1
Yao: bam Nga" qhid' kheim: mae khin jaung mau" qo" vin geshao: nao yao: bam re ce ru: shao kyang" ca" nae". Qobo mabo: ra" nung: lo: we' yao lo: shid' dau: , –2
Main" phaui: mabo: ra" saung so cin main" lung: , xau mae lhai: sao" to" saung so cin3
main" sao: jham re yu ca" nae". – Ai: cin main" jham re gyain dalam: mae ke' yang: nung: dadau: , yao shid' dau: we' daga"4
yu: li" ca" nae". – Arun: we' yao" yaug gai zo: qe re mo, byu qe qham: na jao: kham: nhae khyo jhui" ye: mung: gaung cid' ca"5
nae". – Ve, mai bau: acao jab re yu mung: bau: qhang , kayhoe" qhang , qao nghoe' yang Arun re vhe' byid mung: gekai: lai kayhoe" qhang re lang zang khyo" lao"6
myho: khyo" ke' ca" nae". – Yao" au: lam: mae au: zhaung: zhaung: byid: mung: au: zhaung: mae shao gyang" ra" dabu re thug'7
te' ca". – Ai: thao gyaid nae" xau yu mung: yao" au: dao mae vhe' gyain: yang yao:8
re boe, byid: ca". – Yao" yaug gai zo: qe re re: jhui" li" mung: bau: qhang vhe' ca"9
nae". – Phyid' cui: re re: cui: byid: mung: au: thab' re re: yu li" yang: yao: bam wa AsAng Mo"so: khang" dao: we' dakhyo: khin jaung aya: mau" khae: yu ca" nae". Ai re" khyo: Arun: we' yao" yaug gai zo: qe re khin jaung aya: mae tang" nha: to: ca". –10
Ai: thao nung: lo: dadau: mo, byu qe qham jao: seim zaung qhid' kheim: she: li" lo mung: Arun: we' yao: zo: qe wa yao: bam: lo, re nung: au: lam: dao mae kai" to: ca"11
genae". – Mo, byu qe qham: na jao: seim zaung yae mae AsAng Mo"so: qhid' kheim:12
mae ai: nung: re se' ca". – Sa: re yu mung: phain: khyug khain mae lo, nyhug' yang thug' gyaid mung: dang: ra" sa: re phain13
qao: mae vhe' sheim: ca" nae". – Au mae thab' to" xau , sang: mae" de; ra" amyhain , no ce' shid' lam: we' ai mae thab' to" xau re yu mung: phain dao mae ngha" ca" nae". –14
Nung: sho: , sho: qid , au nyhug' re kam" wa zang" qham: na: vo yae mae ngha" pye' ca". Qobo bain" ra" xeim: ngaid: ra".15
Yao lo: dadau: re re: yu mung: Arun we' yao" yaug gai zo: qe yao: bam: lo, re16
yao nau" au: lam: dao kai" to: ca". – Ai: yao se' mung: sa: re yu mung: phain adao17
gam: sho' pyi" sin: ca" nae". – Yao re re: atam" tam" khang" phyid' mung: vae: dug khug mae" jham we' khyid jham re cid' pye' yang: au: lam: we' sho: re dabam za:18
bam: to: mung: , – Yao dau: geim" re phain dao mae ngha" ca" nae". AsAng Mo"so re ngha" byid' ra" phaid' ngaui" xeim: ngaid: . Apyaid ato: AsAng Mo"so jhao" myi" yang qhaug' ra" ne pyo" ngaui" xeim: dau: ngaid: ra".19
Getau: yao lo: dadau: re yu mung: Arun: we' yao" yaug gai zo: qe yao: bam: lo, yao nau" au: lam dao kai" to: ca" nae". –20
Ai: yao nau" re se' yang: sa: re yu mung: Arun: lo, yo no: byin: thao mae re: , yao" yaug gai zo: qe: lo, yo no: byin: thao mae re: , yao: bam: lo, yo lo, mo" cae: mae re: , lo, yo khyid mo" cae: mae re: boe, byid: mung: phain adao lhang" gam: pyi" sheim:21
ca" nae". – Phain dao mae jo; ra" sa: we' gyaid nae" xau re yu mung: Arun: we' yao" bau: mae re: , yao" yaug gai zo: qe we' yao: bam: bau: mae re: pyi" sin: byid: ca" nae". Ailao" za: Arun we' yao" yaug gai zo: qe re: , yao: bam: bau: qhang jham re: shao22
gyang" lo: li" nae". – Ai: yao wa aya: tang" to" ra" yao ngaid: ru mung: xau kug' , sho myi: , au jham re thab' to" ra" xau kug' , sang: mae thab' de; jo; amyhain no: ce' shid' lam: we' no: ce'mae thab' de; jo; xau23
kug' , lo, yo sin , – AsAng Mo"so: qhid' kheim: mae jhaung: to" bai" phaui: mabo: gyain mae" cin main" dakhai" , xau: yang kaid'ra" cin main" lung: , cin main" sao:24
dayho' re re: yu mung: , – Ai re Arun: we' yao" yaug gai zo: qe: lo, mae ci nhao yang: apyaid , ato: AsAng Mo"so: qhid' kheim: mae vo; pyao: mung: vo; pyao" xeim:25
ngaui" ca" nae". – Ai jham re yao: bam: lo, mae" khae: yu mung: AsAng Mo"so: qhid' kheim: ne pyo" xeim: boe" nae" tau: ngaui" phain phaid' ngaui" xeim: adao tau ngha" ca" nae". Ai wa apyaid ato: AsAng Mo"so re myi" yang qhaug' ra" xeim: ngaid: ra".26
