1 Aru: mung: AsAng Mo"so: wa nao re Pharaoh jhaung zug' AsAng Mo"so aya: mae Ngo nha: to: va". Ni" mao: Arun2 wa ni" lapa boe" nae". – Ngo pin: to: va" alhab' nao xo' zhao: kyo: mung: Arun: wa Pharaoh jhao" yao" mang: mae" Israel qe re nhao: ke' ca" ra" akhyo zhao: kyo: ca"3 nae". – Ngo re: Pharaoh nhag' lam: re qao nhao mung: Egutu mang: mae Nga" mug' pho: ve, lho myo: sho' zaui" qhu" nae". –4 Ai re re: Pharaoh jhaung zug: naotao: dao: re matae" gyo: lo: na: na: li" nae". Ngo re: Nga" lo, Egutu adao mae kai" to: mung: qi" thao" kyin" nhaung" khyo" yang: Nga" mo, mo" thaui: , Nga" Israel amyu" qe re Egutu5 mang: mae" jhui" thug' yu nae". – Egutu mang: adao mae Nga" lo, yheim" ke' mung: Israel amyu" qe re yao: bam: akhug mae" jhui" yu: au: , Ngo AsAng Mo"so ngaid: akhyo re Egutu byu qe ba genae" ga: Moshe6 re mho: ra". – Moshe we' Arun: tao wa AsAng Mo"so pin: ke' ru we' dakhyo: zaui"7 pyang" ako". – Pharaoh jhaung zug: jhao" vao ye: mung: zhao: kyo: ko" au: Moshe: kao she' xe zin ngaid: . Arun" kao wa she' xe: sam zin: ngaid: ava".8 AsAng Mo"so Moshe we' Arun: tao9 re dam: zhao: kyo" ke' ru wa – Pharaoh jhaung zug: khyo" yang mug' pho: phung bao qhu" ge, ga: mho: lo: re ni" zaung: bao" re yu mung: yao" qhid' kheim: mae khyo" ke' wa, ein: Arun: re ta" wa, . Ai: zaung: bao" lhao maui boe" li" nae" ga:10 mho: ra". – Moshe we' Arun: tao Pharaoh jhao" vao mung: AsAng Mo"so pyang: ke' we' dakhyo: zaui: so" ako". Arun: wa yao" zaung: bao" re Pharaoh we' yao" jeim qe: qhid' au: mae khyo" ke' re lhao maui boe"11 lo" ra". – Ailao" Pharaoh jhaung zug: wa yao" ju yi ajhaung qe , ba: vha" ba: lung mo, re khai mung: Egutu mang: mae na: ra" vha" ju yi ba mo, re yao: bam: ju yi khyo" ai we' dakhyo: kaid' qhu" ako". –12 Yao: yaug yao: zaung: bao" re pye' khyo" ke' re lhao maui boe" li" ra". Ai ngaid qere: Arun" zaung: bao" wa yao: bam: zaung:13 bao" re myug: pye' ra". – AsAng Mo"so pin: to: va" we' dakhyo: Pharaoh nhag' lam: qao mung: yao: tao: dao: re matae" gyo: byid: ngaid: ra".14 AsAng Mo"so re: Pharaoh wa nhag' lam: qao mung: Israel byu qe re manhao15 lo: na: na: ra". – Ne, kao ne, seim Pharaoh jhao" ye: wa, . Yao: qid yae khyo thug' ye" li" nae". Yao: majoe" shi" re qid yae mae ye: ye; na wa, . Lhao maui boe" li" ra"16 zaung: bao" re re: lo, mae ci wa, . – Hebre byu qe: AsAng Mo"so wa nga" byu qe seyo mae Ngo re pa" kug' genae" tau: yao: bam re nhao wa, . Kheim: so' bo yaug wa ngo re nao jhao" nhao: ke' ra". Ana" joe" nao matae" gyo: lo: na: na: shi: i"?17 AsAng Mo"so mho: ke' ru wa Ngo AsAng Mo"so ngaid: ru ce: mau" khyo" nao qo" ba: yu nae". Qu" wa, nga" zaung: bao" yang ce: qid tham: re be; ke' lao" qid wa sa:18 boe" byaug nae". – Qid khug ngo: jham re: shid: gain: byaug nae". Qid tham: re: sheim nae: byaug nae". Egutu byu qe re: ai: qid manug: shaug' lo: ca' byaug genae" ein: ta"19 wa, ga: Moshe re mho: ra". – Ai tho' mae" AsAng Mo"so Moshe re ta" ru wa Arun: re ni" zaung: bao" yu: ci mung: Egutu mang: mae jo; ra" qid gyaung , qid lao , qid tham: , qid thaung: , qid tang" lhao: jham: adao mae lo, qang: ke' wa, . Ai: qid alhab' sa: boe" lo" nae". Egutu damang" geim" , sag' khyaung , laug ug' alhab' mae sa: boe" byaug nae" akhyo ta" kyo: wa, ga: mho:20 ra". – Moshe we' Arun: wa AsAng Mo"so mho: ru we' dakhyo: zaui: so: mung: Arun: wa Pharaoh qhid' kheim: , yao" jeim qe: qhid' kheim: mae zaung: bao" re tau: qang: ke' mung: qid tham: mae be; tin" ke' ra" mathao: yang tham: mae" qid alhab' sa:21 boe" lo" ra". – Qid mae na: ra" ngo: jham re: shid: byaug mung: ai: qid saung" sheim nae: ra" mathao: yang Egutu byu qe ai: qid magai: shaug' byaug ko" ngaid: ra". Egutu damang" geim" sa: za: ngaid: byaug ra". –22 Egutu vha" ju yi ba mo, re: yao: bam: ba jhao ju yi khyo" ai we'dakhyo: za: ba: kaid' qhu" ako". AsAng Mo"so mho: to: va" we' dakhyo: Pharaoh jhaung zug: nhag' lam: qao yang yao: tao: dao: matae" gyo: lo:23 ngham za: dam: na: jo; ra". – Jhaung zug' vang khyo dam: tug' lo" mung: ai: akhyo: re nhag' lam: mae lao" make' ci: longaid:24 ra". – Airu: mung: Egutu byu qe wa qid ai magai: shaug' yang: qid yae mae shaug' qid qo" nae" tau: mae" qid thaung: dau" ako". –25 Nhaid' ba lam: lam: AsAng Mo"so wa ai: qid re airu: to" to" ra".