1 Dam: Mo"so: mung dao: wa ngo jhao"2 joe" gyo" li" mung: – Xaosu byu we" nao wa Israel amyu" yao zaung" mo; qhid' kheim: mae lapa pa mung: ta" kyo: zo" re" yao zaung" mo, re Mo"so ce ru: ga: mho: ra" dao: re kai" zhao: nae" ru wa yao: yao: re za: khau ko" ra" Israel yao zaung" mo, wa byuxa: voqoe, genae". Yao zaung" yaug wa yao jham re magai: zho: jhaug' khau ko" i"?3 Naonhaung" yao nug' re shaug' , yao mug' re ve, ko" ra". Xau: yaung" ra" yao re re: se' zo: ko" qe re: yao jham re makhau , mazho: majhaug' genhaung i"?4 Qam: nang" ra" yao re mabao" thaug' , no: ra" yao re mocid' mapho ko". Qug: gyug' ra" yao: re pin: cug' yang mayag: thab' byid: ko". Su pe" khe' lhae" ke' ra" yao re mazhang" yu ko". Byaug: lo" ra" yao re maqho ko". Deim:so: zag akyin"5 anhaung" kaid' veko" ra". – Yao zaung" ru mana: ra" yao jham wa byo: sin" lo" ko" au: seyo: zoqhid jham: zo: pho: boe" veko". –6 Nga" yao jham wa bug gaung khain , bam nyug lao phyo: khain na: myi" lo" mung: mug: myid gye, geim" khyo na: myi" lo"7 ko" ru re khoyaug re: macao" qho ko". – Ai mung: yao zaung" mo, we" Mo"so: dao: re8 tae" gyo: ge, wo". – Mo"so ce ru: ga: mho: ra". Ngo kao daui: na: ru we' dakhyo: yao zaung" ru mana , yao zaung" ru khoyaug re: nga" yao jham re maqho , yao zaung" mo, nga" yao jham re mazho: majhaug' ko" , yao: yao" gaung re za: zho: jhaug' ko" ra". Nga" yao jham wa su lhaid' lo" ru , sham" jhui" tai: lo" yang: seyo: zoqhid jham: zo: pho: boe" ra" mathao mae ,9 Yao zaung" mo, we" Mo"so: dao: re tae:10 gyo: ge, . – AsAng Mo"so ce ru: ga: mho: ra". Ngo wa yao zaung" mo, re lham: tau: lhain: nae". Nga" yao jham re yao zaung" mo; lo, mae" ngo mho' yu nae". Yao zaung" aya: re qab: pye' nae". Yao zaung" mo, thao phyao: yao: yao: re gai: khau lo: genae" mangaid: . Nga" yao jham re thao phyao: yao: bam: zo: pho: maboe" lo: sho' yao: bam: nhaid' mae" le; lhaid' thaid' yu nae".11 AsAng ce ru: ga: mho: ra". Ngo yao:12 nga" yao jham re cao" qho: yu nae". – Na: myi" sin" qin" ra" yao jham re yao zaung" yaug cao" qho: ru ru: nga" yao jham re ngo qo" the' myao sho' cao" qho mung: khyi" khao: ngo" mae" ngo jhui" lo nae".13 Amang: mang: adin" din" mae" jhui: mung: ham phaung nhao: ru bin lao" yao: na qao: mang: khyo jhui" dai" nae". Israel bam dao jham , qid yae mae jo; ra" na jao:14 mae yao: bam re ngo khau nae". – Gyo, zo: jo, qo gai: ra" jao: mae khau nae". Myhao: ra" Israel bam dao mae yao: bam: yham jo; li" nae". Yao: bam Israel bam dao yham gai mae yab genae". Nyug lao qam" ra" gyo, zo: jao: mae gyo, zo: genae". –15 Ngo wa nga" yao jham re zho: jhaug' yang: khau nae". Yab jao: re re: ngo byid:16 nae". – Byaug: lo" ra" yao jham re cao" qho nae". Su keim" lhae" ke' ra" yao jham re cao" qho: jhui" yu nae". Qug: gyug' ra" yao pin: cug' yang yag: thab' byid: nae". Qam: