1 Ai: ayo, mae Hezekia wa shid no no: na: ru ngaid mung: Amos yao: zo: Esaia wa yao: jhao" ye: joe" yang: Mo"so ce ru: ga: mho: ra". Ni" kao thao" va" kao mabo lo: yham byu qe re byin pin co' se, ga: mho:2 ra". – Alao" Hezekia wa khinqae shaid'3 khyo qhid' kheim: phaug' mung: – AsAng Mo"so we" ngo wa Mo"so: qhid' kheim: vin tang: mung: nhag' lam: din: din: za: na ye; lo: ru we' nao o ngaui: khyo: khyo khe' gau: khao: ngo" mae cao" pyang" lo: ru re myid: beim: la, wo" ga: ngug byid ngug4 nhe' we' jhaung: mho' bain" ra". – Ai: au: Mo"so: mung dao: wa Esaia jhao" dam: joe"5 ru wa – Nao Hezekia jhao" dam: tug' ye: mung: ni" pho" Davi Mo"so: mungdao: wa ni" jhaung: mho' thoe re ngo the' gyo: va". Ni" ngug byid re re: the' myao va". Ni" kao re daxe: ngo" zin ngo xo' byid: shi: nae". –6 Nao re re: ce: vo re re: Asuri jhaung zug' lo, mae" ngo loe, nhao nae". Ce: vo re ngo gug: gam lhaug' zaung" nae" ga" ein: ye: ta"7 wa, ga: mho: ra". – Esaia re: Mo"so mho: khyo: boe" lo nhao: li" nae". Ce wa ni" tau: Mo"so mae" ve, lho sagso: boe" veshao: . –8 Qu" wa, Ahaza" ayo, ka" kham mhai" bao qaung daxe kham do, lo" va" ru re ngo dam: tug' gyo" lo nhao nae" ga: mho: ra". Mho: ru we' dakhyo: kham mhai" daxe do, lo" va" bao qaung daxe dam: gyo" lo: ra".9 Ce wa Yuda jhaung zug: Hezekia no gai thao tung" to" ra" dao: ngaid: ra".10 Nga" kao zoqao" au: mo: vo: mug: kham: dung: khyo vao lo" venhaung wo". Ngo mae dang: jo, shi" ra" zin na: gu: gain venhaung ein: ngo ta" va".11 Daui: na shi" ra" mo; phaung mae Mo"so re ngo mamyao lo: nae". Ce:mug: mae Xaosu qe re ngo mamyao lo: nae" ein: paug' ta" va".12 Yao zaung" yaug: seim zaung re" ru: nga" yham re naid: yu mung: getau khyo qhui" pye' veko". Qo, gin: qo, yaug re" ru: nga" kao re ngo dang" lham" pye' va". Gin: zang mae" yao: ngo re nyhae" phyid' li" nae". Daba: khug mae za: nao ngo re thao" gain nhao: li" nae" ein: ngo ta" va".13 Ne, seim joe" sho' myid: nghae" qhao" na: lo: tin: ru: yao: nga" sho: qug: alhab' re khyug' mhain" pye' ava". Daba: khug mae za: ngo na bin va" ein: ngo mho va".14 Ngo wa te: te: du we' bai: je; re" ru: myang: yhai mung: phaung" kyug' re" ru: nghaui" na: . Nga" myo, jid' wa nghao" qu" ke' re qam: yeim va". Mo"so we" yhin" pyam" ru re phau" ra" nga" bo: de; na byid: la, .15 Ngo pe" ru: ba: ta" nae" yha". Ngo re dao: so: byid: va". Dao: so: we' dakhyo: yao: kaid' lo va". Nga" suna bang: geim" mae myid: qug: myid: qe" phau" lo: ru re myid: beim: mung: yin yo za: ye" lo" na nae".16 AsAng we" ni" mung dao: mae Xaosu byu qe daui: na ko" ra". Nga" kao so' solo re: ai mae zaug: ra". AsAng wa nga" no phyo: re gai nhao mung: Nga" kao so' xo' daui: na nhao la, wo".17 Ngo phau" ra" no phyo: wa yo: byaug va". Nga" solo re nhag' myain" ru we' byo; qeim: dung: gyain: mae" xoe: yu byid: va". Nga" qobo alhab' re re: nhaung thao" khyo shelhaui" pye' byid: va".18 Gai gai: yao: mo: vo: mug: wa nao re qo" caung: nae" mangaid: . Shid zug: wa nao re qo" khin" nae mangaid: . Mang: khung: khyo gyo" mo, wa din: main" ru re myid: nghae: lo: genae" mangaid: .19 Daui: na shi" mo, za: gai gai: yao: daui: na shi" mo, za: ana" ba ngo kaid' ru we' dakhyo: nao re caung: khin" li" genae". Yao: pho" wa yao: zo: qe re ni" din: main" khyo re mho" shid' genae".20 Mo"so wa ngo re khyaid' yu va". Ai: mathao Ngonhaung" wa dapyaid geim" Mo"so: yham khug mae tang: she mung: nghaui" thoe masham caung: nghaui" na: bam nae".21 Esaia wa shimyho" shi: myhag' nyha, mung: byang re hab' byid: ge, alao" jhaung zug: pho" gai: lo: li" nae" ga: mho: ra". –22 Hezekia re: Mo"so: yham khyo ngo qo" do, lo" nae" wa pe" ve, lho sagso: thug' li" i" ga: myid' ra".