1
Herod mang: zug: ngaid: au: Yuda mang: Belehem vogaung: mae Yesu khau: li" va". Qu" wa, ba thug' shaid' mae" ba jhao pho" jham Yerusalem vo khyo li"2
ako". – Khau myhung: li" va" Yuda qe: jhaung zug: wa khai: mae na: ra" i"? Ba thug' mang: mae ngonhaung" wa yao" kyi re myao mung: yao: re goe; pa" caung: nae" tau: mae" joe" li" ru ngaid: ga: mho:3
ako". – Dao: kheim: ai: gu: re the' gyo: lao" mang: zug: Herod we' Yerusalem4
vobyu qe sang: gyo" kho" ako". – Aimung: khin jaung qe we' jham: ba pho" jham re khai: zhang: mung: Meshia khai: mae khau: li" zai ngaid: laug i"? ga: yao: bam re myid' ra".5
Jham: ba pho" qe wa Yuda mang: Bele- hem vogaung: mae khau: li" zai ngaid: ra". Khoru: ga" re lapa dayaug tung" to" ru wa. –6
Belehem vogaung: we" nao wa Yuda mang: mae" ngai: thao" ra" mageim" vogaung: mangaid: Nga" amyu" Israel byumyu" re ug nae" zug: wa nao mae" khau: li" nae"7
ga: bo: ra" ga: ta" ako". – Ailao" mang: zug: Herod wa Maku ba jhao pho" qere sae za: khai: yu mung: ai: kyi bao: thug' li" ra" ayo,8
re jhaug' za: myid' ca: yu mung: . – Naon- haung" ye" lo" mung: ai: zoshao re qhug' sho' ye: qho ge, myao lao" ngo jhao" dao: dam: lo: kyo: ge, ngo re: yao: re ye: goe; pa" nae" ga: pin: ke' ra".9
Yao: bam wa Herod: dao: re gyo" ci mung: xo' ye" lo" ko" ra". Ailao" qu" ge, Ba thug' mang: mae myao: ra" kyi re yao: bam myao lao" matho' ta" lo: sho' ngaui bau: ko"10
ra". – Ai: kyi wa yao: bam: qhid' au: khyo ye" lo" mung: ai: zoshao na: ra" jo, qo atho'11
mae lo" thang: jo; ra". – Ailao" yao: bam yham khug khyo vao ye" lo" ko" re zoshao we' yao: myhi" Mari re ye: myao mung: yao: bam: thaung phung" yang: mura: xau , lo:bain: we' hhang re jhaung qhu" byid'12
ako". – Mang: zug: Herod jhao" madam: tug' lo" nae" khyo: yab mo, mae myhao" peim: byid' ra". Aimung: yao: bam wa khyo gegau: khyo" yao: bam: mang: khyo dam: tug' lo" ako".13
Maku ba jhao pho" qe dam: lo" byaug thao AsAng: mug: logyo: wa Yoseb re yab mo, qab li" qhu" mung: Yoseb we" ai: zoshao ma: re jhui: yang: Egutu mang: khyo phao ge, ngo dam: khai: ra" ayo, joe" sho' ai: mang: mae yena: na ge,. Herod wa ai:14
zoshao re se' nae" ga: qho: na: ra". – Airu: mung: Yoseb wa Mari we' zoshao re jhui: yang: myi" ayo, re Egutu mang: khyo phao:15
ye" lo" ra". – Herod mang: zug: shid: ra" ayo, joe" sho' ai: mang: mae ye: na: ako". Ceru wa nga" zo: re ngo Egutu mang: mae" ngo khai: jhui" yu va" ga: lapa: nhaid' thoe khyo" pa: to" dao: kheim: gyang" dang: lo nae" tau: ngaid: ra".16
Herod wa Maku ba jhao pho" qe yao: re mhug' mung: yho" to: co' veko" rure beim: lao" gyai nhag' gyid' ra". Aimung: Maku ba jhao pho" qe jhao" myid' yu: ra" ayo, re tau" yang: Belehem vogaung: mae" avai: ayae lhang" gam: vogaung: jham mae na: ra" shid' zin we' shid' zin: o mae" zoshao yaug gai alhab' re cao" se'17
pye' nhao: ra". – Aimung: Lapa Yeremi18
yang ta" to" dao: wa , – Rama, jo, qo mae gyai nhag' kaug' myo, yug: ru we' kaug' ngug: ra" thoe re the' gyo: va". Rakhela wa yao: zo: bam mana lo: gemung: ngug yang: nhag' maqo" tang" byid; ga" dao: kheim: ai: au: lo" dang: ra".19
Herod shid; byaug thao Yoseb re Egutu mang: mae yab mo, khyo" AsAng: mug:20
logyo: dayaug li" myhao" mung: . – Yoseb we" to" wa, ai: zoshao we' yao: myhi" re jhui: mung: Israel mang: khyo dam: lo" se, khoru: ein: re ai: zoshao re se' nug mo,21
alhab' shid: byaug veko". – Ailao" Yoseb wa zoshao ma: re jhui: yang: Israel mang:22
khyo dam: tug' lo" ra". – Ngaid qere: Yuda mang: re Akhela wa yao: pho" Herod khu mae mang: zug: kaid' yang: zug' na: ga" ru Yoseb the' gyo: lao" ai: khyo mavae" lo". Ai lao" yab mo, mae re: mug: logyo: ta" peim: byid: yang: Galile mang: khyo byaung" lo" mung: Nazared vo mae lo" na:23
ra". – Aimung: yao: re Nazared byu ga: mhang" li" genae" ga: lapa qe ta" to" dao: dang: lo: ra".