1 Israel amyu" mang: adau dau: mang wa ce ru: ngaid: ra". Qid meim shaid' mae Hetalon: gau: we' Hamaid' gau: nhae Hazara Eanon: bobo yang: Damasku' mug: kyo: qid meim Hamaid' vogaung: joe" sho' re: ba thug' shaid' mae" qid dae joe" sho' gu: wa Dain: amyu" mang: dau ngaid2 nae". – Dain: mang: dau anhae ba thug' shaid' mae" ba vao shaid' joe" sho' gu:3 Asha: amyu" mang: dau jo, nae". – Asha: mang: dau anhae ba thug' shaid' mae" ba vao shaid' joe" sho' wa Nabthali amyu"4 mang: dau jo, nae". – Nabthali mang: dau nhae ba thug' shaid' mae" ba vao shaid' joe" sho' wa Manashe: amyu" mang: dau ngaid nae".5 Manashe: mang: dau nhae ba thug' shaid' mae" ba vao shaid' joe" sho' wa Ephrim: amyu" mang: dau ngaid nae". –6 Ephrim: mang: dau nhae ba thug' shaid' mae" ba vao shaid' joe" sho' Rubin: amyu" mang: dau ngaid nae".7 Rubin: mang: dau nhae ba thug' shaid' mae" ba vao shaid' gu: Yuda amyu" mang:8 dau ngaid nae". – Yuda mang: dau anhae ba thug' shaid' mae" ba vao joe" sho' gu: mae naonhaung" caung da" nae" myid gaung da cug' jo, ca" nae". Ai: myid gaung lae phyao: je jid: gyang: yao: shid' tug: ngo" taung , qhang phyao: wa ba thug' mae" ba vao shaid' joe" sho' mang: dau jham we' qhang phyao: jho" dau nae". Ai: mug: myid khug mae shao gyang" jo, qo jo, ca" nae".9 Mo"so re caung da" byid: nae" myid gaung cug' wa aqhang khyo shid' tug: ngo"10 taung alae khyo datug bo ca" nae". – Ai: shao gyang" ra" myid gaung cug' wa khin: jaung qe: tau: ngaid mung: qid meim shaid' qhang phyao: shid' tug: ngo" taung ba thug' ba vao shaid' datug tug , qid bang: shaid' shid' tug: ngo" taung lae mung: Mo"so: yham wa ai: myid gaung cug' agaung: mae11 jo, nae" ngaid: ra". – Israel amyu" zo: qe khyo nghung" lo" ko" au: Levi' zo: qe re" ru: khyo manghung: nga" mau" re malam: lai: zaui:so: mung: shao lho" ra" Zadug' amyu" zo: myid: khin: jaung qe: tau: ngaid12 veshao: . – Ai: caung da" qhaug' ra" myid gaung we' Levi' byu qe: mug: kyo: anhae mae khin: jaung qe: tau: shao lho" thao"13 ra" myid gaung cug' boe" veshao: . – Khin: jaung qe: mug: myid: kyo: dam: nhae mae Levi' amyu" zo: qe: myid gaung cug' wa aqhang khyo shid' tug: ngo" taung lae14 phyao: datug lae: ru re qo" genae". – Ai: myid gaung cug' wa shao lho" ra" ru ngaid mung: Levi' zo: qe aung: re: magai: aung: nae". Sao qhid' mhang" ra" qhovo: qhoshi: re getau we' magai: jho" tha" nae". Gau jho phyid' yang: gai: aung: nae" mangaid: . –15 Shid' tug: ngo" taung ayae mae dang: jo, shi" ra" myid gaung ngo" taung wa byu na jao: we' vogaung: de: nae" jo, qo16 ngaid shao: . – Vogaung" aqi: aqhang wa qid meim shaid' byid taung: ngo" yo , qid bang: shaid' byid taung: ngo" yo , ba thug' ba vao shaid' re: byid taung: ngo" yo yo17 bo ca" nae". – Vogaung" mug: kyo: re: jo, ca" nae". Ai: ru wa qid meim shaid' shid' yo: ngo" xe , qid bang: shaid' shid' yo: ngo" xe , ba thug' shaid' shid' yo: ngo" xe , ba vao shaid' shid' yo: ngo" xe