1 Ai: thao shao gyang" jo, qo khyo myo, khung: qang: ra" taung gaung shaid' mae" kham: dung: khyo jhui" lo" mung: ai:2 kham: wa pyid' to: ko" ra". – AsAng re: ai: kham: wa maphung" lo: jo, ca" nae". Byu khag' re: gai: vao nae" mangaid: . Khoru: ga" re Israel amyu" Mo"so vao: ra" mathao3 pyid' to: ca" nae". – Zug: pho" tau: ngaid: ra". Zug: pho" wa Mo"so: qhid' kheim: mae zo: shaug' nae" tau: ai: kham: dung: mae qo" zaung nae" ngaid: ra". Ngaid qere: zug: pho" wa kham: mo" dung: khyo" mung: thug' vao ca" nae" ga: mho: ra".4 Alao" yao: wa yham kheim: ba thug' qid meim: kham: gau: khyo" ngo re jhui" lo" mung: Mo"so: phung qab bao wa Mo"so: yham mae byang" jo, yang: ngo wa5 goe; gam" yang: na: jo; . – Mo"so re: xaosu byu we" gelho: zhaug' qu" yang: xam" to: wa, . Mo"so: yham: tau: ngo byid' to" ra" cao" khyao khang" dao: tarha" jham re tae" gyo" yu wa, . Yham kham: dung: we' shao gyang" jo, qo mae" thug' ra" kham: jo, mae:6 jo, re zaug zaug za: xam" to: wa, . – Tau: lhain: ba: ra" Israel amyu" qe re AsAng Mo"so: dao: re kai" zhao: kyo: nae" ru wa7 Israel amyu" zo: myid: qe we" – Naon- haung" wa nga" zo: pho: ngaid: ra" xau thaung: we' sa: re caung da" ra" au: nga" yham re anyain: avho: boe" nhao nae" tau: nhag' lam: mae re: gaung sho: mae re: nyaug maphyid' ra" getau: byumyu" re nga" yham khug khyo vhao" mung: jo, qo byid: geyang: anyain: avho: mau" re kaid' ko" mung: naonhaung" ca' pho: mau" re kaid' laung: ko" khyo" yang nga" khang"8 dao: re phyo' veko". – Naonhaung" wa nga" shao gyang" jo, qo re magug: gam. Ai: jo, qo mae lhaug' zaung" nae" getau: amyu"9 re nha: to: ko" ra". – Mo"so ce ru: ga: mho: ra". Israel amyu" mae na mung: nhag' myid mae re: gaung sho: mae re: nyaug phyid' ru makhae: yu: ra" getau: byumyu" jham nga" shao gyang" ra" jo, qo khug khyo gai: vao genae" mangaid: .10 Israel amyu" zo: qe khyo nghung" lo" lao" yao: yao" mo"so: alho: thao cao" lo" ko" ra" mathao ngo mae" va" lin: lo" ra" Levi' amyu" zo: qe wa yao" qobo yao: phau:11 genae" ngaid: ra". – Ngaid yang: re: yao: bam wa nga" shao gyang" jo, qo mae mau" vin gezai ngaid: . Pa" jhaung: yham kham: jham re lhaug' zaung" zo" mae" caung da" mau" re vin vo, yang: na: li" genae". Phaid' ngaui" xeim: we' mang: byu qe caung da" xeim: dau: jham re se' mung: mang: byu: gaung tha" caung da" mau" re zaui:12 genae". – Yao: bam wa alho: qhid' kheim: mae byu qe: tau: mau" re zaui: byid: ko" mung: Israel amyu" tha" thu: lang: yang qobo khug khyo lang" vao lo" ko" mathao yao: bam re nhang: kheim: ke' va" mung: yao: bam wa yao: yao" qobo dae re khae:13 yu vegeshao: . – Khin: jaung kaid' mung: ngo jhao" maqui" te' li" , shao gyang" jo, qo mae shao lho" ra" zai jham re mazaui: maci ko". Yao: bam wa yao: yao" qho' pho: we' anyain: avho: mau" re kaid' ko" mung:14 ai ru" ru yao: bam phau: geshao: . – Ngaid qere: nga" yham re lhaug' zaung" mung: caung da" ra" mau" alhab' re