Arun" aya: tang" ra" yao lo: qao gao re yu mung: AsAng Mo"so: qhid' kheim: vo; pyao: yang: vo; pyao" xeim: kaid' mung: yao qao gao wa ni" qhid' mae ngaid: ra". –27
Ai re" khyo: Arun: we' yao" yaug gai zo: qe re aya: tang" ra" yao mae" vo; pyao" ra" jhaung qhu" kaid' mung: , vo; pyao" ra" qao gao re re: , vo; jhu" ra" jhaung qhu" kaid' mung: vo; jhu" ra" lo, sin re re: shao kyang"28
ca" nae". – Ai: qao gao , lo, sin jham wa AsAng Mo"so: khang" dao: mae ta" to" we' dakhyo: Israel qe qhaug' ra" Arun" qhid' mae" we' yao" yaug gai zo: qe tau: ngaid: nae". Israel qe byid' na ca" zam" khug xeim: mae" AsAng Mo"so: qhid' kheim: vo; jhu" ra" vo; jhu" xeim: ngaid: ra".29
Arun" shao gyang" bau: qhang re yao" thao mae" zo: qe maxo' khae: yu yang: xau gyain: ngaui lho" ba we' khin jaung mo"30
aya: tang" ra" ba re ve, ca" nae". – Arun" gaung tha" khin jaung mo" kaid' ra" zo: wa shao gyang" ra" jao: mae mau" qovin yu nae" tau: mo, byu zang" qham jao: seim zaung khug vao: ra" au: nhaid' ba lam: lam: ve; ci ca" nae".31
Aya: tang" ra" yao lo: sho: re nao yu yang: shao gyang" ra" jao: mae jho'32
mung: , – Arun: we' yao" yaug gai zo: qe ai: sho: re re: , gyain khug mae" cin main" yho' re re: , mo, byu qe zang" qham jao: seim zaung kham: dung: nhae mae zo:33
ca". – Yao: bam re aya: tang" ru we' shao kyang" byid' au" re" yao: bam: tau: qobo khyaid' ra" xeim: re yao: bam zo: ca" nae". Shao gyang" ru mung: khag' re: magai:34
zo: . – Aya: tang" ra" au: re" sho: ngaid: qere: , cin main" ngaid qere: , thao: ba joe" sho' adang: jo; lao" wa myi: mae ngha" pye' ca" nae". Shao gyang" ru mung: khag' re: magai: zo: .35
Ngo nao re mho: kyo" to: va" we' dakhyo: Arun: we' yao" yaug gai zo: qe re lo" kaid' ca" nae". Nhaid' ba lam: lam: khin jaung aya: tang" ra" ngaui lho" ba36
re zaui: so: ca" nae". – Qobo khyaid' xeim: ngaui" nae" tau: ne, qug: nung: lo: dadau: dau: qhaug' ca" nae". Ai: phain tau: mae" qobo khyaid' xeim: ngaui" byid' au: ai re nao shao kyang" ca" nae". Ai re shao kyang" nae" tau: boe, nae" xau shao37
kyang" ca" nae". – Nhaid' ba lam: lam: ai: ngaui" phain tau: qobo khyaid' xeim: nao ngaui" byid: mung: ai re shao kyang" ca" nae". Ailao" ai: phain wa shao gyang" thao" ngaui" phain boe" li" nae". Ai: ngaui" phain mae zao" tin" ke' ra" pe" ngaid qere: shao gyang" ra" ja: boe" li" nae".38
Ana" ce wa ai: ngaui" phain mae qhaug' nae" ra" xeim: ngaid: zin mabyang" shi" yao nau" shid' dau: ne, qug: ngaui" byid:39
ca" nae". – Ne, seim re dadau: myi" thao40
dadau: qhaug' ca" nae". – Yao nau" dadau: ngaui" ru mae thaung" yu: ra" xau loga sam lam: we' lhag' to" saung so cin main" O:ma: dalam: , vhe' sin: xeim: kaid' nae" tau: sabyi' qang: loga sam thaug' bo ca"41
nae" ngaid: . – Getau: yao nau" ngaui" re myi" thao: dau ngaui" ra" au: ne, seim: zo: shaug' jhaung qhu" we' vhe' sin: jhaung qhu" bo: ke' mung: AsAng Mo"so jhao" myi" yang qhaug' ra" xeim: we' ne pyo" ra"42
ngaui" xeim: kaid' ca" nae". – Ai wa Ngo nao we' jho" qhug' jhau: na: ra" jo, qo ein nae" mo, byu zang: qham yham nhae AsAng Mo"so: qhid' kheim: naonhaung" zo: myid: aqae: qae: myi" yang ngha" nhae" nae"43
ngaui" xeim: ngaid: ra". – Ai: jo, qo mae Israel byu qe we' Ngo jho" qhug' mung: Nga" phung bao khyo" yang yao: bam re44
shao kyang" yu nae". – Nga" qhid' kheim: khin jaung mau" qo vin vo; nae" tau: Arun we' yao" yaug gai zo: qe re re: mo, byu zang" qham jao: seim zaung re re: , ngaui"45
phain re re: Ngo shao kyang" nae". – Israel byu qe mae Ngo bo: bo mung: yao: bam:46
AsAng Mo"so boe" nae". – Yao: bam mae Ngo bo: na nae" ein: Egutu mang: mae" yao: bam re jhui" thug' lo: ra" yao: bam: apyaid ato: AsAng Mo"so Ngo ngaid: nae" ru yao: bam ba genaeva". Ngo wa yao: bam: so apyaid ato: AsAng Mo"so ngaid: ga: Moshe re mho: ra".