1 Zin ve; daxe: dazin ein: zin lho" sam khye' daba mae Mo"so: mung dao: wa ngo2 jhao" joe" gyo" li" mung: – Xaosu byu we" Egutu jhaung zug: Pharaoh we' yao" mo, mo" thaui: re nao kai" zhao: kyo: nae" ru wa , nao wa phung bao qi: mung: khoyaug3 we' dau: i"? ein: re – Asuri byu wa Leba- non: shaug' gae we' dau ko" ra". Akaung ako' jham wa ko' lo, lin: li" mung: gyai maung" ra". Yao" akhyao wa myhao: yang: nhag' qhid' thaui: mae myhi: ra".4 Qid: mathao qi" qhang: li" ru , no; ra" qid: mathao agae myhao: ru , yao: yaug: ra" avai: ayae qid yug mung: jao: dae mae"5 agae jham khyo yug: gyo" lo" ra". – Ai ru" jham khyo" yang sag' gae alhab' tho' mae je: myhao: ra". Qi" li" ra" au: qid la laug mung: akaung ako' jham myo" li" mung:6 ako' jham gyai qhang: ra". – Mug: le; phyo: mae" ngho' jham wa akaung ako' mae said' said' ko" ra". Gug' nyhug' gug' du: jham wa ai: aqab gyid' mae anau" jhui: ko" ra". Ai: agae: qab mae qi" ra" byumyu"7 jham na: bam ko" ra". – Ai re" ru: qid la laug taung" qo" ra" jo, qo mae agyi: cin" ra" mathao mae qi" myhao mung: akaung ako' jham qhang: ru: yang yaung" ra" ave,8 we' byang" vin" ra". – Mo"so: khyae mae yaug: ra" shaug' gae jham ai: agae jham re maqo" lhoe" lai ko". Hhu: je, gae we' ared gae jham wa ai: agae re" ru: akaung ako' we' mabyang" vin" ko". Mo"so: khyae mae" sag' gae jham dagae re: ai re" ru: mayaung" ko" ngaid: ra".9 Mo"so: khyae mae yaug: ra" Edin: sag' gae alhab' ai re qu" nhung geshao: ein: ngo wa ko' lo, lae nhao yang: shaung yhaung" byid' to: va".10 Mo"so ce ru: ga: mho: ra". Ai: shaug' gae wa agae myhao , ako' myo" laug: ru we' byang" vin" yang: yao: yao" gae au: re phug: ru we' nhag' myid qi: ngaid beim"11 ra" mathao – Byumyu" jham mae phung bao qi: mung: nug: khyo: qo" pyam" ra" yaug: lo, mae ngo qhaug' va". Yao: kaid' ra" azhaug' amhe' mau" zo" mathao khe'12 thug' ru phau: va". – Qu" gyaug sho' ra" gemang: din" mae" byu qe wa yao: re thau: lhang" pye' mung: shepye' to: veko". Akaung ako' jham wa bug gaung we' lao: khaung: khao: ngo" mae damang: din" geim" gyug' qain" jo, veko" ra". Mug: myid: byu alhab' wa yao" bao qab mae" phao:13 thug' mung: shepye' to: veko". – Seyo: gug' nyhug' jham we' mug: le; phyo: mae" ngho' jham wa gyug' qain" jo; ra" akaung ako' jham: adao mae na: bam ko" ra". –14 Khoru: ga" re qid yae mae yaug: ra" sag' gae mae dagae re: yao: yao: myhao: ru re nga: mayu ko" ngaid: ra". Akaung ako' maung" yang: sag' au: ze: ru re mamyid: qi" bau" nghao" genae" khyo: qid shaug' ra" sag' gae alhab' mai qhi" mavae" genae". Ai: sag' gae jham wa byu re" ru: mang: khung: khug gyo" vao mung: byu jham we' daga" myid gaung khug khyo gyo" vao lo" genae" tau: ngo qhaug' pye' va".15 Mo"so ce ru: ga: mho: ra". Yao: mo: vo: mug: khyo gyo" lo" ba mae no; thao" ra" jo, qo jham re ngo nghoe' to: nae". Qid bang: lhung" jham re tam" to: nae". Qid zang gyaung: jham sae za: tae" to: nae". Lebanon: re ngo nhag' kaug' nhao mung: din" yo mae" sag' gae jham jhoe' lo" li"16 genae". – Mang: khung: khyo vao lo" va" mo, we' daga" yao: re mo: vo: mug: khyo ngo khyo" ke' ra" au: deim" khyo" ke' ra" thoe: yang byu amyu" myu" jham re ngo lhaui" nhain" nae". Edin: sag' gae jham we' gai: thao" , myhao: thao" ra" Lebanon: sag' gae jham mae" dadu qid re shaug' ra" sag' gae jham wa myid gaung gyid' khug mae17 yaug yo: ru qhug' genae". – Yao: we' daga" yao" khyid lo, ga" mo, yao: mae khug ngha: ra" mo, wa shae gye mae shid: ra" mo; jo, qo mo: vo: mug: khyo cao" lo" ko" ra". –18 Nao wa ni" phung bao kheim:so' khyo" yang khoru" Edin: sag' gae jham we' dau nae" i"? Nao wa Edin: sag' gae jham we' daga" myid gaung gyid' khyo deim" khyo" ke' ru qhug' nae". Nyaug phyid' makhae: yu: ra" mo, shae mae shid: ra" mo, we' daga" lang" jhao" jo; ru qhug' li" nae". Ai re" ru: Pharaoh jhaung zug: we' yao" byu mo, mo" thaui: alhab' phau: genae" ga: Mo"so mho: ra".