1 Qu" ge, Mo"so wa maqo" khyaid' yu lo: sho' lo, lang" ru mangaid: maqhug' gyo: lo:2 sho' no: jid: ru mangaid: . – Naonhaung" zaui" shaid' ru wa naonhaung" Mo"so we' gao" lin nhao: ava". Yao: mathe' gyo: sho' naonhaung" qobo: yang yao" myo, re go:3 kyo" pye' ava". – Naonhaung" lo, wa sa: we' re: lo, nyhug' wa shaid' nghung" ru we' anyain: avho: boe" veko". Naonhaung" nhaid' wa mhug' pyag' dao: ta" veko". Naonhaung" sho wa makhyang: mashab:4 ra" dao: so' jho" so' ba: ako". – Jo main: ra" tarha" re qho mung: khoyaug re: macao" ko". Akeim aseim mae ngha mung: mhug' vhain" dao: jhau ba: ako". Magai: ra" tau" da re gaung la: nhao mung: mhug' pyag'5 vhain" ra" ru khau: ke' ako". – Yao: bam wa maui bab: au" re ab' mung: phaug' nhao ko" ra". Phyo gao: yham re re: kaid' ko" ra". Ai jham: au" re zo" ra" yaug wa shid ba: ra". Au" phaug' li" re maui bab: za:6 athug' li" nae". – Phyogao: khyang: yang yao: bam qo; ru wa mai bau: maboe" ru we' yao: bam kaid' ra" lo, mau" wa gaung gam xug' maboe" ngaid: ra". Yao: zaui" ra" mau" wa magai: ru za: athug' li" ra". Yao: bam: lo, mae se' da: be, khyaid' ru za: ngaid ko"7 ra". – Yao: bam: khyid wa magai: ru kaid' nae" tao: ba: ako". Qobo maqo" mo; kao re se' nae" wa phyaid: ako". Yao: bam: tau" da wa makhyang: mashab: ru za: ngaid mung: yao: bam ye" lo" ra" gau: khyo wa qug: khai: byo, qeim: ru za: ngaid: ra". –8 Yaug yo: ra" gau: khyo re yao: bam maba ko". Yao: bam ye" lo" ra" gyaung: khyo mae tarha" jin kham mabo ngaid: ra". Yao: bam ye" lo" nae" gau: khyo re akaui aga: phung" ko" ra". Ai: gau: cao" lo" mo, yaug yo: ru re maba ko" ngaid: ra".9 Ai ru: mung: din: main" ra" tarha" wa ngonhaung" we' va" lin: ra". Din: main" tarha" wa ngonhaung" re mamyhi ngaid: ra". Sho' sho' bao bao mamung mung: mug: bo" re myid: nghae: ngaid yang: re: caid' no, khug mae za: asu" na:10 bam: .– Myo, jid yaug re" ru: khin qae soe' qho: bam va". Myo, jid' made, yaug re" ru: soe' du" vhang" qin" bam va". Myi" mae boe" re" ru: na" dao: gaung mae tha" thu: lang" bam va". Na gai gaug qo" mo, mae ngonhaung" wa ashid ru: boe" bam11 va". – Ngonhaung" alhab' wa vae re" ru: kyid' mung: phaung" kyug' ru: nghaui" na: bam va". Din: main" tarha" myid: nghae: qe re: maqo". Khyaid' khyi: yu: ra" jeju re nghae: ngaid qere: ai wa ngonhaung" we'12 va" byaug va". – Ngonhaung" tarha" lhoe" ra" ru ni" qhid kheim: myo" laug: jo; ra". Ngonhaung" kaid' shaid' ra" qobo yao: sagso: boe" ra". Ngonhaung" tarha" lhoe" ru ngonhaung" mae de; jo, mung: yao: yao: shaid' nghung" ra" qobo re yao: yao: ba:13 bam va". – Mo"so re zai" shaid' ru ngag: ha: pye' mung: Mo"so re shepye' bam va". Khug pyag' taung pyi" dao: ngonhaung" ta" mung: aung khug nhag' lam: mae myid: to" amhug' apyag' dao: ta" thug' ke' bam va". –14 Din: main" ra" tarha" wa naung zaid: zaid' lo" byaug va". Din: main" ru wa va: va: mae ye; jo; ra". Jo main: ru wa hau" mo" mae lang: va". Din" ra" nhag' myid qo" vao lo:15 zai mangaid: . – Jo main: dao: majo, lo: shaid' nghung" ru re lha" yaug wa lhaid' yu: ru qhug' va". Ai: akhyo re Mo"so myao: re din: main" ra" tarha" majo; mathao mae nhag' myid yaug mayo ngaid: ra".16 Bao" thaug' ru dayaug re: mana: ru re yao: myao: ra". Nyhang" mho' bain: byu dayaug re: mabo: ru re yao: mug' ra". Ai mung: yao" lo, wa yao" tau: khyaid' khyi: yu: mau" re kaid' mung: yao: din: main" tarha" wa yao: re thaug' qhao: byid' na:17 ra". – Ai mung: din: main" ga" qao bao" re ve, mung: khyaid' khyi: yu: ga" jo, to' maug re zhaung" ci: ra" dae co' phaug' nae" ga" mai bau: re yao: ve; ci mung: gain gin makhin" nhag' myid ga" ra" bau: qhang18 ve; ci: ra". – Yao: bam: ave, re cao" yang: tau: lhain: mo, myid myo: myid laug: ru gye kaid' ra" mo, re akyin" anhaung' dae yao: tug' byid' li" nae". Qid dae yae cao" mae" mo, re re: so' ha" we' qobo tug' byid'19 li" nae". – Ai ru: mung: ba vao shaid' mae" byu qe we' ba thug' shaid' mae" byu qe wa Mo"so: mang khyao: we' phung qab bao re phug' myao: genae". Gyevo qe wa qid je: au: ru" ru yain" vao lo ko" au: Mo"so: solo20 wa tam" kyo" pye' byid' li" nae". – Thain" madaui gyag maqui" Mo"so ce ru: ga: mho: ra". Khyaid' yu: ra" AsAng wa Ziun: bam khyo ye" lo" mung: tarha" lhoe" ra" mau" re jao" ra" Yaku' amyu" qe: jo, qo khyo joe" li"21 nae". – Yao: bam we' gyo: to" to" ra" nga" dao: thang" wa ni" dao mae zaung: ra" nga" solo re: ni" nhaid' mae ngo ke' to: byid: va" Nga" pin dao: wa ni" nhaid' mae" re: ni" zo: myid: qe: nhaid' mae" re: zo: qae: myid: xag' joe" sho' mo; nhaid' mae" re: apyaid ato mae mathug' mabyaug: lo" lo: nae" ga: Mo"so mho: ra".