1
Dam: Mo"so: mung dao: wa ngo jhao"2
joe" gyo" li" mung: – Xaosu byu we" ni" amyu" jham re dakai" ta" kyo: nae" ru wa- ngo wa mang: damang: khyo shae gye joe" nhao: ke' au: mang: din" byu qe wa lhaug' zaung" nae" byu dayaug re lhaug'3
zaung" nhao: to: ko" re – Ai: yaug wa shae gye joe" ru re myao yang: labo" maid mung: aug' peim" ke' qere: dayaug yaug wa labo" maid thoe gyo: yang: re: pe" shui manho mata" peim: , shae gye joe" mung: shid qhug' yang: shid: lo" re ai: yaug kao dau: je; ra" qobo re yao: yao: khae: yu4
veshao: . – Byu dayaug yaug wa labo" maid thoe gyo" na gau pe" dao" mang- hae" , shae gye joe" mung: kao dau: je; re5
yao" qobo yao: khae: yu veshao: . – Labo" maid thoe re gyo: mung: pe" shui manho: ra" mathao kao dau: je; ra" qobo wa yao: phau: veshao: . Ta" peim" ra" yaug wa6
kao loe; li" nae". – Mangaid: lao" lhaug' zaung" yaug wa shae gye joe" ru myao gau mae labo" mamaid mang: byu qe re mata" peim" ra" mathao shae gye joe" mung: dayaug yaug kao dau: je; byaug: re ai: yaug wa yao" qobo yao: khae: yu veshao: . Yao" sa: re lhaug' zaung" yaug: lo, mae" ngo7
mho' yu nae". – Ai we' dakhyo: xaosu byu we" nao re Israel amyu" mae lhaug' zaung" nae" qo vin byid' to: va" mathao mae nao wa nga" nhaid' mae" thug' ra" dao: re gyo" khae: yu mung: yao: bam re ta" peim: ca"8
nae". – Ngo wa makhyang: mashab tarha" maci: ra" yaug re dang dang shid nae" ein: ta" to: ngaid qere: ai: yaug wa yao: cao" ra" khyo re jao" nae" mata" peim: ngaid: re ai: yaug wa yao" qobo yao: khae: yu veshao: . Ngaid yang: re: ai: yaug: sa: re nao mae"9
ngo mho' nae". – Mangaid: lao" tarha" maci yaug re yao: cao" ra" khyo re jao" pye' nae" tau: ta" peim: va" ru macao" lo: na: ngaid: re yao" qobo mae kao dau: je, ngaid10
qere: nao wa kao loe; li" nae". – Ai mung: xaosu byu we" Israel zo: myid: qe re ta" kyo: nae" ru wa ngonhaung" wa yao: yao: kaid' shaid' ra" qobo re qhug' yang: qam: nang" ru boe" mung: khoyaug kao qo"11
daui: na nae" i"? ga: mho ko" ra". – AsAng Mo"so ce ru: ga: mho: ra". Ngo kao daui: na: ru we' dakhyo: makhyang: mashab: ra" yaug shid: ru re ngo o ngaui: ru mangaid: . Ai: yaug wa yao: cao" ra" khyo re jao" pye' mung: kao daui: na nae" ru re ngo o ngaui: ra". Israel amyu" zo: myid: qe we" naon- haung" cao" na: ra" khyo jao" pye' ge, . Jao" pye' ge, . Pe" mung: shid nug ko" i"?12
Ai mung: xaosu byu we" ni" amyu" zo: qe re ta" shid' kyo: nae" ru wa- dang main: yaug wa qobo zai" shaid' re azhao: dang main" ra" mau" yang yao: re khyaid' yu: ru magai: qhug'. Makhyang: yaug wa makhyang" mau" re jao" yang: azhao: shaid' nghung" ra" mau" mathao kao so' magai: seim nae". Dang main: yaug wa shaid' nghung" ba mae kao magai: loe, nae". –13
Dang main" ra" yaug wa dang dang kao dau: maje, nae" ein: ngo ta" qere: yao" dang main" ru re lam jang" mung: qobo kaid' re azhao: dang main" ra" mau" daja: re re: magai: myid: beim: byid: nae". Zai" shaid' ra" qobo: mathao shid: ru qhug' nae". –14
Dam: makhyang" ra" yaug re nao dang dang shid nae" ein: ngo ta" qe re: ai: yaug wa yao: yao" qobo re jao" pye' mung: tarha" vao: ra" mau" , dang main" ra" mau" re15
zaui:so: zo" re" – Ngha: to" ra" zai yo mayu lo: lhaid' yu: ra" zai yo jo, nho" re dam: byid: yang: makhyang" ra" mau" re makaid' tarha" ra" khyo dang mae cao" re shid: ru16
