1 Qi: sho' sho' zag: hug' ge, labo" thoe re" ru: thoe qhang she mung: Yaku' nyaug ngaid: ra" Nga" amyu" byu qe re yao: bam zai" shaid' lo: ra" qobo re ceim" shid' ge, . –2 Yao: bam wa ne, khao: ba khao: ngo" cao" qho mung: nga" akhyo re ba sho' ga: myid ko" ra". Dang main" ra" ru re cao" qho mung: yao: bam: Mo"so: pin dao: re cao" pyang" ra" amyu" re" ru: yao: bam ngo mae" din: main" tarha" mho' zo" re" Mo"so jhao" qui" te' lo nae" myid: o ngaui mo, ngaid3 genhaung wo". – Ngonhaung" zo: shaug' jao" ru re nao pe" mung: mamyao: i"? Ngonhaung" nhag' lam: re nyham: khyo" va" ru nao pe" mung: maxam" i"? ga: ta" ko" re qu" ge, naonhaung" wa zo: shaug' jao" mung: naonhaung" wa pyo" na mung: o: kaung qere ngaid lao" mau" jam: zo" mae4 ashid aso: khao" nhao ko" ra". – Naon- haung" wa jho" ta" ngag: ru we' myain" myo: shoshae mung: magai: ra" lo, zhab' yang jho" pyo' jho" thaung: zo" re" zo: shaug' jao" ko" ra". Tho' zhao" myhao khyo kyao" vao: joe" sho' ga: naonhaung" ana" ba zo: shaug' jao" ru mangaid: ko" ngaid:5 ra". – Ngo o ngaui: ra" zo: shaug' jao" ga" ru ai re" ru: ngaid: i"? Byu wa yao" nhag' lam: re khyo" nyham: pye' ra" ba na ai re" ru: ngaid: i"? Je jid: gae ru: yao" au: goe; gam" mung: jid: mo" mai we' myiqe, sin" ru wa Mo"so o ngaui: ra" ba na ngaid: ein:6 gai: ta" nae" i"?. – Mangaid: ngo o ngaui: ra" zo: shaug' zang" ga" ru wa matarha" taui" to" taui: re pheim: ru la" ra" qo vin re khyo" pye' ru yhin" pyam" qhug' na: ra" mo, re nhao: ke' ru vin kyau: alhab' re nag:7 khyug' pye' mung: yang: – vae: moe; qid shab' mo, re byid: zho: byid: jhaug' ru Na jao: maqo" mo, re ni" yham khyo jhui" lo" ru gaung lam: shopyaid' mo, re the' myao: re mai bau: gae vhe' ru yao: yao" zam" cao: qe re majao" lo: za: zo: shaug' jao" ru re ngo o ngaui: ru ngaid: ra" mangaid:8 i"? – Ai re" ru: kaid' lao" ni" bo" bao wa ne, seim: bo" myhung re" ru: bao: li" mung: ni" qao" zin" khyo wa laui xoe" ga: bao: li" nae". Ni" din: main" ru wa ni" thao mae lhaug' zaung" yaug boe" nae" ngaid: ra". –9 Ai ru: kaid' lao" Mo"so wa ni" yao thoe tau: byid: nae". Nao zag: yao: ke' au: ngo ce mae na: ga: mho: li" nae". Nao wa ni" akhug mae" kyau: re re: lo, nyhug' ceim" ru we' jung" khyoe' dao: thoe jham re jao"10 lha" pye' mung: – Vae: moe; yaug we' sho: jhin qhug' ra" yaug re nhag' myain" myid we' nhag' tang" byid' ngaid: re ni" bo" bao wa mug: caid' khug mae bao: li" mung: ni" caid' no, tham: wa na" gaung ru: bao:11 li" nae". – Mo"so wa nao re khonhae" re: khyo jhui: nae". Bao" khug' gyo" ra" ayo, mae gyi: sho' zho: jhaug' mung: ni" sho: qug: sho: qae re gang: tang nhao: li" nae". Nao wa qid sheim" na: ra" khyae re" ru: khonhae" re: makin: lo" ra" qid thug' re"12 ru: boe" li" nae". – Ni" amyu" akaung aboe: jham wa qhid' phyao: gyo" ra" jo, qo jham re dam: nyhang" byao genae". Geco' ne, mae de" qu" va" yham qao: tae jham: dao mae dalhang dam: kai" kaid' li" genae". Nao re: byo; gyo" jo; ra" vo kham" re dam: byao yaug byu na jao: khyo qid re dam: nyhang" byao yaug ga: mung: mho ko" ru re khae: yu: ru qhug' nae".13 Nao wa dug no: ba re makhyoe' Nga" shao gyang" ra" ba na mae nao o: khyo: macao" lo: za: dug no: ba wa Mo"so: shao lho" ra" ba ngaid: ga: mho mung: ai: ba wa phug' myao: gai: ra" ba ga: mung: ni" mau" mazaui" ru we' nao o ngaui: khyo: macao" nao we' tin" ra" dao: majhau lo: na mung:14 ngaid: re wa – Mo"so mae nao nhag' dag: li" nae". Alao" myid gye, dao mae myhao: thao" ra" jo, qo dao mae ngo nao re zaung nhao: ru we' ni" pho" Yaku' jo, nho" dai kham mae nao re khau nae". Mo"so: nhaid' thug' dao: ta" ra".