ngaid18 ca" nae". – Shao gyang" ra" mug: myid anhae qhang phyao: mae dang: jo; ra" ba thug' shaid' datug ba vao shaid' datug lae: ra" myid gaung mae yaug: ra" ashi: jham wa vo re lhaug' zaung" mo, zo: pho: ngaid19 veshao: . – Vo re qu" gam lhaug' zaung" nae" mo, re Israel amyu" khug mae" khyin:20 thug' yu ca" nae". – Ai: mug: myid dacug' geim" wa apyi azhaung byid shaid' geim" daqi" qi" ngaid mung: qhang: phyao: shid' tug: ngo" taung gyang: yao: , lae phyao: shid' tug: ngo" taung we' ai: shao gyang" ra" mug: myid cug' re caung da" qhaug'21 ca" nae". – Ai: shao gyang" ra" myid gaung cug' we' vo we' tin: mung: jain" jo, shi: ra" myid gaung cug' ba thug' shaid' shid' tug: ngo" taung , ba vao shaid' shid' tug: ngo" taung: gu: wa zug: pho" tau: ngaid veshao: . Shao gyang" ra" myid gaung cug' we' yham22 wa ai shid' cug' agyo: mae ngaid nae". – Ai re" ru: agyo: mae ngaid: ra" Levi' amyu" qe: mug: kyo: we' vogaung" kyo: dam: taung gaung shaid' Yuda we' Benyamin: mang: dau shid' lam" agyo: mae ang: ra" gu: alhab'23 wa zug: pho" tau: ngaid veshao: . – Dang shi" ra" Israel amyu" qe: mug: myid adau jham wa ba thug' shaid' mae" ba vao shaid' joe" sho' Benyamin: mang: dau ngaid nae".24 Benyamin: mang: dau nhae ba thug' shaid' mae" ba vao shaid' joe" sho' gu: wa25 Simun: mang: dau ngaid nae". – Simun: mang: dau nhae ba thug' shaid' mae" ba vao shaid' joe" sho' Iskha: mang: dau ngaid26 nae". – Iskha: mang: dau nhae ba thug' shaid' mae" ba vao shaid' joe" Zabulun:27 mang: dau ngaid nae". – Zabulun: mang: dau nhae ba thug' shaid' mae" ba vao shaid' joe" sho' Gaid' mang: dau ngaid nae". –28 Gaid' mang: dau qid bang" thao mug: kyo: wa Tama: vo mae" ru Kadesha: , Meriba' qid thug' joe" sho' re: , qid dae mo" khyo yug: vao: ra" qid gyaung: cao" yang: ngaid29 nae". – Ce ru wa Israel amyu" akaung aboe: qe Ma khae: yu nae" tau: pha" khyo" mung: jho" gae: ra" mug: myid , jho" kho' gae: ra" mang: dau jham ngaid nae" ga:30 Mo"so mho: ra". – Ce ru wa vo mae" thug' nae" kham: mo" dung: ngaid: ra". Vomo" qid meim shaid' je jid: gyang: yao: byid31 taung: ngo" yo lae: ra". – Vomo" kham: re Israel amyu" akaung aboe: mang mhang" mung: qid meim shaid' mae Rubin: kham: dung: , Yuda kham: dung: , Levi' kham: dung: ga: mang: ra" kham: dung: sam dung:32 jo, ca" nae". – Ba thug' shaid' mae byid taung: ngo" yo lae mung: Yoseb' kham: , Benyamin: kham: , Dain: kham: dung: ga: mang: ra" kham: mo" dung: sam kham: jo,33 ca" nae". – Vomo" qid bang: shaid' mae byid taung: ngo" yo lae mung: Simun: kham: , Iskha: kham: , Zabulun: kham: ga: mhang" yang: sam kham: jo, ca" nae". –34 Vomo" ba vao shaid' mae byid taung: ngo" yo lae mung: Gaid' kham: , Asha: kham: , Nabthali ga: mang byid' ra" kham: mo"35 dung: sam dung: jo, nae". – Ai ru: vomo" lhang" gam: apyi azhaung wa datug: she' taung gyang: yao: bo nae". Vomo" re de" ra" ba mae" ru vomo" re Mo"so na: ra" vogaung: ga: mhang" genae" ngaid: .