao mae joe" li" ru the' myao31 genae". – Byu: yao: zo: wa yao" mug: logyo: qere labo" maid nhao mung: mug: khothao" myid khothao" myo, nho byid shaid' mae" khyin: to: va" myid gaung: dao: mae" yao" byu qere yao: bam cao" zhang" yu: li" genae".32 Pho' ham" gae re qu" yang: mho" yu ge, pho' ham" gae anyaug nau" li" mung: avho' nau" taid' li" lao" zin vao kheim:33 ngaid va" rure naonhaung" ba: ako". – Ai we' da khyo: ai jham alhab' boe" lo: na: rure naonhaung" the' myao gelao" Byu: yao: zo: wa jhao" li" mung: kham: dung:34 mae joe" va" ein: rure beim: so: ge, . – Ngo naonhaung" re dang dang mho ge li" ana" na: jo; ra" byu jham mashid: gain shi: re35 ai jham alhab' boe" li" nae". – Mug: gaung we' myid gaung lai" lo" byaug qere: nga" dao: wa malai: nae".36 Ayo, ba na re kam" khag' re: maba mug: logyo: jham re: maba nga" pho" dayaug za:37 aba: . – Noa' ta mae boe" ru we' dakhyo: Byu: yao: zo: joe" li" nae" au: airu: boe"38 nae". – Da qid mashi: shi" ra" ta mae" byu jham wa Noa' lha mae vao lo" ba joe" sho' zo: shaug' yang: myi: yu myi: byid: yang:39 na: bam ko" ra". – Daqid shi" lo yang: yao: bam re sham" she: khyaid' lo" ra" ayo, joe" sho' mabeim: maso: na: bam ko" ru: Byu: yao: zo: joe" li" nae" ayo, mae re:40 boe" nae". – Ai: ayo, mae byu shid' yaug yothaung: dae mae na: ru dayaug re jhui" yu qhug' mung: dayaug dang: gyo" nae". –41 Myiqe: shid' yaug laug lhang ceim" lhang: na ko" ru mae" da yaug wa jhui" yu qhug' mung: dayaug wa dang: gyo" na nae". –42 Naonhaung" AsAng wa khoyo, khodau mae joe" li" nae" rure naonhaung" maba ko"43 mung: lao" na ge, . – Yham sang wa khug' su li" nae" ayo, akhin: re ba: to" ngaid: re wa yao" yham re khug' su maqo" vao li" nae" tau: yao: lhaug' na: li" nae" mangaid:44 i"?. – Ai ru: mung: naonhaung" re: jin" jin" seim" na ge, khoru: ga" re Byu: yao: zo: wa naonhaung" mamyid: to: mabeim: maso" au: re joe" li" nae".45 Ayo, cao" yang: yham byu qere zo: shaug' nyhang" zho: zai ga: AsAng nhao: to" ra" gin bo mung: lam: lang" ru we' juyi bo mung: jhaug' zaug: ra" daui mung yaug46 wa khag' ngaid: ra". – Yham sang wa yham khyo dam: joe" lo: re ai: gu: alhab' re lam: lang" taung" kaid' to: qo lo: myao: ra". Ai:47 daui mung yaug nga: lho" ra".– Ngo naon- haung" re dang dang mho geli".Yham sang wa ai: yaug re yao" jo,nho" alhab' geim" re48 qu" shaung nhao: li" nae". – Makhyang" ra" daui mung yaug ngaid lao" wa nga"49 yham sang dam: lhang" lo nae". – myao" shi" ga: ta" mung: daui daui mo, re se' da: be, khyaid' kaid' mung: yhid ya: qe we' zo:50 shaug' mung: na: li" nae". – Ai: daui mung yaug matag: to" ra" ba na ayo, mae yao"51 asang dam: lo: li" nae". – Ai: daui mung yaug re qobo byid: be, mung: geim kaid' ra" mo, we' daga" qobo dae byid: nae". Ai: jo,qo mae ngug byid ngug nhe' we' zaui kyag' kyag' yang: na genae".