nang" ra" yao re bao" thaug' nae". Xau lam: lateim" ngaid: ra" yao jham re se' pye' mung: tarha" vao: ra" khyo" khau17 nae" ga: Mo"so ta" ra". – Mo"so mho: ru wa nga" yao jham we" gug' nyhug' aja: ja: jham re re: yao lo: we' caid' be, lo: jham re re: ngo kho' khaui" to: nae".18 Naonhaung" wa gai: ra" gyo, zo: jao: mae gyo, zo: ko" ru za: maka" , dang: shi" ra" mhin: gau re zab: nhaug' ra" mau" re mang: da: voyo za: ngaid: ein: jho ko" i"? Qid gyang: re shaug' ru za: maka" , dang shi" ra" qid zab: mhoe: ke' ra" mau" wa19 mang: da: voyo ein: jho ko" i"? – Naon- haung" zab: nhaug' pye' va" mhin: re re: khyid: yang zab: mhoe: ra" qid jham re re: nga" yao jham shaug' li" genae".20 Ai mung: yao: bam re Mo"so ce ru: ga: mho: ra". Xau: yaung" ra" yao we' ngaung: khyoe" ra" yao jham re ngo yao: khyin:21 kho' khaui: nae". – Nao wa qam: nang" ra" yao jham re khyi" khao: ngo" khyo nhao: sin" ke' nae" tau: mae nae zeim: we' re: kin: khung" yang kang: mung: khyug: yang22 thaung" ra" mathao mae – Ngo wa nga" yao jham re khyaid' yu yang: yao: bam wa thao phyao: lhaid' yu: ru qhug' lo: genae" mangaid: . Gug' nyhug' aja: ja: jham re re:23 ngo kho' khaui: nae". – Yao zam: dayaug re ngo khyin: nha mung: yao: wa yao jham re caung: li" nae". Nga" jeim Davi wa yao: bam re khau mung: yao zaung" yaug boe"24 nae". – Ngo kheim: so' bo: Mo"so yao: bam: AsAng boe" nae". Nga" jeim Davi wa25 yao: bam: zug: boe" li" nae". – Ngo Mo"so ta" to: va". Yao: bam we' yaug yo: ra" dao: so: to: mung: yao: bam: mug: myid mae" zoqhid jham re qab: lhaui" pye' nae". Yao: bam wa din" yo mae yaug yo za: na mung:26 seyo segae: mae yab genae". – Yao: bam re re: nga" bam lhang" gam: mae jo; ra" jo, qo jham re re: ngo min byid: mung: ayo, joe" lao" mug: qu nhao yang: jeju mug: qid27 gyo" lo: li" nae". – Seyo: sag' gae jham re: ashi: zaui: genae". Myid gaung zhai: khyi" re: qhovo: qho shi: re byid' li" nae". Mang: byu qe wa phain dang yaug yo qhug' na genae". Yao: bam vin: ra" kyau: re ngo nag: khyug' pye' mung: se' da: be, khyaid' kaid' ra" mo; lo, mae" khyaid' yu: ra" au:28 Ngo Mo"so ngaid: ru re ba genae". – Thao phyao: su pe" amyu" qe maqo" lhaid' lo: genae". Zoqhid jham re: maqo" bin" caid' zo: lo: genae". Yao: bam wa phain dang29 yaug yo za: qhug' na genae". – Nga: lho" ra" khyae re re: yao: bam: tau: ngo kaid' nae". Thao phyao: mang: din" mae bao" khug' gyo" mung: vae: moe; qid shab' ru re maphau: lo: genae". Su pe" amyu" yang jung" khyoe' ru re: phau: lo: genae" mangaid: .30 Yao: bam: AsAng Ngo Mo"so wa yao: bam we' daga" na: na: ru re: Israel amyu" zo: qe ga" ra" yao: bam wa nga" byu jham ngaid: ru re ba: li" genae" ga: Mo"so mho:31 ra". – Nga" gyo, zo: jao: mae na: ra" yao jham we" naonhaung" wa byu ngaid ko" ra". Ngo re: naonhaung" AsAng Mo"so ngaid: ga: AsAng Mo"so mho: ra".