maqhug' dang dang kao loe, nae". – Zai" shaid' nghung" ra" qobo daja: re: yao: mae made, tarha" vao: ra" mau" dang main" ru re cao" ra" mathao dang dang kao daui: na17
nae". – Ngaid qere: ni" amyu" zo: myid: qe wa Mo"so: cao" khyao wa madin: ngad: ra" ga: mho: ru mung: yao: bam: cao" khyao18
wa madin: nhaung i"? – Dang main" ra" yaug wa yao" dang main" ru re shepye' mung: qobo kaid' re ai: qobo: mathao shid:19
ru qhug' nae". – Makhyang" ra" yaug kam" wa yao: yao" qobo re jao" pye' mung: tarha" vao: ra" mau" , dang main" ru kaid' ngaid: re ai: mau" zo" mathao mae kao daui: na20
nae". – Ngaid yang: re: naonhaung" wa Mo"so: cao" khyao wa madin: ngaid: ra" ga: mho ko" nhaung i"? Israel amyu" zo: qe we" naonhaung" yaug nge, kaid' ru we' dakhyo: ngo naonhaung" re kaid' nae" ga: mho: ra".21
Ngonhaung" re sham" jhui" lo" ra" daxe: shid' zin ein: zin lho" daxe khye' ngo" ba: ne, mae Yerusalem: mae" phao: loe; lo: ra" byu dayaug ngo jhao" joe" li" mung: vomo"22
re phyo' pye' veko" ra" ga: ta" ra". – Ai: yaug majoe" li" shi: myi" thao: ayo, mae" mung: yao: joe" li" ne, seim joe" sho' Mo"so: lo, nga" au: dao mae kai" to: mung: nga" nhaid' re phung" byid: yang: ngo dao: majhau lo: na: ra" ayo, lai mung: dao: jhau va".23
Ai: au: Mo"so: mung dao: wa ngo jhao"24
joe" mung: – Xaosu byu we" byo; pye' va" Israel mang: mae na shi" ra" mo, wa Abra- ham: wa yao: dayaug za" ru ngaid qere: ce: mang: re Ma qo" ra" , ngonhaung" kam" wa myo: sho' mo, ngaid: . Ngonhaung" Ma khae: yu nae" tau: byid: va" ga: mho ko"25
ra". – Nao Mo"so: dao: re kai" zhao: kyo: nae" ru wa naonhaung" wa sa: we' sho: re daga" zo: ko" ra". Sulho re goe, pa" yang: byu: kao re re: se' ko" ru ce: mang: re gai:26
sang genae" i"? – Shae re za: lam , ca' pho: mau" re kaid' , yham kyo: cao: myhi" shaid' ko" re lao" ce: mang: re qo" sang: yu genae"27
i"? – Dam: dalhang Mo"so: dao: re kai" zhao: kyo: nae" ru wa , ngo kao daui: na: ru we' dakhyo: byo, qeim: ra" jo, qo mae na: ra" mo, wa shae: yang lang" gyoe; shid genae". Jao: dae mae na: mo, re zoqhid jham re qhaug' mung: bin: zo" pye' li" genae". Zho: cang yham laug khyaung mae na: ra" mo, wa no qam" mae shid genae". –28
Damang" geim" re ngo sham" shao: pyaid' pye' yang: yao" kheim:so' qam: o: gain mung: khag' re: maqo" su" lai: lhau lo: sho' Israel bam jham wa byu sheim manae cae:29
jhug tag boe" yang: jo; jo; li" nae". – Mang: din" byu jham wa zai" shaid' nghung" ra" qobo: mathao mae ngo mang: din" sham" shao: pyaid' ra" au: ngo wa Mo"so ngaid: ru re yao: bam ba genae".30
Ai mae" getau xaosu byu we" ni" amyu" zo: myid: qe wa ye: gelang:. Mo"so: dao: ye: tae" gyo: gelang: ga: khinqae khain kham: dung: khain mae nao re qang mung: dayaug we' dayaug jho" ta" na ko"31
ra". – Yao: bam wa nga" byu jham re" ru: ni" qhid' kheim: zaung: na ko" yang: re ni" dao: gelho: matae: gyo: lo: na: bam ko" ra". No: gyo: yo dao: re nhaid' yang ta" ko" qe re: yao: bam: nhag' kao" mae wa mug: myid: jo, nho" re za: nhag' taui: ko" ra". –32
Ni" dao: thoe wa pyo: mung: gelho: za: ba: be; myhang" ra" yaug nghaui" ra" thoe re" ru: yao: bam mae boe" mung: yao: bam the' gyo: ko" qe re: magyo" yu ko" ngaid: ra". –33
Ai: mau" zo" wa boe" yao: boe" mung: ai: ru joe" lao" yao: phaung gaung: mae lapa na: ru re yao: bam ba: li" genae".