zaui:so: vin vo, nae" tau: yao: bam re lam: to: nae". –15 Israel amyu" zo: qe ngo mae" gao" lo" yang: khyo nghung: nghung" lo" ko" au: nga" shao gyang" jo, qo re qu" gam: ra" Levi' amyu" ngaid: ra" Zadug' zo: myid: khin: jaung qe wa nga" mau" vin nae" tau: ngo jhao" qui" te' li" ca" nae". Ngo re xau thaung: we' sa: re caung da" nae" tau: mae nga" qhid' kheim: mae ye, genae" ga:16 Mo"so mho: ra". – Yao: bam wa nga" shao gyang" ra" qe, khyo vao mung: nga" mau" vin vo, nae" tau: nga" gai" dao nhae khyo qui" te' ye: mung: caung da" genae" ngaid:17 ra". – Yao: bam wa vang" akhug: kham: dung: khyo vao: ra" au: jid: mo" mai bau: re ve, ca" nae". Ai: khug mae mau" vin vo; na: au: yao mug' mai bau: gai: ve, nae"18 mangaid: . – Jid: mo" pin: au: thab' thab'19 mung: pin: phyid' cui: cui: ca" nae". – Volo byu qe na: ra" vang" taung gaung khyo thug' ye: nae" ngaid: re caung da" na: au: ve; ra" mai bau: re shao gyang" qe, mae khyaid' to: co' mung: agai: thug' nae". Azhao: mae" mai bau: ve, yang: volo byu qe re gai: shao20 lho" nhao nae" mangaid: . – Yao: yao" xae re magai: qaug nae". Maqhang: li" nae" tau:21 lhai" phyid' pye' ca" nae". – Khin jaung pho" wa akhug: vang" khyo vao: ra" au:22 sabyi' qang: magai: shaug' nae". – Cug' mo" we' yaug gai we' gao" na: ra" myiqe: magai: yu nae". Israel amyu" zomyi: , khin:23 jaung: cug' mo" re gai: yu nae". – Nga" byu qe shao lho" ru mashao malho" ru re ba: kho' khaui: mung: shao gyang" ra" ja: we' mashao magyang" ru ba sho' khin: jaung qe wa mho" shid' byid: ca" genae".24 Tarha" dao: phyid' re nga" cao" khyao jin kham we' dakhyo: dao: phyid' ca" nae". Nga"so: xam: poe kaid' re ngo to" to" ra" cao" khyao jham re re: nga" dug no: ba re25 re: cao" pyang" ca" nae". – Su shid mao gaung re the' tin: mung: yao" gaung re magai: nyain: vho: nhao nae". Ngaid qere: myhi" pho" , mao: nhaung: , zo: dau , yham maqo" ra" yao: nhae: mo" bam: tau: yao" gaung re gai: nyain: vho: nae" akhang"26 qo" ra". – Shao kyang" pye' thao nhaid' ba27 dug no" na ca" genae". – Shao gyang" jo, qo mae mau" vin vo, nae" tau: akhug: vang" shao gyang" jo, qo khyo vao: ra" ne, mae qobo khyaid' xeim: caung da" byid: ca" ga:28 AsAng Mo"so mho: ra". – Ai jham wa khin jaung qe: Ma dai kham ngaid va". Yao: bam wa Ma mug: myid qo" genae" mangaid: . Ngo wa yao: bam: Ma dai kham yao: ngaid29 va". – Caung da" ra" cinmain" nhug , qobo khyaid' xeim: zai" shaid' nghung" qobo khyaid' xeim: sho: jham re zo: geshao: . Israel amyu" qe jham kai: caung da" ru30 alhab' re yu geshao: . – Sao qhid' mhang" ra" qhovo: qho shi: aja: ja: we' vo; lhaui: xeim: jhaung qhu" alhab' geim" re khin: jaung pho" qo" genae". Ni" yham mae min qo" veshao: sao qhid' thaung" ra" cinmain"31 re khin: jaung pho" re byid: wa, . – Khin: jaung pho" wa yao: za: yao: shid: ra" gug' nyhug' sho: we' myang kha: zoqhid: yang bin" se' ra" sho: re gai: zo: nae" mangaid: .