1 Ziun: vo ga" ra" Yerusalem: vo mo" din: main" ru wa bo" bao re" ru: yao" khyaid' khyi: khyo wa myi: dam re" ru: bao: li" ra" ayo, akhin: joe" sho' Ngo wa sae za:2 tae" na: jo, nae" mangaid: . – Labug: byu myu" qe wa ni" din: main" ru re jhaung zug: alhab' wa ni" ham" hung: re the' myao mung: Mo"so: nhaid' mae" thug' ra" mang3 sag' khyo" yang nao re khai genae". – Nao wa Mo"so: lo, mae" yaung" lho" maug bain ni" Mo"so: lo, mae ci: ra" jhaung zug'4 lhugmaug boe" nae". – Thao phyao: nao re shepye' to" ra" yaug; ni" mug: myid re cae: jhug tag: mug: myid ga: mata" lo: genae". Nao wa ngo o ngaui: ra" yaug; ni" mug: myid wa lo, xo' yu: ra" mug: ga: mhang" genae". Khoru: ga" re Mo"so wa nao re5 nhag' dag: ra". – Zolau: wa zo myi: we' lo, xo' yu: ru re" ru: ni" zolau: zo: qe wa nao we' lo, xo' genae" ngaid: ra". Pho" sag' wa myhi" sag' mae ngaui bau" ru we' dakhyo: ni" Mo"so wa nao mae ngaui bau" na: li" nae".6 Yerusalem: we" ngo wa ni" vokham" dao mae zaung" lhaug' mo, re nha: to: va" yao: bam wa sae za: tae" to: genae" mangaid: . Mo"so: khyo re ta" peim" ra"7 mo, we" sae za: dana ge, . – Yerusalem: re made" tang shi" ru we' myid kin: dao mae caung: khin: caung: nghaui" ru re magai: boe" shi: re yao: re sae za: dana nhao shi:8 ge, . – Ngo wa ni" gaug zo maui: lam: re thao phyao: gyevo qe re byid: lo: nae" mangaid: . Nao qam: ke' zaui" qo" ra" sabyi' qang: re labug: amyu" qe qhug' shaug' lo:9 genae" mangaid: . – Gaug yaid mo, wa ai: gaug re zo: mung: Mo"so re caung: khin" genae". Sabyi' shi: phyo' shaung mo, wa Nga" shao gyang" ra" jhaung: yham khyae khug mae sabyi' qang: re shaug' li" genae" ga: phung qi" ra" yao" lo, yo lo, lam: re lao: mung: jham tang" ava".10 Vo mo" kham: mae" lai: thug' ge, lai: thug' ge, . Byumyu" qe: tau: khyo nyhang" ge, . Hau" mo" nyhang" tae" ge, tae" ge, laug baui jham re sho' sham" khyo" pye' ge, . Byumyu" qe: tau: khyi tau: to' ge, . –11 Mo"so wa myid kin thao" joe" sho' mae ce ru: ga" ra". Nao re khyaid' yu nae" yaug wa joe" va". Qo" yu ang: ra" aphug' yao" lo, mae yao: ci mung: byid: gae nae" jhaung qhu" jham yao" qhid' kheim: mae jo; bam:12 ra" ein: Ziun: zo myi: zo: re ta" ge, . – Yao: bam wa shao lho" ra" amyu" Mo"so khyaid' khyi: yu: ra" amyu" ga: mhang" genae". Nao re su: yang mashepye' genae" yaug yo taung" khug ngha gai: ra" vo gaung: ga: mhang" genae".