1 Nga" byu myu" jham re nhag' tang" ge, nhag' tang" ge, ga: naonhaung" Mo"so2 mho: ra". – Yerusalem: re ngaui bau: dao: ta" wa, gye khe' mau" wa bin: lo" va". Ni" qobo re re: khyaid' pye' va". Qobo: mathao mae" phau" lai: lo: ra" tho' mae Mo"so mae" jeju shid' gae bam qo" khae: yu veko" ein: yao: re zag: hug' ta" wa, .3 Seyo mae hau" nhao" na: ra" yaug: thoe wa Mo"so li" nae" khyo nyhang" to: ge, . Gaoso yo mae ngonhaung" Mo"so:4 tau: khyo nyhang" din: ge, . – Khaung" ra" khyi" mae dau" bam" ge, bam zo: bam zang jham re dau" tae" pye' ge, . Khyo kaui re jhao" ge, azau: akhyain" mung: ra"5 khyo dang re nyhang" tae" ge, . – Mo"so: phung bao re: bao: thug' li" mung: byu myu" alhab' wa dalhang: dae the' myao: li" genae" ga: Mo"so: nhaid' dao: thoe jo; ra".6 Dam: thug' li" ra" thoe wa zag: hug' wa, ga: ta" ra" Alao" ngo khoru: ein: hug' nae" i"? ein: myid' ke' re byu myu" alhab' wa myo, gae jham ngaid: ra". Ai jham: yaung" lho" ru wa din" yo mae" bin: ru" ru ngaid:7 ra". – Mo"so: la wa ai re hug' zao" lao" myo, gae wa jhoe' kyaug' lo" ra". Abu" re: shu: lo" ra". Gai gai: yao: byu myu" jham myo,8 gae ngaid ko" ra". – Myo, gae jhoe' khyaug' lo" ba: ra". Abu" jham re: shu: gyo" lo" ba: ra". Mo"so: mung dao: kam" wa apyaid ato agang" tang: jo; ra" ga: mho: ra".9 Ziun: bam khyo ngaui bau: lau dao: ci: li" yaug , Myhao: ra" bam khyo do, wa, Yerusalem: khyo ngaui bau: lau dao: ci: li" ra" yaug . Thoe mo" ke' wa, mazag mavae thoe mo" ke' wa, Naonhaung" Mo"so re qu" ge, ein: Yuda vogaung: jham re ta"10 wa, . – Qu" ge, Mo"so: phung qab bao we' joe" li" mung: yao" lo, lam" yang ug: li" nae". Myho" gae byid: nae" jhaung qhu" yao: ci mung: gae byid: nae" jhaung qhu" jham yao" qhid' kheim: mae jo; jo; ra". –11 Yao: wa yao zaung" yaug ru: yao" yao jham re qu" gam nae". Yao nau" jham re zhang" yu mung: ge; vo; ci nae". Yao nau" jhui" ra" yao zang jham re zo" zo" mae" jhui" dai" li" nae".12 Qid re lo, khyaung" we' lag; ra" yaug , Mug: gaung re yao" lo; yang thu: ka" ra" yaug , Phaui: lhug re au: vin: yang lag: ra" yaug , bam mo" re joe" yang re: bam ngai re jao: yang lag yaug , wa khoyaug ngaid: ra"13 i"? – Mo"so: solo re khoyaug ca: qu" ko" i"? Yao: we' byin qham mung: khoyaug juyi14 byid: ko" i"? – Yao: khag' we' byin qham: ra" i"? Mo"so re khoyaug mho" shid' qu" ko". Mo"so re tarha" khyo shid' yaug gau: khyo we' laba lajhao: khyo re ceim" shid'15 yaug wa khag' ngaid: ra" i"? – Byumyu" aja: ja: jham wa qid jhao: mae" yug: gyo" ra" qid zo, jham ru: boe" mung: jao the: mae" aphaui: ru: jho nae" boe" ra". Gogyo: kao" re gai: dao" lo" ra" aphaui: re ru:16 ngaid: ra". – Lebanon: yo qao" yo wa myi: maid nae" lao" malaug , ai: seyo mae" gug' nyhug' jham re: phaid' ngaui" xeim: kaid'17 nae" tau: malaug ngaid: ra". – Byumyu" cao jab wa yao" qhid' kheim: mae pe" khyag' mathaid' mo, ru" ru ngaid: ra". Yao: wa yao: bam re lam: malaug aseim akeim ru: jho: ra".18 Ai mung: Mo"so re pe" we' dau tau" genae" i"? yao: re pe" akhyao alho we' dau19 tau" genae" i"? – Alho ba: kaid' yaug wa alho re co' kyaung" lhang" mung: hhang: yang thab' pye' mung: ayae cao" yang: da20 bu yag: pye' ba: ra". – Phug' de; zai yo re aung lam maqo" ke' ra" yaug wa gang" ra" sag' kao" qho mung: gang" tang: ra" alho re kaid' nae" tau: ba jhao: ra" lo, mau" kaid' su21 re qho ba: ra". – Naonhaung" maba ko" i"? Magyo" qu" ko" i"? Geco' ne, mae" mung: naonhaung" re maqhu" qu" ko" i"? Myid kin jo; qhid: lo: ra" akhyo re maba: gyo:22 ko" i?– Myid kin thaui: lhang" dao mae zaung mung: myid kin: Xaosu byu jham re khyag' phaung" jham ru: jho: ra" yaug wa yao: yao: ngaid: ava". Mug: gaung re pin: lung: ru: lao" khao: mung: khug ngha nae" seim zaung ru: lao" lhung" nghoe' to"23 ra". – Yao: wa zug: qe re lao" khyo" mung: myid kin: tarha" agyi jham re akeim aseim24 re" ru: boe" nhao yaug ngaid: ra". – Gai gai: yao: bam re maqho: myug: shi: sin: gengaid yang: re: gyi: maqo" taui: shi: re yao: bam: dao mae maid: ke' lao" yao: wa jhoe' kyaug' lo" mung: shang" zo" la wa yao: bam re vo, phaui: re" ru: tao" sin" lo"25 li" genae". – Ai ru: mung: Ngo re pe" ja: we' dau tau" genae" i"? Ngo re khoyaug we' dau: ra" i"? ga: shao gyang" Mo"so26 myid' na: ra". – Tho' zhao" myhao khyo nghao" qu" ge, ai jham re phain: yaug wa khag' ngaid: ra"? Yao: wa ai nho" mo, mo" thaui: jham re aso: byid: mung: alhab' re mang mhang" byid' ra". Qam: mo" bo: ra" kheim: so' we' jab byang" ra" mathao mae daja: lao" gyoe" gyo" nae" mangaid: .27 Yaku amyu" we" nao ye" lo" ra" gau: khyo re Mo"so mabo: bo ngaid: ra" ein: pe" mung: ta" i"? Israel amyu" we" ni" mau" zo" re Mo"so maxam" to: byid: ngaid: ra"28 ein: pe" mung: ta" i"?. – Nao maba i"? Nao magyo" qu" i"? Na mae: na jo, mae: jo, re phain: phaug' to" ra" Mo"so wa mathao" magain: AsAng Mo"so ngaid mung: qam: yeim" nae" mangaid: myaung" ru re: qhug' nae" mangaid: yao" myid: nghae" tau" da re khoyaug qo" ca: qu" nae" mangaid: . –29 Yao: wa qam: nang: mo, re qam: pyang" byid: mung: qam: o: mabo: ra" mo, re qam:30 o: qo" lo nae" min byid' ra". – Zoqae qe wa qam: nang: mung: myaung: qhaid' ru qhug' genae". Zolau: zo: qe re: tha" thu:31 lang: genae". – Mo"so re myid: nghae" na: ra" mo, kam" wa qam: o: byang" mung: zeim baung: re" ru: daung mug' asag' tha" mung: yao: bam tao: qere: myaung: genae" mangaid: su: ngaid qere: myaung: dug genae" mangaid: .